ەلباسىنىڭ تاپسىرماسى بويىنشا باۋىرجان بايبەك ايماقتاردى ارالاۋدى جالعاستىرۋدا. قىزىلوردا وبلىسىنا جۇمىس ساپارى كەزىندە ول شيەلى جانە جاڭاقورعان اۋداندارىنىڭ تۇرعىندارىمەن كەزدەستى.
ءوڭىردىڭ اۋىل شارۋاشىلىعىن نەگىزىنەن كۇرىش ءوسىرۋ سالاسى قۇرايدى. شيەلى اۋىلىندا «Nur Otan» باسشىلىعىمەن كەزدەسۋدە شارۋا قوجالىقتارىنىڭ جەتەكشىلەرى وسى سالانى سۋبسيديالاۋ، ونى ءارتاراپتاندىرۋ جانە سۋارمالى جەر كولەمىن ۇلعايتۋ ماسەلەلەرىن كوتەردى. پارتيا ءتوراعاسىنىڭ ءبىرىنشى ورىنباسارى اتالعان ماسەلەلەردىڭ شەشىمى ازىرلەنىپ جاتقان وسى اۋدانداردى دامىتۋدىڭ 5 جىلدىق باعدارلامالارىندا كورىنىس تاباتىنىن اتاپ ءوتتى.
«تۇرعىندار ءبىرىنشى كەزەكتە 16 مىڭ گەكتاردان استام كۇرىش القابىن سۋارۋعا پايدالانىپ وتىرعان ايتەك ستراتەگيالىق گيدروتورابىن جاڭعىرتۋ جايىن العا تارتتى. سالالىق مينيسترلىكتىڭ سۋ رەسۋرستارى كوميتەتى باسشىلىعىنىڭ ايتۋىنشا، بيىل جوبا-سمەتالىق قۇجاتتاما ازىرلەنگەننەن كەيىن گيدروتوراپقا جوندەۋ جۇمىستارىن باستاۋ جوسپارلانۋدا. وسى جۇمىستاردىڭ ورىندالۋ قارقىنىن اۋىل تۇرعىندارىمەن بىرگە «Nur Otan» پارتياسى باقىلايتىن بولادى»، - دەپ جازدى ءوز Twitter پاراقشاسىندا باۋىرجان بايبەك.
وڭىرگە جۇمىس ساپارى بارىسىندا پارتيا ءتوراعاسىنىڭ ءبىرىنشى ورىنباسارى جاڭاقورعان اۋدانى بىرلىك اۋىلىنىڭ تۇرعىندارىمەن كەزدەستى. ورتالىقتاندىرىلعان گازبەن قامتۋدىڭ جوقتىعى 2،7 مىڭعا جۋىق ادام ءومىر ءسۇرىپ جاتقان ەلدىمەكەننىڭ – نەگىزگى پروبلەماسى.
«Nur Otan» پارتياسى ەلباسىنىڭ وڭىرلەردەگى تۇرعىنداردىڭ ءومىر ءسۇرۋ ساپاسىن جاقسارتۋ جونىندەگى تاپسىرمالارىنىڭ ورىندالۋىنا مونيتورينگ جۇرگىزۋدە. وتكەن جىلى پارتيا سەزىندە نۇرسۇلتان نازاربايەۆ «قۇتتى مەكەن» پارتيالىق جوباسىنا باستاماشى بولىپ، الداعى بىرنەشە جىلدا 1 ملن.-نان استام قازاقستاندىقتاردى گازبەن قامتۋ جونىندە تاپسىرما بەردى. جەرگىلىكتى بيلىكتىڭ مالىمەتىنە جۇگىنسەك، 400-دەن استام تۇرعىن ءۇيدى گازبەن قامتۋ ءۇشىن جوبالىق-زەرتتەۋ جۇمىستارى جۇرگىزىلىپ، جوبالىق سمەتالىق قۇجاتتاما ازىرلەۋگە قارجى ءبولىنىپتى. اۋىلدى 2021 جىلى گازبەن قامتاماسىز ەتۋ كوزدەلىپ وتىر»، - دەدى ول.
تۇرعىندار ءوز كەزەگىندە تاعى ءبىر الەۋمەتتىك ماسەلە – اۋىلداعى جالعىز بالاباقشادا ورىن جەتىسپەۋ ماسەلەسىن كوتەردى. 1974 جىلى سالىنعان «قىزعالداق» مەكتەپكە دەيىنگى مەكەمەسى 65 ورىنعا عانا ەسەپتەلگەن. ال، كەزەكتە 115 بالا تۇر. اۋدان اكىمىنىڭ ايتۋىنشا، كوكتەمدە مەملەكەتتىك-جەكە سەرىكتەستىك شەڭبەرىندە بالاباقشاعا ارنالعان جاڭا عيماراتتىڭ جۇمىسى باستالادى. جىل اياعىنا دەيىن اياقتاۋعا ۋادە بەرىپ وتىر. پارتيا ءتوراعاسىنىڭ ءبىرىنشى ورىنباسارى «Nur Otan» تۇرعىندارمەن بىرگە نىساننىڭ بەلگىلەنگەن مەرزىمدە تاپسىرىلۋىن جانە ەڭ باستىسى اتقارىلاتىن جۇمىستاردىڭ ساپاسىنا باقىلاۋ جۇرگىزەتىنىن ايتتى.
سودان كەيىن باۋىرجان بايبەك پارتيانىڭ بەلسەندى مۇشەلەرىمەن جانە «Nur Otan»-نىڭ جاڭا جاقتاستارىمەن بىرنەشە كەزدەسۋ وتكىزدى. كەشكە قاراي پارتيانىڭ قولداۋىمەن ۇلى ابايدىڭ 175 جىلدىق مەرەيتويىنا وراي سىر ەلىندە ءوتىپ جاتقان «اباي جولىمەن» اتتى رەسپۋبليكالىق ايتىستى تاماشالادى.
بۇل – پارتيانىڭ مۇرىندىق بولۋىمەن ابايعا ارنالىپ ءوتىپ جاتقان ەكىنشى ايتىس. بيىلعى ءسوز سايىسىنىڭ بەتاشارى ەلوردادا «ادامزاتتىڭ الىبى – حاكىم اباي» اتتى الامان ايتىسپەن اشىلعان بولاتىن. ەندى ول سىر ەلىندەگى ونەر دوداسىنا ۇلاستى.
ايتىستى بەلگىلى اقىن، ايتىس جاناشىرى ءجۇرسىن ەرمان جۇرگىزىپ، جىر الامانىنا سەرىك قۇسانبايەۆ، ايبەك قالييەۆ، اسەم ەرەجە قىزى، مۇحتار نيازوۆ، مەيىربەك سۇلتانحان باستاعان ون ەكى اقىن قاتىسىپ، ب ا ق سىنادى.
پارتيا ءتوراعاسىنىڭ ءبىرىنشى ورىنباسارى كورەرمەندەرگە ارناپ ءوز لەبىزىن ءبىلدىرىپ، ءتول ونەرىمىز – ايتىستىڭ ماڭىزىنا توقتالدى.
«ءسوز بارىمتاسىندا ابايدىڭ اسىل ويلارى مەن ارمان-اڭسارى، قۇندىلىقتارى مەن ىزگى مۇراتتارى ازۋلى ايتىسكەرلەرىمىزدىڭ جىرىنا ارقاۋ بولدى. وسكەلەڭ ۇرپاقتىڭ بويىنا كەمەڭگەر اباي وسيەتىندەگى جاسامپازدىق رۋحتى ءسىڭىرۋ – حالقىمىز ءۇشىن دە، سول حالىقتىڭ اماناتىن ارقالاعان «Nur Otan» ءۇشىن دە ەڭ نەگىزگى ماقسات. ساياسي ۇيىمىمىز ءۇشىن ايتىستى قولداۋ – ۇلتتىق ونەرگە دەگەن قامقورلىقپەن قاتار، حالقىمىزدىڭ مۇڭ-مۇقتاجىنان تىكەلەي اقپارات الۋدىڭ، ەلگە جاقىن بولۋدىڭ جولى.
بيىل دانا ابايدىڭ 175 جىلدىعىنا وراي رەسپۋبليكالىق، وبلىستىق جانە اۋداندىق دەڭگەيدەگى 20-عا جۋىق اقىندار ايتىسى وتەدى دەپ جوسپارلانۋدا. ودان بولەك، ءابۋ ناسىر ءال-فارابيدىڭ 1150 جىلدىعىنا جانە ۇلى جەڭىستىڭ 75 جىلدىعىنا ارنالعان اقىندار ايتىستارى ۇيىمداستىرىلادى»، – دەدى باۋىرجان بايبەك.
الامان ايتىستىڭ باس جۇلدەسى بەلگىلى اقىن، «التىن دومبىرانىڭ» ەكى دۇركىن جەڭىمپازى مۇحتار نيازوۆقا بۇيىردى. ال ءبىرىنشى ورىندى باتىسقازاقستاندىق جانسايا مۋسينا يەلەنسە، ەكىنشى ورىندى اسەم ەرەجە قىزى ەنشىلەدى. ءۇشىنشى ورىندى مەيىربەك سۇلتانحان مەن ايبەك قالييەۆ الدى.
ەسكە سالا كەتەيىك، ەلباسى تاپسىرماسى بويىنشا «Nur Otan» پارتياسى بىرنەشە ايدان بەرى ورتالىق جانە جەرگىلىكتى اتقارۋشى ورگاندارمەن بىرلەسە وتىرىپ، الداعى 5 جىلعا اۋدانداردى، قالالاردى جانە وبلىستاردى دامىتۋدىڭ جاڭا باعدارلاماسىن ازىرلەۋ جۇمىستارىن جۇرگىزىپ جاتىر. اتالعان باعدارلامالاردا ءاربىر جەكەلەگەن ءوڭىردىڭ جەرگىلىكتى ەرەكشەلىكتەرى ەسكەرىلىپ، ازاماتتاردىڭ ناقتى قاجەتتىلىكتەرى كورىنىس تاباتىن بولادى. وسى جۇمىستاردىڭ اياسىندا «Nur Otan» پارتياسىنىڭ باسشىلىعى ەلىمىزدىڭ بارلىق ءوڭىرىن، ءتىپتى شالعاي ەلدى مەكەندەرىنە دەيىن ارالاپ شىعادى.
