قازاقستان رەسپۋبليكاسى پارلامەنتى سەناتىنىڭ ءتوراعاسى داريعا نازاربايەۆا ەلەكتر ەنەرگەتيكاسى سالاسىنىڭ جۇمىسى مەن حالىقتى ەلەكترمەن ۇزدىكسىز قامتاماسىز ەتۋ ماسەلەلەرى بويىنشا جۇمىس كەزدەسۋ وتكىزدى، دەپ حابارلايدى پارلامەنت سەناتىنىڭ رەسمي سايتىنا سىلتەمە جاساپ.
سەنات ءتوراعاسى كەزدەسۋدىڭ ماڭىزىنا توقتالا كەلىپ، وتكەن جىلدىڭ قاراشا ايىندا نۇر-سۇلتان قالاسىندا ەلەكتر ەنەرگياسى بىرنەشە مارتە ءوشىپ قالعانىن ەسكە سالدى.
«قالانىڭ ءبىر بولىگى ەلەكتر جارىعىنسىز قالدى، ونىڭ سەبەبىن ءبىلۋ ءارى ءتۇسىنۋ ءۇشىن مەملەكەتتىك ۋاكىلەتتى ورگانداردى تىڭداعىمىز كەلەدى. سول جاعالاۋدىڭ كوممۋنيكاسيالارى مەن ينفراقۇرىلىمى جاقىندا سالىنعان، ولاردى كونەردى نەمەسە اپاتتى جاعدايدا دەپ ايتۋعا بولمايدى»، - دەدى ول.
«استانا اەك» باسقارما ءتوراعاسى سەرىك بالقىشيەۆ ءوز بايانداماسىندا تۇتىنۋشىلاردى ەلەكترمەن جابدىقتاۋداعى ۇزاق ۇزىلىستەرگە دۋشار ەتكەن اقاۋلارعا مونيتورينگ ناتيجەلەرى يەسىز جەلىلەر مەن قوسالقى ترانسفورماتورلىق ستانسيالار نەگىزگى سەبەپ ەكەنىن ايتتى. «استانا اەك» باسشىسىنىڭ اقپاراتى بويىنشا، قۇرىلىس كومپانيالارى كوپ پاتەرلى تۇرعىن ءۇي كەشەندەرىن پايدالانۋعا بەرگەننەن كەيىن ءۇي ىشىندەگى ينجەنەرلىك كوممۋنيكاسيالاردى قىزمەت كورسەتەتىن كومپانيالارعا تاپسىرادى.
«سىرتقى ەلەكتر جەلىلەرى يەسىز قالادى، ولارعا ءتيىستى قىزمەت كورسەتىلمەيدى ءارى كۇزەتىلمەيدى، سونىڭ ناتيجەسىندە قوسالقى ستانسيالاردىڭ جابدىقتارى بۇزىلادى ءارى ىستەن شىعادى. قازىرگى ۋاقىتتا سىرتقى ينجەنەرلىك جەلىلەردى مامانداندىرىلعان قىزمەت كورسەتەتىن ۇيىمدارعا بەرۋ ماسەلەسى نورماتيۆتىك-قۇقىقتىق اكتىلەرمەن رەتتەلمەي كەلەدى»، - دەدى ول.
داريعا نازاربايەۆا تالقىلاۋ بارىسىندا يەسىز جاڭا جەلىلەردىڭ پايدا بولۋىنىڭ الدىن الۋ ماسەلەسىنە ەرەكشە نازار اۋداردى. سونداي-اق، كاسىپكەرلىك كودەكستى قاراۋعا اسا مۇقيات ورالۋ كەرەكتىگىن ەسكەرتتى.
«قانداي ماسەلەلەردى قاراستىرساق تا، باقىلاۋدىڭ جوقتىعى پروبلەماسىنا ۇدايى تاپ بولامىز، تيىسىنشە مەملەكەت ساپاعا جاۋاپ بەرە الماي وتىر»، - دەدى نازاربايەۆا.
نازاربايەۆا ءوز كەزەگىندە ەلەكتر ەنەرگەتيكاسى سالاسىن اكىمشىلەندىرۋدەگى ساپانىڭ تومەندىگىنە نازار اۋداردى.
«باقىلاۋ جوق، كاسىپورىن زاڭ مەن نورماتيۆتىك-قۇقىقتىق اكتىلەردى ادال ورىنداۋى ءۇشىن مونيتورينگ جاساۋ كەرەك. رەتتەۋ قۇرامى دا جوق. شىعىندار ءبارىمىزدىڭ قالتامىزدان تولەنەدى، ەسەپ-شوت كەلگەن كەزدە ويلانباستان تولەي سالامىز»، - دەپ اتاپ ءوتتى داريعا نازاربايەۆا.
پىكىر قالدىرۋ