قىرعىزستان جوعارعى كەڭەسىنىڭ دەپۋتاتى يرينا كارامۋشكينا ەكس-پرەزيدەنت المازبەك اتامبايەۆتىڭ ورنىنا تۇرمەگە بارىپ، جازانى وتەۋگە دايىن ەكەنىن ايتتى. بۇل تۋرالى Vesti.kg حابارلادى.

دەپۋتات اتامبايەۆتىڭ دەنساۋلىعى اۋىر ەكەنىن ەسكە سالىپ، ونى ءۇي قاماۋىنا بوساتۋدى سۇرادى.

– مەن قازىرگى پرەزيدەنتكە سانالى تۇردە قارسىمىن. ەگەر بۇرىنعى پرەزيدەنتتى مازاق ەتۋدى جالعاستىرۋ ءالى دە ماڭىزدى بولسا، ونى الماستىرىڭىز: اتامبايەۆ بوساتىلادى، ال ولار مەنى ونىڭ ورنىنا قاماۋدا ۇستايدى. مەن تۇرمەگە بارۋعا دايىنمىن. ونى قۇتقارۋىم كەرەك، – دەدى كارامۋشكينا.

ونىڭ ايتۋىنشا، اتامبايەۆ پەن ونىڭ جاقتاستارىنا قارسى سوت ءىسى كەيىنگە قالدىرىلعان.

سونىمەن قاتار، دەپۋتات بۇرىنعى مەملەكەت باسشىسىنىڭ دەنساۋلىعىنا بايلانىستى دارىگەرلەر كەڭەسىن قۇرۋدى تالاپ ەتتى.

ەسكە سالا كەتسەك، المازبەك اتامبايەۆقا سىبايلاس جەمقورلىق، قۇقىق قورعاۋ ورگاندارىنا قارسى زورلىق-زومبىلىق، كىسى ءولتىرۋ، بارىمتا جاساۋ جانە تارتىپسىزدىك بويىنشا ايىپ تاعىلىپ، قاماۋعا الىنعان.