ق ر ىشكى ىستەر ءمينيسترىنىڭ ورىنباسارى يۋريي يلين كوكتەمگى سۋ تاسقىنى جاعدايىنا دايىندىق تۋرالى باياندادى، دەپ حابارلايدى قازاقپارات.

ونىڭ ايتۋىنشا، ەلدى مەكەندەردى سۋ تاسقىنىنان قورعاۋ ءۇشىن «2017-2020 جىلدارعا ارنالعان سۋ تاسقىنى قاۋىپ-قاتەرىنىڭ الدىن الۋ جانە ولاردى جويۋ بويىنشا شارالار كەشەنى» جول كارتاسى جۇزەگە اسىرىلۋدا.

– جول كارتاسىندا 521 ءىس-شارانى ورىنداۋ كوزدەلگەن. بۇل باعدارلامانى قارجىلاندىرۋعا رەسپۋبليكالىق جانە جەرگىلىكتى بيۋدجەتتەن 70 ملرد تەڭگە قاراستىرىلعان. ءۇش جىلدا جول كارتاسىنىڭ تاپسىرمالارىن ىسكە اسىرۋ 1046 ەلدى مەكەننىڭ 724-ىندەگى قاۋىپ-قاتەردى ازايتۋعا مۇمكىندىك بەردى. بۇل جۇمىس ءالى اياقتالمادى، بيىل جالعاستىرىپ، باعدارلامانى تولىعىمەن ورىندايمىز، – دەدى يۋ. يلين ق ر پارلامەنتى ماجىلىسىندە ەكولوگيا ماسەلەلەرى جانە تابيعات پايدالانۋ كوميتەتىنىڭ وتىرىسىندا.

جول كارتاسىنا سايكەس، 2019 جىلى اقتوبە، اتىراۋ، شقو، جامبىل، بقو، ماڭعىستاۋ، پاۆلودار، تۇركىستان، قوستاناي وبلىستارىندا 36 شارا جاسالعان.

– بۇل ايماقتارداعى ەلدى مەكەندەردى سۋ باسۋ ءقاۋپى تۋۋى مۇمكىن. جول كارتاسىندا كورسەتىلگەن شارالاردىڭ ورىندالماۋ سەبەبى – قاراجاتتىڭ جەتپەۋى، جوبالىق-سمەتالىق قۇجاتتامانىڭ بولماۋى جانە جول كارتاسىنىڭ كەش ورىندالۋى. ءقازىر جەرگىلىكتى اتقارۋشى ورگانداردىڭ باستى مىندەتى – ەلدى مەكەندەردى قاردان تازارتۋ، – دەدى ءمينيستردىڭ ورىنباسارى.

اسىرەسە، نۇر-سۇلتان قالاسى مەن وعان ىرگەلەس اقمولا، پاۆلودار، قوستاناي وبلىستارىنا قار كوپ جاۋعان.

– وڭتۇستىك قازاقستانداعى سىرداريا سۋ قويماسىندا ءقاۋىپ جوق. ونداعى سۋ 3،6-3،9 ملرد تەكشە مەترگە جەتەدى. سىردارياداعى مۇز قالىڭدىعى وتكەن جىلمەن سالىستىرعاندا تومەن، سوندىقتان سۋ كوبەيگەندە قابىرشاق مۇز كوبەيىپ، كەدەرگى كەلەدى دەپ ويلامايمىز. وزەن القابىنان اسىپ كەتپەيدى. جامبىل وبلىسىندا دا ەش ءقاۋىپ جوق، – دەدى يۋريي يلين.

الماتى وبلىسى بويىنشا كوكتەمدە قار ەرىپ، جاڭبىر جاۋعاندا سۋ تاسقىنى ءقاۋپى تۋىنداۋى مۇمكىن.

– شقو بويىنشا كەيبىر تاۋلى ايماقتارداعى قاردىڭ جامىلعىسى 25% كوبىرەك. قولداعى قورىمىز ەركىن جۇمىس ىستەۋگە مۇمكىندىك بەرەدى. وتكەن جىلى سەمەي قالاسىندا توتەنشە جاعداي بولدى، سۋ قويماسىندا كەپتەلىس بولىپ، مۇز قاتتى، سايكەسىنشە ەرتىس وزەنىنىڭ تاسۋىنا اكەپ سوقتى، – دەدى ول.

ىشكى ىستەر مينيسترلىگى سۋ تاسقىنى بولعان جاعدايدا، ەڭ الدىمەن ورتالىق قازاقستان اۋماعى باقىلاناتىنىن ايتادى. يۋريي ءيليننىڭ ايتۋىنشا، قاردىڭ كوپتىگىنەن ۆياچەسلاۆ سۋ قويماسى تەز تولۋى مۇمكىن. سوندىقتان ءقازىر الدىن-الا سۋدى اعىزۋ تۋرالى شەشىم قابىلدانباق.

– جاۋىن-شاشىن كوپ جاۋعان اقمولا وبلىسىنىڭ تومەنگى بولىگىندە قيىندىق تۋىنداۋى مۇمكىن. ول جاقتا قاجەتتى شارالار قابىلداندى، 500-دەن استام ءۇي ەسەپكە الىندى. ءقازىر اكىمدىك جاڭا باعدارلاما ازىرلەپ جاتىر، وندا ءقاۋىپتى اۋدانداردا قالعان تۇرعىنداردى جاڭا تۇرعىن ۇيلەرگە كوشىرۋ ءۇشىن قاراجات بولىنەدى. سودان كەيىن ءبىز اتباسارداعى قاۋىپ-قاتەر رەجيمىن الىپ تاستايمىز، – دەدى يۋريي يلين.

سونىمەن بىرگە، سولتۇستىك قازاقستانداعى سەرگەيەۆكا سۋ قويماسىنداعى جاعداي قالىپتى. وندا حالىقتى سۋ باسۋ ءقاۋپى جوق.