ۇقك الماتىدا دەسترۋكتيۆتى ءدىني اعىمداعى ەكى ادامدى ۇستادى، دەپ حابارلايدى Qamshy.kz اقپارات اگەنتتىگى كوميتەتتىڭ سايتىنا سىلتەمە جاساپ.

"2020 جىلعى 14 اقپاندا قازاقستان رەسپۋبليكاسى ۇقك جەدەل-ىزدەستىرۋ ءىس-شارالارىن ۇيىمداستىرۋ ناتيجەسىندە الماتى قالاسىندا دەسترۋكتيۆ ءدىني اعىمنىڭ 2 ۇستانۋشىسىن ۇستاپ، سوت سانكسياسىمەن قاماۋعا الدى.

ولاردىڭ مەكەنجايلارى بويىنشا تەرگەۋ ءىس-قيمىلدارىن جۇرگىزۋ بارىسىندا قولدان جاسالعان جارىلعىش قۇرىلعى، ونى جاساۋعا ارنالعان قۇرامداس بولىكتەر، سۋىق قارۋ، شابۋىلداۋ كوزدەلگەن وبەكتىلەردىڭ فوتو جانە بەينە تۇسىرىلىمدەرى بار سمارتفوندار الىندى"، - دەلىنگەن ۇقك حابارلاماسىندا.

كوميتەت دەرەگىنە سۇيەنسەك، ولارعا قاتىستى تەرروريزم اكتىسىنە دايىندالۋ (ق ر قىلمىستىق كودەكسىنىڭ 255-بابى) جانە تەرروريزمدى ناسيحاتتاۋ (ق ر قىلمىستىق كودەكسىنىڭ 256-بابى) فاكتىلەرى بويىنشا قىلمىستىق ىستەر قوزعالدى.

تەرگەۋ ماتەريالدارى بويىنشا، قاماۋعا الىنعاندار رەسپۋبليكا اۋماعىندا، سونىڭ ىشىندە ادامدار كوپ شوعىرلانعان ورىنداردا تەرروريستىك اكتىلەر دايىنداعان.

ۇقك مالىمەتىنشە، تەرگەۋ جالعاسىپ جاتىر.