قازاقستان اقپارات جانە قوعامدىق دامۋ ءمينيسترى داۋرەن ابايەۆ ەلدىڭ ەكس-پرەزيدەنتى نۇرسۇلتان نازاربايەۆتىڭ جيەنى، پارلامەنت سەناتىنىڭ قازىرگى سپيكەرى داريعا نازاربايەۆانىڭ ۇلى ايسۇلتان نازاربايەۆتىڭ الەۋمەتتىك جەلىدە جازعاندارىنا قاتىستى پىكىر ءبىلدىردى.
حابار اراناسىنداعى "وتكرىتىي ديالوگ" باعدارلاماسىندا ابايەۆ ايسۇلتان نازاربايەۆتىڭ ءبىرازدان بەرى "پسيحيكالىق اۋرۋمەن اۋىرىپ جۇرگەنىن" ايتتى. ونىڭ سوزىنشە، ايسۇلتان نازاربايەۆ ايتقان اقپاراتتار شىندىققا جاناسپايدى.
"بۇل ماسەلە بويىنشا اعايىنعا ايتقىم كەلەدى. ءقازىر جالپى ءبىزدىڭ قوعامدا عانا ەمەس، الەم بويىنشا دا وتىرىك پەن شىن اقپاراتتى اجىراتۋ – ۇلكەن ماسەلە بولىپ تۇر. كەيبىر توپتار جالعان اقپارات تاراتىپ، ۇلكەن كومپانيالاردىڭ، جەكە ادامداردىڭ، ءتىپتى ءبۇتىن ءبىر ەلدىڭ ابىرويىنا نۇقسان كەلتىرىپ جۇرگەنىن كورىپ ءجۇرمىز. ءبىراق مۇنىڭ ارتىندا جىمىسقى وي، پايدا كورۋ نيەتى تۇرادى جانە مۇنداي مىسالدار سوڭعى ۋاقىتتا ءبىزدىڭ ەلدە دە كوبەيىپ كەلەدى. مۇنىڭ سوڭى ارانداپ قالۋعا اكەلۋى مۇمكىن. ايسۇلتانعا قاتىستى دا وسىنى ايتقىم كەلەدى. بۇل – ءبىرىنشى كەزەكتە ونىڭ اناسىنىڭ تراگەدياسى. انا ءۇشىن بالاسىنان اسقان قانداي قىمبات نارسە بولۋى مۇمكىن؟ كەيبىرەۋلەر وسى وقيعاعا ەلباسىن دا ارالاستىرعىسى كەلەدى. شۋ جاساپ، ەلدى دۇرلىكتىرۋگە تىرىسادى. ءبىراق حالىقتىڭ باعىنا تۋعان جاقسىمىزدى قاڭقۋ سوزگە قالاي قيامىز؟ ءوزىڭىز ويلاڭىزشى، ەكونوميكاسى قۇلدىراعان، جوق بوپ كەتكەن، ءوندىرىسى توقتاعان ەلدى 30 جىلدا قازىرگىدەي دەڭگەيگە كوتەرۋ كىمنىڭ قولىنان كەلەدى؟ قازاق قاشاندا ەل ءۇشىن تۋعان ەرلەردى باعالاعان، توبەسىنە كوتەرگەن، ابىرويىن ساقتاعان. بابالار ايتقانداي، "بەتەگە كەتسە – بەل قالار، بەرەكەڭ كەتسە – نەڭ قالار؟". اعايىن، سوندىقتان بەرەكەمىزدى باعالايىق. جەل سوزگە ەرىپ جاقسى ءىستى جوققا شىعارمايىق، – دەدى ابايەۆ.
