قوعام بەلسەندىسى دۋلات ءاعادىلدىڭ نۇر-سۇلتان قالاسىنداعى تەرگەۋ يزولياتورىندا قايتىس بولۋىنا بايلانىستى ىشكى مينيسترلىگىنىڭ الدىنا جينالعان ەلۋگە جۋىق بەلسەندىنى پوليسيا كۇشپەن تاراتا باستادى. ولاردى ارنايى اۆتوبۋسقا وتىرعىزۋعا كىرىستى. ولار دۋلات ءاعادىلدىڭ قازاسى جايلى تولىق اقپارات بەرۋدى تالاپ ەتكەن6، دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. 

جينالعاندار الدىنا باستاپقىدا نۇر-سۇلتان قالالىق پوليسيا دەپارتامەنتىنىڭ باستىعى نۇرجان سادەنوۆ شىعىپ، دۋلات ءاعادىلدىڭ قازاسى جايلى قىسقاشا اقپارات بەرگەن. ول وسىعان دەيىن تارالعان رەسمي اقپاراتتى راستاپ، "تەرگەۋ يزولياتورىندا دۋلات ءاعادىل جانىندا ءتورت ادام وتىرعانىن، ولاردىڭ دۋلات اعادىلگە كۇش كورسەتىلمەگەنىنە كۋالىك بەرگەنىن، جۇرەك تالماسىنان قايتىس بولعانىن" ايتقان.

شامامەن ءبىر ساعاتتان كەيىن پوليسيا كەلىپ، جيىندى كۇشپەن تاراتۋعا كىرىستى.

بەلسەندىلەردىڭ كەيبىرى دۋلات ءاعادىلدىڭ جۇرەك تالماسىنان قايتىس بولعانىنا سەنبەيتىنىن بىلدىرگەن ەدى.

بەلسەندىلەر دۋلات ءاعادىلدى "ادىلەتسىزدىككە، قازاقستانداعى قازىرگى ساياسي رەجيمگە قارسى شىعىپ جۇرگەن ادام" دەپ سيپاتتادى جانە "ونىڭ 2019 جىلى كوپ بالالى ايەلدەر جيىنىنا بارىپ كومەكتەسكەنىن" ەسكە العان بولاتىن. بەلسەندىلەردى اكەتكەننەن كەيىن ىشكى ىستەر مينيسترلىگىنىڭ الدىندا ءبىر توپ كوپ بالالى ايەلدەر قالدى. ولاردى پوليسيا باقىلاپ تۇر.

نۇر-سۇلتان قالاسىنىڭ توڭىرەگىندەگى اۋىلداردىڭ بىرىندە تۇراتىن بەلسەندى، التى بالاسى بار دۋلات ءاعادىلدىڭ تەرگەۋ يزولياتورىندا قايتىس بولعانى تۋرالى اقپارات بۇگىن شىققان.

نۇر-سۇلتان قالالىق پوليسيا دەپارتامەنتى "تەرگەۋ يزولياتورىنىڭ كامەراسىندا ونان وزگە ءتورت ادام بولدى، ولار دۋلات اعادىلگە كۇش قولدانىلماعانى جايلى كۋالىك بەردى. مەديسينالىق كۋالىك ونىڭ قاماۋعا الىنعان ساتتە الكوگولدى ىشىمدىك ىشكەنىن، ماس ەكەنىن كورسەتتى. جەدەل جاردەم بريگاداسى كەلدى. قايتىس بولۋىنا "جۇرەك تالماسى سەبەپ بولعان". دەنەسىندە قانداي دا ءبىر جاراقاتتار جوق. سوتقا دەيىنگى تەرگەۋ جۇمىستارى باستالدى، - دەگەن اقپارات تاراتقان.

پوليسيا دەپارتامەنتى باسپا ءسوز قىزمەتىنىڭ جازۋىنشا "بيىل قاڭتار ايىندا دۋلات اعادىلگە ايىپ تاعىلىپ، "ەشقايدا كەتپەۋ" تۋرالى شارا قولدانىلعان. تەرگەۋگە كەلمەگەنىنە بايلانىستى سوت شەشىمىمەن 24 اقپاندا قاماۋعا الىنعان".

دۋلات ءاعادىل – الەۋمەتتىك پروبلەمالار جانە ازاماتتىق قۇقىقتى ساقتاۋ ماسەلەسىن كوتەرىپ جۇرگەن بەلسەندى. بيىل تامىز ايىنان بەرى بىرنەشە اكىمشىلىك جازاعا تارتىلىپ، كەم دەگەندە 60 تاۋلىك قاماۋدا وتىرعان.

ول 2019 جىلدىڭ 16 جەلتوقسانىندا رۇقسات ەتىلمەگەن اكسياعا قاتىستى دەپ ايىپتالىپ، 10 تاۋلىككە قامالعان ەدى. قاراشانىڭ ورتاسىندا اكىمشىلىك قاماۋدا وتىرعان سەلينوگراد اۋداندىق تەرگەۋ يزولياتورىنان قاشىپ شىعىپ، ول ارەكەتىن "زاڭسىز قۋدالاۋعا قارسىلىعىم" دەپ تۇسىندىرگەن. پوليسيا ەكى كۇن بويى ىزدەگەن بەلسەندى 15 قاراشادا ءوزى باس پروكۋراتۋرا الدىنا كەلگەن. كەيىن ول "سوت قاۋلىسىن ورىنداماعانى ءۇشىن" تاعى 6 تاۋلىككە سوتتالعان.