ايگەرىم جاكىشيەۆا اكەسىنىڭ بوستاندىققا شىققانىنا سەنە الماعان. بۇل تۋرالى مۇحتار جاكىشيەۆتىڭ قىزى 31 ارناعا بەرگەن سۇحباتىندا ايتتى. ايگەرىم جاكىشيەۆا ءقازىر لوندون قالاسىندا تۇرادى. 

"اكەمە ۇكىم وقىلىپ جاتقان كەزدە بىزدە ساعات تاڭعى التى بولاتىن. مەنىڭ تەلەفونىما كوپتەگەن حاتتار كەلدى. ءتىپتى تەلەفونىم كەلگەن حاتتار مەن قوڭىراۋلاردان جارىلۋعا جاقىن قالدى. اكەمنىڭ بوستاندىققا شىعاتىنىن ەستىگەن كەزدە سەنە المادىم. بۇعان سەنۋگە قورىقتىم. سەبەبى "ءقازىر قۋانىپ، كەيىن تاعى ءبىر وقيعالار ورىن الىپ، اكەمدى شىعارماي قويادى" دەپ ويلادىم. مەن دە، وتباسىم دا قاتتى قۋاندى. ولار دا قورىقتى، سەنە المادى. ءبىز ەندى 15 كۇن ىشىندە ەشقانداي وزگەرىس بولماسا ەكەن دەپ دۇعا ەتەمىز. كىمنىڭ ارقاسىندا مەنىڭ اكەم بوستاندىققا شىقتى؟ بۇل سۇراققا جاۋاپ بەرۋ وتە قيىن. ەشكىم بۇل سۇراققا دۇرىس جاۋاپ بەرە المايتىن شىعار. ال اكەمدى العاش رەت كورگەن كەزدە نە ايتاتىنىمدى بىلمەيمىن. قاتتى قۇشاقتايتىن شىعارمىن"، - دەدى ايگەرىم جاكىشيەۆا.

ەسكە سالساق، كەشە "قازاتومونەركاسىپ" كومپانياسىنىڭ بۇرىنعى جەتەكشىسى مۇحتار جاكىشيەۆتىڭ سوتى بولدى. سەمەي قالالىق №2 سوتى شىعارعان شەشىمگە سايكەس، مۇحتار جاكىشيەۆ شارتتى تۇردە مەرزىمىنەن بۇرىن بوستاندىققا شىعادى. ول پروباسيالىق باقىلاۋعا الىنىپ، جازا مەرزىمى تولىق اياقتالمايىنشا قازاقستان اۋماعىنان شىعارىلمايدى.