شىعىس قازاقستان وبلىسىنىڭ اكىمدىگى زايسان اۋدانىدا كوروناۆيرۋس جۇقتىرعان جۇڭگو ازاماتتارى جاتقىزىلادى دەگەن اقپاراتتىڭ شىندىققا سايكەس كەلمەيتىنىن ايتتى، دەپ حابارلايدى Qamshy.kz اقپارات اگەنتتىگى.
كەشەلى بەرى الەۋمەتتىك جەلىلەردە «كوروناۆيرۋس جۇقتىرعان جۇڭگو ازاماتتارى زايسان اۋدانىنا جەتكىزىلىپ، جەرگىلىكتى اۋرۋحاناعا جاتقىزىلادى» دەگەن سىڭايداعى اقپاراتتار تاراپ كەتكەن. وسىنى ەستىپ ۇرەيلەنگەن سارتەرەك جانە اينابۇلاق اۋىلىنىڭ تۇرعىندارى كوشەگە شىعىپ، سونداعى اۋرۋحانالاردىڭ الدىنا جينالدى. ولار شەكارانىڭ جابىلۋىن تالاپ ەتكەن.
«وبلىس اكىمى دانيال احمەتوۆ جۇرتتى تىنىشتاندىرۋ ءۇشىن زايسانعا كەلدى. وڭىرىمىزگە ناۋقاس ادامدار اكەلىنەدى دەگەن اقپارات جالعان. شىندىققا سايكەس كەلمەيمىن مالىمەتتەردى تاراتقاندار قىلمىستىق جاۋاپقا تارتىلاتىنىن ەسكە سالامىز»، - دەيدى وبلىس اكىمىنىڭ باسپا ءسوز قىزمەتى.
19 اقپان كۇنى ايماق باسشىسى دانيال احمەتوۆ حالىق الدىندا ەسەپ بەرۋ كەزدەسۋىندە شەكارالاس اۋىل تۇرعىندارىن كوروناۆيرۋستان ۇرەيلەنبەۋگە شاقىرعان ەدى.
«قازاقستاندا ينفەكسيا جۇقتىرعان ەشكىم جوق. 17 اقپاننان باستاپ قىتايدان كەلگەن ءاربىر ازامات 2 اپتاعا وبسەرۆاسيالىق باقىلاۋعا جاتقىزىلۋدا. وبلىستىڭ مەديسينالىق مەكەمەلەرىندە كوروناۆيرۋسقا قارسى پرەپاراتتار قورى جەتكىلىكتى. سوندىقتان بارشاڭىزدى ۇرەيلەنبەۋگە شاقىرامىن. جاعداي باقىلاۋدا»، - دەدى دانيال كەنجەتاي ۇلى.
