قازاقستاننىڭ باس سانيتارلىق دارىگەرى جانداربەك بەكشين زايسانداعى احۋالعا بايلانىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى قازاقپارات دەرەگىنە سۇيەنىپ.

جانداربەك بەكشين اۋەلى وڭىردە كوروناۆيرۋس جۇقتىرماق تۇگىلى ونداي كۇدىككە ىلىنگەن ەشبىر ادامنىڭ اۋرۋحاناعا جەتكىزىلمەگەنىن مالىمدەدى. ءارى شەكاراداعى باقىلاۋ قىزمەتىنىڭ دە جوعارى دەڭگەيدە ۇيىمداستىرىلىپ وتىرعانىن جەتكىزدى. 

«وتكەن اپتادا مەن قحر-مەن شەكارانى ارالاپ، اۆتوكولىكتىك، تەمىر جول وتكەلدەرىن قاراپ شىقتىم. ول جەردە ناقتى باقىلاۋ بار. باقىلاۋدى كۇشەيتىپ، ءبىز سانيتارلىق 20 دارىگەردى قوسىمشا قوستىق. سوندىقتان تاۋلىك بويى شەكارامىز تەكسەرۋدە. بىزدە قحر-دان اۆتوبۋسپەن، تەمىر جولمەن، رەسمي تۇردە اۋە جولىمەن ءقازىر كەلىپ جاتقان جولاۋشىلار جوق. وسىعان قاراماستان قايتالاپ ايتقان ەلدەردى ناقتى باقىلاۋعا الدىق. باسقا ەلدەردە كوروناۆيرۋس ءورشىپ بارادى. ول ەلدەردەن كەلۋشىلەردىڭ كەلۋىنە كەدەرگى قويىپ جاتىرمىز. ءاربىر ۇشاق باقىلاۋدا»، – دەدى ول.

وسى رەتتە، اتالعان وڭىردە جۇمىس ىستەيتىن جۇڭگو ازاماتتارىنا دا بايلانىستى سۇراق قويىلدى. ءوز كەزەگىندە باس سانيتارلىق دارىگەر كەيىن كەلگەن 4 ادامنىڭ بارىن راستاي وتىرىپ:

«ول ازاماتتار وتكەن جىلدان بەرى جۇمىس ىستەپ كەلەدى. البەتتە ولار ءوز لاگەرىندە، ياعني تۇرعىلىقتى جەردە ەمەس، قالا سىرتىندا جۇمىس ىستەيدى. ەگەر ولار قايتىپ كەلسە، ولار ءوز جاقتارىنداعى لاگەردە 14 كۇندىك كارانتيننەن وتەدى. كەيىن كەلگەن 4 ادام بار. ولاردىڭ كارانتيندەرى بۇگىن اياقتالادى. ەشقانداي ارىز-شاعىم جوق»، – دەپ ءقازىر جاعدايدىڭ تولىق باقىلاۋدا ەكەنىن اتاپ ءوتتى. 

ەسكە سالا كەتەيىك، 19 اقپاندا شىعىس قازاقستان وبلىسىنىڭ زايسان اۋدانىنا قاراستى سارىتەرەك جانە اينابۇلاق اۋىلىنىڭ تۇرعىندارى اۋىل امبۋلاتورياسىنىڭ الدىنا جينالىپ، نارازىلىق ءبىلدىردى. ولار الەۋمەتتىك جەلىلەردە تاراعان «زايسان اۋدانىندا ءبىر توپ ادام كوروناۆيرۋس جۇقتىردى. قىتايمەن شەكارادا ينفەكسيا جۇقتىرعان ادامداردى اۋىل امبۋلاتورياسىندا ەمدەۋ ءۇشىن الىپ كەلەدى» دەگەن اقپاراتتى ەستىپ جينالعان.