رەسپۋبليكالىق "جاس الاش" گازەتىنىڭ باس رەداكتورى ينگا يمانباي قىزمەتىنەن كەتتى. بۇل تۋرالى يمانبايدىڭ ءوزى Facebook پاراقشاسىندا حابارلادى. 

يمانبايدىڭ جازۋىنشا، گازەت باسشىلىعىنان كەتۋىنە وپپوزيسيالىق ساياساتكەر جانبولات مامايدىڭ ايەلى بولعانى سەبەپ. 

– وزدەرىڭىزگە بەلگىلى، وسىدان ءبىر جارىم اي بۇرىن مەن "جاس الاش" گازەتىنىڭ باس رەداكتورى بولىپ تاعايىندالدىم. ءبىز بىردەن رەداكسيالىق ساياساتتى وزگەرتىپ، نازاربايەۆ پەن ونىڭ وتباسى تۋرالى وتكىر ماتەريالداردى باسىپ شىعارا باستادىق. وسىعان جانە جانبولات مامايدىڭ جۇبايى ەكەندىگىمە بايلانىستى بيلىك تاراپىنان  گازەت قۇرىلتايشىسى التىنبەك سارسەنباي ۇلىنىڭ وتباسىنا قىسىم جاسالا باستادى.  بەيسەنبى كۇنى مەن التىنبەك اعانىڭ جۇبايى سالتانات اتۋشيەۆامەن جانە نەمەرە ءىنىسى نۇرلان سارسەنبايمەن سويلەستىم. ولار ماعان سارسەنبايەۆتار وتباسىنىڭ جاقىن تۋىسىنا قاتىستى قىلمىستىق ءىس قوزعالىپ، ەگەر مەنى باس رەداكتور قىزمەتىنەن كەتىرمەسە، ونىڭ قامالاتىنىن ايتتى.  اتۋشيەۆانىڭ الدىندا ەكى تاڭداۋ تۇردى: مەنى جۇمىستان بوساتۋ نەمەسە تۋىسىنىڭ تۇتقىندالعانىن كۇتۋ. بەيسەنبى كۇنى ولارعا ءبىر ۆەدومستۆونىڭ گەنەرالدارى كەلىپ، مەنى سول كۇنى جۇمىستان بوساتپاعان جاعدايدا تۋىسىن تۇتقىندايتىنىن ايتىپ قورقىتتى. ارينە، سالتانات اتۋشيەۆا تۋىسىنىڭ ەركىندىگىن تاڭدادى. گەنەرالدار ولارعا ينگا يمانباي مامايدىڭ جۇبايى بولعاندىقتان، گازەتتىڭ رەداكتورى بولماۋى كەرەك دەگەن تالاپ قويعان. جانبولات گازەتكە قاتىسى جوق دەگەن بارلىق دالەلدەر قابىلدانبادى. تالاپ: مەنى جۇمىستان شىعارۋ. جانە مىندەتتى تۇردە 22 اقپان الدىندا، – دەپ جازدى ول. 

ينگا يمانباي ءوزىن رەداكتورلىق قىزمەتتەن بوساتقان گازەت قۇرىلتايشىلارىنا وكپەسى جوق ەكەنىن جەتكىزدى.

– سالتانات اتۋشيەۆاعا ەشقانداي ايىپ تاعا المايمىن. ول مەنى گازەتتە باسشىلىق قىزمەتتە قالدىرۋدىڭ بارلىق امالدارىن جاسادى. ءبىراق بيلىك وعان كۇشتى قىسىم كورسەتتى جانە ونى وسىلاي جاساۋعا ءماجبۇر ەتتى. ەندى "جاس الاش" بيلىكتىڭ باقىلاۋىنا تولىعىمەن كوشەتىنىن ايتا كەتۋ كەرەك، – دەدى يمانباي.

ينگا يمانباي – وپپوزياداعى بەلسەندى، "دەموكراتيالىق پارتيا" باستاماشىل توبىنىڭ جەتەكشىسى جانبولات مامايدىڭ جارى. ول ءبىر اي بۇرىن عانا "جاس الاش" گازەتىنە باس رەداكتور بولىپ تاعايىندالعان ەدى. 

بۇگىن "جاس الاش" گازەتىنە جاڭا باس رەداكتور رەتىندە قايرات ماترەكوۆتىڭ تاعايىندالعانى بەلگىلى بولدى. مەترەكوۆ بۇعان دەيىن ءبىرقاتار مەكەمەلەردىڭ باسپا ءسوز قىزمەتىندە، "قازتاگ" اقپارات اگەنتتىگىندە، 365info.kz سايتتىندا جۇمىس ىستەگەن.

1921 جىلدىڭ ناۋرىز ايىنان شىعا باستاعان "جاس الاش" گازەتى - قوعامدىق، ساياسي-الەۋمەتتىك ماسەلەردى قوزعايتىن اپتاسىنا ەكى رەت شىعاتىن رەسپۋبليكالىق باسىلىم. گازەت قازاقستانداعى ساناۋلى تاۋەلسىز باسىلىمداردىڭ ءبىرى سانالادى. كەيبىر اقپارات كوزدەرىنىڭ دەرەگىنە قاراعاندا، ءقازىر گازەت تولىعىمەن 2006 جىلى قاستاندىقپەن ولتىرىلگەن ساياساتكەر التىنبەك سارسەنباي ۇلىنىڭ وتباسىنا تيەسىلى.