10 اقپان كۇنى پرەزيدەنت قاسىم-جومارت توقايەۆ جامبىل وبلىسىنىڭ قورداي اۋدانىنداعى قاقتىعىسقا بايلانىستى ءبىرقاتار لاۋازىمدى تۇلعانى قىزمەتىنەن بوساتۋ تۋرالى تاپسىرما بەرگەن. قىزمەتىنەن بوساتىلعان جامبىل وبلىسى پوليسيا دەپارتامەنتىنىڭ بۇرىنعى باستىعى ارمان ورازالييەۆ جامبىلدىقتارعا العىس ايتتى.
"قۇرمەتتى جامبىل وبلىسىنىڭ تۇرعىندارى!
بۇگىن سىزدەرمەن قوشتاسا وتىرىپ، قىزمەت بارىسىندا كورسەتكەن قولداۋلارىڭىز ءۇشىن بارشاڭىزعا زور العىسىمدى بىلدىرگىم كەلەدى. بۇل، ەڭ الدىمەن – بەلسەندى ازاماتتار، پوليسيا قىزمەتكەرلەرى، مەنىڭ جاقىندارىم. سىزدەرگە قاي كەزدە دە سەنىم ارتۋعا بولاتىن. جامبىلدىقتاردىڭ بويىنان ءدال وسى قاسيەتتەردى جوعارى باعالايتىنىمدى شىن جۇرەكتەن مويىندايمىن.
مەن ەلىمىزدىڭ كوپتەگەن وبلىستارىندا جۇمىس ىستەدىم جانە ولاردىڭ ءارقايسىسىنا بار جانىممەن ۋايىمداپ، وركەندەۋى ءۇشىن ۇلەسىمدى قوسۋعا، ءوزىمنىڭ پايدامدى تيگىزۋگە تىرىستىم.
قۇرمەتتى مەنىڭ دوستارىم، وسىنداي جىلىلىق ۇيالاعان ايماقتا جۇمىس ىستەگەن كەزەڭدەرىمدى ءارقاشان ەستە ساقتايتىن بولامىن. جامبىل وبلىسىنىڭ ەڭ مىقتى، ۇزدىك جانە ءاردايىم الدىڭعى قاتاردا بولۋىنا تىلەكتەسپىن. بارشاڭىزعا بەيبىتشىلىك، تىنىشتىق، ەرتەڭگى كۇنگە سەنىمدىلىك تىلەيمىن" دەپ جازدى ارمان ورازالييەۆ ءوزىنىڭ facebook پاراقاشاسىنا.
پىكىر قالدىرۋ