ە. تۇرعىمبايەۆ اتاپ وتكەندەي، ق ر ءىىم مينيسترلىك ورتالىق جانە جەرگىلىكتى اتقارۋشى ورگاندارمەن بىرلەسىپ كوكتەمگى سۋ تاسقىنى كەزەڭىندە توتەنشە جاعدايلاردىڭ تۋىنداۋ ءقاۋپىن ازايتۋ بويىنشا ءىس-شارالار كەشەنىن جۇرگىزۋدە.

«قازگيدرومەت» رمك-نىڭ الدىن الا بولجام دەرەكتەرى بويىنشا ەلدەگى قار قورى مەن وزەندەر باسسەيندەرىندەگى ىلعال قورىنىڭ كولەمى نورمادان ايتارلىقتاي جوعارى. قار باسۋ پروسەسى جالعاسۋدا. نۇر-سۇلتان قالاسىندا، شىعىس قازاقستان جانە سولتۇستىك قازاقستان وبلىستارىندا جاعدايدىڭ قيىنداۋى وتە ىقتيمال.

– ءقازىر ەلىمىزدە 609 ەلدى مەكەندى جانە 675 اۆتوموبيل جولىن جانە 259 تەمىر جولدى سۋ باسۋ ءقاۋپى بار، – دەدى مينيستر.

سۋ باسۋدى بولدىرماۋ ماقساتىندا جەرگىلىكتى اتقارۋشى ورگاندار ەلدى مەكەندەردەن 8،8 ملن تەكشە مەتردەن اسا قار شىعاردى، ججم (ءقازىر – 13،5 مىڭ توننا)، ينەرتتى ماتەريالدار (152،6 مىڭ توننا)، قۇم سالىنعان قاپتار (840 مىڭ) مەن جارىلعىشتار (47 توننا) قورى قالىپتاستىرىلدى. 

توتەنشە رەزەرۆتەردە 34 ملرد تەڭگە كوزدەلگەن.

ىقتيمال سۋ باسۋ جاعدايىنا ەۆاكۋاسيالاناتىن حالىقتى قابىلدايتىن 1700 بەكەت ازىرلەندى، مارشرۋتتار جاڭارتىلدى، قاجەتتى كولىك ءبولىندى. تىرشىلىكتى قامتاماسىز ەتۋ ءۇشىن اكىمدىكتەر قاجەتتى قۇرالداردى (پالاتكالاردى، توسەكتەردى)، ازىق-تۇلىك پەن اۋىز سۋ قورىن دايىندادى.

سۋ تاسقىنى جاعدايىنىڭ ىقتيمال قيىنداۋىنا جەدەل دەن قويۋ ماقساتىندا ىشكى ىستەر ورگاندارىنان جالپى سانى 9 مىڭ ادام جانە 1730 بىرلىك تەحنيكادان ارنايى كۇشتەر مەن قۇرالدار توپتامالارى قۇرىلدى.

بۇگىننەن باستاپ (بيىلعى 25-26 اقپاندا) نۇر-سۇلتان قالاسىنىڭ باسقارۋ شتابى «كوكتەم-2020» رەسپۋبليكالىق كوماندالىق-شتابتىق وقۋ-جاتتىعۋ وتكىزە باستادى، ونىڭ بارىسىندا جۇمىلدىرىلعان كۇشتەردىڭ ازىرلىگى تەكسەرىلەتىن بولادى.

سۋ تاسقىنى قاتەرلەرىنىڭ الدىن الۋ جانە ولاردى جويۋ جونىندەگى 2017-2020 جىلدارعا ارنالعان جول كارتاسى ىسكە اسىرىلۋدا، بۇل وتكەن 3 جىل ىشىندە 437 ەلدى مەكەندە سۋ باسۋ ءقاۋپىن بولدىرماۋعا جانە 287 ەلدى مەكەندە سۋ باسۋ قاۋىپ-قاتەرىن بارىنشا ازايتۋعا مۇمكىندىك بەردى.

ماتەريالدىق-تەحنيكالىق جاراقتاۋ بويىنشا جول كارتاسى شەڭبەرىندە 900 بىرلىك تەحنيكا، ونىڭ ىشىندە موتوپومپالار، ءجۇزۋ قۇرالدارى، جول تالعامايتىن قۇرالدار ساتىپ الىندى.