25 اقپاندا سەمەي پوليسياسى نۇر-سۇلتان قالالىق تەرگەۋ يزولياتورىندا جۇمباق جاعدايدا كوز جۇمعان بەلسەندى دۋلات ءاعادىلدىڭ جەرلەۋ راسىمىنە بارماق بولعان ەكى بەلسەندىنى تەمىر جول ستانسياسىندا ۇستادى دەپ حابارلايدى Qamshy.kz اقپارات اگەنتتىگى اzattyq دەرەگىن نەگىزگە الىپ.

جسدپ پارتياسى سەمەي بولىمشەسىنىڭ ءتوراعاسى روللان ماشپييەۆتىڭ ايتۋىنشا، سەيسەنبى كۇندىز بەلسەندى كەنجەبەك سۇلتانبەكوۆ پەن ەرلان كەڭەشبايەۆتىڭ ۇيىنە پوليسيا شاقىرتۋ قاعازىن جىبەرگەن (كەڭەشبايەۆ ۇيىندە جوق بولعان، سۇلتانبەكوۆ قازاقشا شاقىرتۋ قاعازىن تالاپ ەتكەن). ال كەشكە جاقىن اقمولا وبلىسىنا جول ءجۇرۋ ءۇشىن تەمىر جول ۆوكزالىنا بارعان كەزدە ەكەۋىن ۇستاپ اكەتكەن. پوليسيا بۇعان قوسا، ولاردى شىعارىپ سالماق بولعان بەلسەندىلەردىڭ ءبىرى يسا ءجۇماعازيندى دە باسقارماعا جەتكىزگەن.

– ەرلان كەڭەشبايەۆ ءسال ەرتەرەك ۆوكزالعا بارعان ەدى. ءبىز كەنجەبەك ءبارىمىز سوسىن باردىق. ۆوكزالعا كەلىپ، ماشينادان تۇسكەنىمىز سول ەدى، پوليسيا قىزمەتكەرلەرى جۇگىرىپ كەلىپ، كەنجەبەكتى توقتاتپاقشى بولدى. بىردەن "جۇرىڭىزدەر" دەپ اكەتە باستادى. نە قۇجاتتارىن كورسەتپەدى، جۇلقىلاپ ۇستاي باستادى. باستاپقىدا فورماسىز ادامدار ۇستادى. كەيىننەن فورما كيگەندەرى كەلىپ، اكەتە باستادى. زاڭ تالاپتارىن ايتتىق. وعان دا قاراعان جوق. بۇل جەردە وننان استام ادام بولدى عوي دەيمىن. ءبارىمىزدى يتەرىپ، پوليسيا كولىگىنە وتىرعىزىپ الىپ كەتتى، – دەيدى روللان ماشپييەۆ.

ونىڭ ايتۋىنشا، پوليسيا باسقارماسىنا ۇشەۋىن دە اپارعان. وندا سۇلتانبەكوۆتىڭ قان قىسىمى كوتەرىلىپ، دارىگەرلەر شاقىرىلعان. بۇعان قوسا، ۇستاۋ كەزىندە كەڭەشبايەۆ پەن ءجۇماعازيننىڭ "ومارتقاسى مەن كەۋدە تۇسى اۋىرىپ قالعاندىقتان" جەدەل جاردەم كولىگى شاقىرتىلعان. پوليسيا باسقارماسى ولاردان سۇراق-جاۋاپ الىپ ۇلگەرمەگەندىكتەن "تەرگەۋدى" 26 اقپان كەشكى 18:30-عا تاعايىنداعان.

– ۇشەۋىن دە Facebook-تاعى قدت جايلى جاريالانعان جازباعا قاتىستى شاقىرتقان، – دەدى روللان ماشپييەۆ.

ماسەلە تۋرالى سەمەي قالالىق پوليسيا باسقارماسى ازىرگە تۇسىنىك بەرمەدى.

ءدال وسى كۇنى وسكەمەندە دە پوليسيا ءاعادىلدىڭ جانازاسىنا بارماق بولعان كەمىندە ەكى تۇرعىندى ۇستاعان. وسكەمەندىك قۇقىق قورعاۋشى ينديرا كاكىموۆا فەيسبۋكتاعى پاراقشاسىندا بەلسەندىلەر باقىتبەك قاپايەۆ، ايدار جانە ايدىن بايساعاتوۆتاردى 25 اقپاندا جەرگىلىكتى پوليسياعا اپارىپ، بىرنەشە ساعاتتان سوڭ بوساتقانىن حابارلادى. ولار 26 اقپاندا جەرگىلىكتى پروكۋراتۋراعا پوليسيانىڭ زاڭسىز ارەكەتىنە شاعىمدانعان. بەلسەندىلەردىڭ وزدەرىنەن پىكىر الۋدىڭ ءساتى تۇسپەدى.

ءدال وسىعان ۇقساس وقيعا شىمكەنتتە دە بولدى. مۇندا تۇنگى ساعات 22:30 شاماسىندا پوليسيا بەلسەندىلەر مارات قاسىمبەكوۆ، دۋلات پرالييەۆ پەن مارات دۇيسەنبييەۆتى تۇركىستان وبلىسى تۇلكىباس اۋدانىنىڭ اۋماعىندا ۇستاعان.

بەلسەندى مارات قاسىمبەكوۆتىڭ ايتۋىنشا، نۇر-سۇلتانعا مارات دۇيسەنبييەۆتىڭ كولىگىمەن جولعا شىققان. شىمكەنتتەن شامامەن ءجۇز شاقىرىم جۇرگەننەن سوڭ تۇركىستان وبلىستىق پوليسيا دەپارتامەنتىنىڭ جول-پوترۋلدىك پوليسياسى توقتاتىپ، «جىلدامدىقتى اسىردىڭدار» دەپ ءۋاج ايتقانىمەن ايىپپۇل سالماعان. جارتى ساعاتتان سوڭ شىمكەنت قالالىق پوليسيا دەپارتامەنتىنىڭ قىزمەتكەرلەرى كەلىپ، ولاردى شىمكەنتتەگى قاراتاۋ اۋداندىق پوليسيا بولىمىنە جەتكىزگەن.

– قاراتاۋ اۋداندىق پوليسيا بولىمىنەن تۇنگى ساعات ۇشتە شىقتىق. بۇل – بەلسەندىلەردى نۇر-سۇلتانعا دۋلات ءاعادىلدىڭ جانازاسىنا جىبەرمەۋدىڭ امالى. پوليسيا قازاقستان تەرريتورياسىندا ەمىن-ەركىن ءجۇرىپ-تۇرۋ تۋرالى قۇقىعىمىزدى بۇزىپ وتىر. دۋلات اعادىلمەن تانىسپىن. ءبىر داستارحاننان ءدام تاتقان ەدىك. قالتامىزدا قارۋ جوق، نيەتىمىز ءتۇزۋ. ءوز وي-پىكىرىمىزدى ايتىپ جۇرگەنىمىز ءۇشىن جانازاعا جىبەرمەي وتىر، – دەيدى قاسىمبەكوۆ.

ءاعادىلدىڭ قازاسىنان سوڭ نۇر-سۇلتاندا، الماتىدا، شىمكەنتتە، اقتوبەدە بەلسەندىلەر پوليسيا دەپارتامەنتىنە جينالىپ، ءاعادىلدىڭ جۇرەك تالماسىنان قازا بولدى دەگەنگە كۇمان كەلتىردى. ولار بۇل جاعدايعا قازىرگى بيلىك جاۋاپتى دەپ، قاۋىپسىزدىك كەڭەسىنىڭ باسشىسى نۇرcۇلتان نازاربايەۆتىڭ جانە سەنات سپيكەرى داريعا نازاربايەۆانىڭ وتستاۆكاعا كەتۋىن جانە ۇكىمەتتىڭ تاراۋىن تالاپ ەتتى.