بۇگىن رەسپۋبليكا سارايىندا قالا اكىمدىگىنىڭ قولداۋىمەن ونكولوگيا ينستيتۋتى بالالار رادياسيالىق تەراپيا ءبولىمىنىڭ پاسيەنتتەرىنە ارناپ "ءبىز قۋانىش سىيلايمىز" اتتى ەرەكشە گالا-كونسەرت ءوتتى.

كونسەرتكە مەملەكەتتىك بيلىك قۇرىلىمدارى، قازاقستاننىڭ ەڭبەك سىڭىرگەن ونەر قايراتكەرى – ساكەن مايعازييەۆ، بولات كۇساينوۆ ت.ب،  بوكستان وليمپيادا چەمپيونى ەرماحان يبرايموۆ، «لەديبۋگ» جانە «سيەۆنيسا» كوپ بالالى وتباسىلاردان شىققان بالالار ءانسامبلى، «اپريل» قايىرىمدىلىق قورى جانە باسقا دا شىعارماشىلىق توپتار بەلسەنە قاتىستى.

"ءبىز قۋانىش سىيلايمىز" جوباسىنىڭ جەتەكشىسى كيرا ۋدارسيەۆانىڭ ايتۋىنشا، بۇگىنگى مەرەكە ونكولوگيالىق ينستيتۋتتىڭ جاس پاسيەنتتەرىنە ارنالعان.

– قانشا ايدان بەرى بالالار ءتورت قابىرعاعا قاراپ ۋاقىتتارىن وتكىزەدى، سوندىقتان دا ءبىز ءار جۇما سايىن بالاپاندارعا فوتوسەسسيا جاساپ، سىيلىقتار بەرەمىز. ءبىزدىڭ فوتوسەسسياعا كەلگەن ءاربىر بالا وبرازدى وزدەرى تاڭداپ، قانداي سىيلىق العىسى كەلەتىنىن، نەنى ارماندايتىنىن ايتادى. ال ءبىز ولاردىڭ تىلەگىن ورىنداۋعا تىرىسامىز، – دەدى كيرا ۋدارسيەۆا.

رەسپۋبليكا سارايىنا بالالاردى پرەميۋم كلاستاعى «Mercedes-Benz» كولىگىمەن الىپ كەلدى.

جوبا جەتەكشىسىنىڭ ايتۋىنشا، قايىرىمدىلىق كونسەتىنە قولداۋ كورسەتكەندەر قاتارىندا توتەنشە جاعدايلار جانە پوليسيا دەپارتامەنتى، «Air Astana» اۆياكومپانياسى، تەاترلار، مەيرامحانالار جانە باسقا دا دەمەۋشىلەر. سونداي-اق، بالالاردىڭ بارلىق تىلەكتەرىن ورىنداۋ ءۇشىن الەۋمەتتىك جەلىلەر ارقىلى حالىقتىڭ كومەگىنە جۇگىنىپ، قاجەتتىلىكتەرگە قازاقستاندىقتار دەرەۋ جاۋاپ بەرىپ، كومەكتەرىن ۇسىنعانىن اتاپ ءوتتى.