قازاقفيلم مەن رەجيسسەر اقان ساتايەۆ بىر-بىرىمەن «توميريس» ءفيلمى ءۇشىن سوتتاسىپ جاتىر. كينوستۋديا SATAI FILM كومپانياسى مەملەكەتتىك ساتىپ الۋلار تۋرالى كەلىسىمشارتتى بۇزىپ، قارجىلىق ەسەپتى تولىق تاپسىرمادى دەپ ايىپتادى. ال رەجيسسەر كەلىسىمشارتتا قۇجاتتاردىڭ ناقتى ءتىزىمى جاسالماعانىن العا تارتىپ وتىر، دەپ جازادى azattyq-ruhy سايتى.

جاقىندا بۇقارالىق اقپارات قۇرالدارىندا «SATAIFILM» ج ش س قازاقفيلم كينوستۋدياسىنان «توميريس» ءفيلمى ءۇشىن 9 ميلليوننان استام تەڭگە تولەۋىن تالاپ ەتىپ، سوتقا بەرگەنى تۋرالى اقپارات تاراعان ەدى. ولاردىڭ داۋىنا كەلىسىمشارتتا قۇجاتتاردىڭ ناقتى ءتىزىمى جازىلماعانى سەبەپ بولعانى دا ايتىلعان.

قازاقفيلم مەن «SATAIFILM» ج ش س كەلىسىمشارتتى 2019 جىلدىڭ 12 مامىرىندا جاساعان. زاڭ بويىنشا كومپانيا كەلىسىمشارتتارىن بىلتىرعى جىلدىڭ 31 جەلتوقسانىنا دەيىن ورىنداۋى كەرەك بولعان. دەگەنمەن، ەسەپ كوميتەتى جۇرگىزگەن مەملەكەتتىك اۋديتتەن كەيىن ارنايى كوميسسيا قۇرىلىپ، تەحنيكالىق تالاپتاردىڭ ورىندالماعانى انىقتالدى.

«اقان ساتايەۆتىڭ ستۋدياسى مەملەكەتتىك ساتىپ الۋ تۋرالى كەلىسىمدى ورىنداۋ بويىنشا قارجىلىق ەسەپتى تولىق تاپسىرماعان. ولار ءۇش كۇن ىشىندە بۇل ولقىلىقتى جويۋى كەرەك ەدى. دەگەنمەن، SATAIFILM كومپانياسى قوسىمشا قۇجاتتاردى (شىعىنداردى دالەلدەيتىن كەلىسىمشارت، اكت، شوت-فاكتۋرا) تاپسىرمادى»  دەدى ءقازاقفيلمنىڭ باسپا ءسوز قىزمەتى.

ولاردىڭ حابارلاۋىنشا، كينوستۋديا دا اقان ساتايەۆتىڭ كومپانياسىن سوتقا بەرگەن.

– بەلگىلى ءبىر ارەكەت الگوريتمى بار جانە ءبىز ونى انىق ۇستانامىز. رەجيسسەردىڭ ەڭبەگى، ءفيلمنىڭ ساپاسى، وسى ماسەلەدە الىنعان مەملەكەتتىك قارجىلاندىرۋ مولشەرى ماڭىزدى ەمەس. زاڭدى باقىلايتىن شارتتىڭ مەرزىمى مەن تالاپتارى ساقتالعانى ماڭىزدى. رەسەي كينويندۋسترياسىندا وسىنداي جاعدايلاردىڭ ورىن الاتىنىن ايتا كەتكەن ءجون: بەلگىلى ءبىر كومپانيالار مەملەكەتتەن فيلمدەر تۇسىرۋگە اقشا الىپ، كەيىن قاجەتتى تۇردە ەسەپ بەرە المايتىن جاعدايلار ورىن الادى، بۇل سوت تالقىلاۋىنا اكەپ سوعادى، – دەدى «قازاقفيلم» كينوستۋدياسىنىڭ ەكونوميكا جانە جوسپارلاۋ ءبولىمىنىڭ باسشىسى ۆيكتوريا چەرنوۆا.

ەسكە سالا كەتەيىك، رەجيسسەر اقان ساتايەۆتىڭ «توميريس» ءفيلمى 27-قىركۇيەكتە پروكاتقا شىققان بولاتىن. ءبىزدىڭ زامانىمىزعا دەيىنگى VI عاسىردا بولعان وقيعانى سۋرەتتەيتىن ءفيلمدى تۇسىرۋگە ق ر مادەنيەت جانە سپورت مينيسترلىگى تاپسىرىس بەرگەن ەدى.