جامبىل وبلىسى قورداي اۋدانىندا قازاقتار مەن دۇنگەندەر اراسىندا بولعان ەتنيكالىق جانجالدان كەيىن ماسانچي اۋىلىنداعى عيماراتتىڭ ءۇيىندىسى استىنان تابىلعان ءمايىت مۇرات ماسانوۆتىڭ مۇردەسى بولىپ شىقتى. بۇل تۋرالى جامبىل وبلىسى پوليسيا دەپارتامەنتى حابارلادى.
ورگاننىڭ حابارلاماسىنا قارعاندا، ءۇيىندى استىنان تابىلعان ءمايىتتى انىقتاۋ ءۇشىن قوردايدا جانجال بولعانى كۇنى جوعالىپ كەتكەن مۇرات ماسانوۆتىڭ تۋىسقاندارىنان قان الىنىپ، گەنەتيكالىق ساراپتاما جاسالعان. ساراپتاما قورىتىندىسى ءمايتتىڭ مۇرات ماسانوۆ ەكەنىن كورسەتكەن. پوليسيانىڭ مالىمەتىنشە، مۇرات ماسانوۆ 20 جاستا بولعان.
بۇعان دەيىن ءبىرقاتار ب ا ق مۇرات ماسانوۆتىڭ جانجال بولعان كۇنى كەشكە ءماسانچيدىڭ جانىنداعى قاراساي اۋىلىنداعى تۋىستارىنا بارام دەپ ۇيدەن شىعىپ كەتىپ، قايتىپ ورالماعانىن جازعان بولاتىن. كەيىن ونىڭ ورتەنگەن كولىگى 8 اقپاندا ماسانچي اۋىلىنىڭ ماڭىنان تابىلعانى بەلگىلى بولدى.
اقپاننىڭ جەتىسىنەن سەگىزىنە قارعان ءتۇنى جامبىل وبلىسى قورداي اۋدانىنداعى بىرنەشە اۋىلدا ەتنيكالىق قازاقتار مەن دۇنگەندەر اراسىندا جانجال بولىپ، رەسمي دەرەك بويىنشا، 10 ادام قازا تاۋىپ، 180-نەن اسا ادام زارداپ شەككەن. وسى وقيعادان كەيىن ەكى-ۇش كۇننەن سوڭ جانجال بولعان ماسانچي اۋىلىندا قيراعان عيماراتتان تاعى ءبىر ادامنىڭ مۇردەسى تابىلعان ەدى.
پىكىر قالدىرۋ