الماتىدا قوعام بەلسەندىسى دۋلات اعادىلمەن قوشتاسۋ جيىنى ميتينگىگە ۇلاستى.

60 شاقتى ادام قالالىق پروكۋراتۋرا عيماراتىنا كەلىپ، قالالىق پروكۋروردىڭ شىعۋىن، سوڭعى كۇندەرى وتكەن ميتينگىلەر كەزىندە ۇستالعان 18 ازاماتتى بوساتۋىن تالاپ ەتتى.

ازاماتتار الدىنا الماتى قالاسىنىڭ پروكۋرورى بەرىك جۇيرىكتايەۆتىڭ ورىنباسارى شىعىپ، ازاماتتار سوت شەشىمىمەن قامالعانىن ايتىپ، كەلىسپەگەن جاعدايدا جوعارعى سوتقا شاعىمدانۋعا بولاتىنىن ءمالىم ەتتى.

جينالعان ازاماتتار الماتى پروكۋرورى بەرىك جۇيرىكتايەۆتىڭ شىعۋىن تالاپ ەتىپ، "حالىقتىڭ شىدامى شەكسىز ەمەس، سوندىقتان قامالعان ازاماتتاردى بوساتىڭىزدار. ءبىر ادامدى ءولتىرىپ ءبىزدى قورقىتا المايسىزدار. ءبىز قورىقپايمىز. "بوستاندىق"، زاڭ جوق" دەپ ۇرانداۋدا.

پروكۋراتۋرا وكىلى ميتينگىنىڭ زاڭسىز ەكەنىن ءمالىم ەتىپ، جينالعانداردىڭ تاراۋىن سۇرادى.

ءوزىن اسىنبەك قارايوۆ دەپ تانىستىرعان ازامات پروكۋراتۋرا وكىلىنىڭ ءسوزى پروۆاكاسيا ەكەنىن، بۇل ەشقانداي ميتينگ ەمەس، پروكۋراتۋراعا ارىز-شاعىمدى ايتۋ ەكەنىن جەتكىزدى.

جينالعاندار قالا پروكۋرورى شىقپاعان سوڭ الماتى قالا اكىمدىگى عيماراتىنىڭ الدىنا كەلىپ، اكىم باقىتجان ساعىنتايەۆتىڭ شىعۋىن تالاپ ەتۋدە.

اكىمدىك وكىلى ازاماتتارعا تالاپ-ارىزدارىن وزىنە ايتۋىن، ساعىنتايەۆتىڭ ورنىندا ەمەس ەكەنىن ايتتى. ءبىراق ازاماتتار وعان كەلىسپەدى. بەلسەندى اسىنبەك قارايوۆ "ءبىز بۇلىكشى ەمەسپىز. قۋعىن بولماسىن، كىسى ءولىمى بولماسىن" دەگەن تالابىمىزدى قالا اكىمىنە كوزبە-كوز ايتقىمىز كەلەدى. سودان كەيىن تارايمىز" دەدى.

الايدا قالا اكىمى قاراسىن كورسەتپەدى. 60 شاقتى ادام بىرنەشە ساعات كۇتىپ، سوڭىندا قوعام بەلسەندىسى دۋلات اعادىلگە، تاۋەلسىزدىك ءۇشىن قۇربان بولعان جەلتوقسانشىلارعا ارناپ قۇران وقىدى.

ارتىنشا بەيبىت تۇردە تاراي باستادى.