الماتى وبلىسىنىڭ اكىمى اماندىق باتالوۆ ءوزىنىڭ ورىنباسارى باعدات مانزوروۆتىڭ ءوز ەركىمەن قىزمەتىنەن بوساتىلعانىن مالىمدەدى. بۇل تۋرالى وبلىس اكىمىنىڭ باسپا ءسوز قىزمەتى حابارلايدى.

– باعدات مانزوروۆ ءوز ەركىمەن جۇمىستان كەتتى. ول ءوز قىزمەتىندە كاسىبي جانە بىلىكتى مامان بولدى. ارىستى قالپىنا كەلتىرۋدە جاقسى جۇمىس جاسادى. سونداي-اق ونىڭ گازداندىرۋ سالاسىنا جانە ءمودۋلدى قازاندىقتاردى ورناتۋعا قوسقان ۇلەسىن اتاپ وتپەسكە بولماس. مەن وعان بار جاقسىلىقتى تىلەيمىن، – دەدى باتالوۆ.

اكىمنىڭ ەكس-ورىنباسارى ءوز كەزەگىندە ارىپتەستەرىنە اتقارىلعان جۇمىس ءۇشىن العىس ايتتى.

– 7 ايدا كوپ نارسە جاسالىنعان جوق. العاشقى ءىسساپار وبلىس اكىمىمەن ارىستا بولدى. ءبىراق ءبىز ونى ءساتتى اياقتادىق. الماتى وبلىسى – مەنىڭ كىشكەنتاي وتانىم، سوندىقتان مەن بۇل باعىتتا جۇمىس ىستەگەنىمە قۋانىشتىمىن. ءارى قاراي ايماقتىڭ وركەندەۋىن تىلەيمىن، – دەپ مانزوروۆ سوڭعى ءسوزىن تۇيىندەدى.

باعدات مانزوروۆ الماتى وبلىسى اكىمىنىڭ ورىنباسارى قىزمەتىنە 2019 جىلدىڭ شىلدەسىندە تاعايىندالعان.  ول تۇرعىن ۇي-كوممۋنالدىق شارۋاشىلىق جانە كاسىپكەرلىك پەن تۋريزم سالالارىنا جاۋاپتى بولدى.