ءازىربايجاندا كوروناۆيرۋس جۇقتىرعان رەسەي ازاماتى تىركەلدى. بۇل تۋرالى ازەربايجان مينيسترلەر كابينەتى جانىنداعى جەدەل شتاب اقپاراتىنا سىلتەمە جاساپ Trend.az اگەنتتىگى حابارلادى.
اگەنتتىكتىڭ حابارلاۋىنشا، ۆيرۋس جۇقتىرعان رەسەي ازاماتى يران-ازەربايجان باعىتىندا مەملەكەتتىك شەكارانى كەسىپ ءوتۋ كەزىندە ودان كوروناۆيرۋستىڭ العاشقى بەلگىلەرى انىقتالعان، وسىعان بايلانىستى ۆيرۋس جۇقتىرعان ازامات اۋرۋحانانىڭ ارنايى ينفەكسيالىق بولىمىنە جاتقىزىلدى. جۇرگىزىلگەن سىنامالار مەن تەستەردىڭ قورىتىندىسى ونىڭ ۆيرۋستى جۇقتىرعانىن كورسەتتى.
اگەنتتىك قازىرگى ۋاقىتتا ۆيرۋس جۇقتىرعان ادامنىڭ جاعدايى تۇراقتى ەكەنىن حابارلادى. ءازىربايجان بيلىگى ۆيرۋستىڭ تارالۋىن جانە ونىڭ سالدارىن بولدىرماۋ ءۇشىن ءتيىستى شارالار قابىلداپ جاتىر. قاجەتتى اقپاراتتى الۋ ءۇشىن ۆيرۋس جۇقتىرعان ازاماتپەن بايلانىسقان ادامداردى انىقتاۋ، ونىڭ ۆيرۋستى قايدان جۇقتىرعانىن، تارالۋ جولدارىن انىقتاۋ جۇمىستارى جۇرگىزىلىپ جاتىر.
سوڭعى دەرەككە سايكەس، الەم بويىنشا 80 مىڭنان استام ادامعا كوروناۆيرۋس جۇققان. شامامەن 2800 ادام ۆيرۋستان كوز جۇمعان. ولاردىڭ باسىم بولىگى - قىتايدىڭ حۋبەي پروۆينسياسىنىڭ تۇرعىندارى.
پىكىر قالدىرۋ