قورداي اۋدانىنىڭ پوليسيا قىزمەتكەرلەرىمەن توبەلەسكەن 3 جىگىتكە قاتىستى تەرگەۋ اياقتالدى. بۇل تۋرالى باس پروكۋراتۋرانىڭ باسپا ءسوز قىزمەتى حابارلادى.
7 اقپاندا قورداي اۋدانىنىڭ سورتوبە اۋىلىندا پوليسيا قىزمەتكەرى ۆوينگي ل. جۇرگىزگەن Honda Odyssey كولىگىن توقتاتقان.
"قاجەتتى قۇجاتتاردىڭ بولماۋىنا بايلانىستى پوليسەي ۆوينگۆي ل.-عا پوليسيا بولىمىنە بارۋدى ۇسىنعان. الايدا ول پوليسەيدىڭ تالاپتارىن ورىنداماي، وعان قارسى شىققان. كەيىن ول ۇيىنە بارىپ، ءوزىنىڭ ۆوينگۋي ا. ي ۆوينگۋي م. اتتى اعالارىمەن بىرگە پوليسيا قىزمەتكەرىنە كۇش كورسەتكەن. ولاردىڭ توبەلەسكەن ۆيدەوسى الەۋمەتتىك جەلىگە تاراپ كەتكەن"، - دەلىنگەن حابارلامادا.
وسى فاكتى بويىنشا باس پروكۋراتۋرانىڭ ارنايى پروكۋرورى قىلمىستىق كودەكستىڭ 380-بابى 1-بولىگى («بيلىك وكىلىنە زورلىق-زومبىلىق قولدانۋ») بويىنشا سوتقا دەيىنگى تەرگەۋ جۇرگىزدى.
ءۇش ايىپتالۋشى ءوز كىناسىن تولىق مويىنداپ، تەرگەۋ سوتىنىڭ كەلىسىمىمەن قاماۋعا الىندى. 14 اقپاندا قىلمىستىق ءىس ايىپتاۋ قورىتىندىسىمەن قورداي اۋداندىق سوتىنا جىبەرىلدى.
