جامبىل وبلىسى قورداي اۋدانىندا بولعان ەتنيكالىق جانجال كەزىندە 19 پوليسيا قىزمەتكەرى زارداپ شەكتى. بۇل تۋرالى ۇكىمەت وتىرىسىندا وبلىس اكىمى بەردىبەك ساپاربايەۆ حابارلادى. 

– بەس كۇننىڭ ىشىندە دارىگەردىڭ كومەگىنە 178 ادام جۇگىنگەن، سونىڭ 19-ى – قۇقىق قورعاۋ قىزمەتكەرلەرى. ون ادام قازا تاپتى. قازىرگى كەزدە قورداي اۋداندىق اۋرۋحاناسىندا 13 ادام ەمدەلىپ جاتىر، ال 20 ادام الماتىنىنىڭ ءبىرقاتار اۋرۋحانالارىنا جاتقىزىلعان. قۇربان بولعانداردىڭ بارلىعىنىڭ وتباسىنا جاردەم كورسەتىلىپ جاتىر، –  دەدى ساپاربايەۆ.

اكىمنىڭ ايتۋىنشا، قىرعىزستان اۋرۋحاناسىنداعى ادامدار الماتى مەن تارازعا جەتكىزىلگەن. ساپاربايەۆ قازىرگى تاڭدا ول جاقتا ادام قالماعانىن راستادى. 

ۇكىمەت وتىرىسىنان كەيىن اكىم ءبىرقاتار سۇراقتارعا جاۋاپ بەردى. ياعني، قازىرگى ۋاقىتتا جانجال سالدارىنان كەلگەن شىعىن انىقتالىپ جاتقانىن، ونىڭ ەسەبى شىققان سوڭ زيان شەككەندەردە وتەماقى تولەۋ تۋرالى ۇكىمەتكە ۇسىنىس ەنگىزىلەتىنىن مالىمدەدى. سونداي-اق ول بۇل وقيعانى "ۇلتارالىق قاقتىعىس" دەگەن سيپاتتاۋمەن كەلىسپەيتىنىن ايتتى.

– بۇل جەردە ۇلتارالىق ماسەلە جوق، بۇل تۇرمىستىق داۋدان تۋىندادى، جاقىن ارادا ناقتى ءبىر شەشىم شىعارىپ، ءتيىستى شارا قولدانامىز، –  دەدى اكىم.