قوردايداعى وقيعاعا بايلانىستى كۇننەن-كۇنگە جاڭا دەرەكتەرلەر پايدا بولىپ،  قىلمىستىق ىستەر سانى دا كوبەيىپ بارادى. بۇعان دەيىن بيلىك 7 اقپاندا بولعان جانجالعا بايلانىستى 25 قىلمىستىق ءىس قوزعالدى دەپ مالىمدەسە، بۇگىن شامامەن 90 قىلمىستىق ءىس قولعالعانىن حابارلادى. بۇل تۋرالى ىشكى ىستەر ءمينيسترىنىڭ ورىنباسارى مارات قوجايەۆ ايتتى.

– قازىرگى كەزدە جۇزدەگەن ادامنان جاۋاپ الىندى، وقيعاعا قاتىسۋشىنىڭ ءرولىن انىقتاۋعا باعىتتالعان پروسەسسۋالدىق شارالار، قاجەتتى ساراپتامالار ءجۇرىپ جاتىر. قاجەتتى پروسەسسۋالدىق شارالار اياقتالعاننان كەيىن كىنالىلەر جاۋاپقا تارتىلادى... ءتۇرلى ەپيزود بويىنشا 90 قىلمىستىق ءىس. تەرگەۋدىڭ جالپى مەرزىمى – 2 اي، – دەدى قوجايەۆ.

مارات قوجايەۆ تەرگەۋدىڭ قاشان اياقتالاتىنىن ايتا المادى. ول "جانجالدىڭ ۋشىعۋىنا تۇرتكى بولعان" اقساقالدى ۇرىپ-سوعۋ فاكتىسى بويىنشا دا كۇدىكتىلەردىڭ ۇستالعانىن حابارلادى.

مينيستر ورىنباسارىنىڭ ايتۋىنشا، جانجال شىعارىپ، پوليسياعا باعىنباعانداردان 3 ادام ۇستالىپ، ءىس سوتقا جىبەرىلدى. قارت كىسىنىڭ سوققىعا جىعىلۋ وقيعاسىندا كىنالىلەر انىقتالىپ، قاماۋعا الىندى. ال، قالعان ارانداتۋشىلارعا قاتىستى اقپارات ناقتى بولماعاندىقتان، سوت تەرگەۋ جۇمىستارىن جۇرگىزىپ جاتىر.