شقو وبلىسىنداعى زايسان جانە ءۇرجار اۋدانىنا قىتايدان قازاقستاندىقتار كەلگەن. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى ءىلياس مۇحامەدجان حابارلادى. 

"قحر شەكاراسىنا جاقىن جاتقان زايسان جانە ءۇرجار اۋداندارىندا قحر-دان كەلگەن قازاقستان ازاماتتارىن باقىلاۋ ءۇشىن جالپى سانى 295 توسەكتىك جەكە تۇرعان عيماراتتارداعى كارانتيندى ستاسيونارلار دايىندالدى. بۇل كەلگەن بارلىق ادامدار، بىرىنشىدەن ءبىزدىڭ جەرلەستەرىمىز، ەكىنشىدەن، اۋرۋ بەلگىلەرى جوق دەنى ساۋ ادامدار.
شىعىس قازاقستان اۋماعىنا قحر شەكاراسى ارقىلى كەلگەن ءاربىر ادامدى شەكارادا مەديسينا قىزمەتكەرلەرى تەكسەرىپ جاتىر. ەگەر ادامدا شاعىم بولماسا، دەنە قىزۋى قالىپتى جاعدايدا، جوتەل مەن تۇماۋ بولماسا، وندا ولار قازاقستاننىڭ باس سانيتارلىق دارىگەرىنىڭ قاۋلىسىنا سايكەس وبسەرۆاسيالىق توسەككە باقىلاۋعا، ەمدەلۋسىز ورنالاستىرىلادى. ەگەر دە كەلگەن ازاماتتاردى تەكسەرۋ كەزىندە ۆيرۋستى ينفەكسيا اۋرۋىنىڭ بەلگىلەرى انىقتالسا، ولاردى بىردەن ينفەكسيالىق اۋرۋحاناعا جاتقىزادى. سونداي-اق ەگەر وسى وبسەرۆاسيالىق عيماراتتاردا كارانتيندەگى ادامداردا اۋرۋ بەلگىلەرى انىقتالسا، ءبىز ولاردى وقشاۋلاپ، كەيىننەن ەمدەۋ ءۇشىن جۇقپالى اۋرۋلار بولىمشەسى مەن بوكستارعا اۋىستىرامىز"، - دەيدى وبلىستىق دەنساۋلىق ساقتاۋ باسقارماسىنىڭ باسشىسى. 

سەمەي جانە وسكەمەن قالالارىندا فتيزيوپۋلمونولوگيالىق اۋرۋحانالاردا 110 ورىندىق توسەك-ورىن دايىندالعان. كەرەكتى جاعدايدا شەمونايحا اۋدانىنداعى ۋبا ساناتورييىندە 250 ورىن، التاي اۋدانىنداعى گرەحوۆو ساناتورييىندە 80 ورىن جانە تارباعاتاي اۋدانى، اقجار اۋىلىنداعى تۋبەركۋلەزگە قارسى ديسپانسەردە 100 توسەكتىك باقىلاۋ اۋرۋحانالارى ورنالاستىرىلادى.