بيىلدان باستاپ بەلگىلى ءبىر ساناتتاعى ازاماتتار ستوماتولوگيالىق كومەككە ەلدەگى كەز كەلگەن ەمدەۋ ۇيىمى ارقىلى قول جەتكىزە الادى. بۇعان قاڭتاردان باستاپ ەنگىزىلگەن مىندەتتى الەۋمەتتىك مەديسينالىق ساقتاندىرۋ جۇيەسى مۇمكىندىك بەرىپ وتىر.

«الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالى ديرەكتورى نۇرلىبەك قابدىقاپاروۆتىڭ ايتۋىنشا، 2020 جىلدان باستاپ ستوماتولوگيالىق قىزمەت اقىسىن تولەۋ سحەماسى وزگەردى. بۇرىن قىزمەت اقىسى كونسۋلتاتيۆتىك-دياگنوستيكالىق قىزمەت كورسەتەتىن كلينيكاعا تىكەلەي اۋدارىلاتىن بولسا، بيىلدان باستاپ ەمحانالار ارقىلى تولەنەدى. ول ءۇشىن ەمدەۋ ۇيىمدارى اراسىندا قوسىمشا كەلىسىمشارت بەكىتىلەدى.

– ساقتاندىرۋ ەنگىزىلگەنگە دەيىن ستوماتولوگيالىق كومەك تەك پاسيەنتتىڭ تىركەلگەن ەمحاناسى ارقىلى عانا كورسەتىلەتىن. جاڭا جۇيەنىڭ ارقاسىندا اتالعان ساناتتاعى ازاماتتار بۇل قىزمەتتى ەلىمىزدىڭ كەز-كەلگەن جەرىندە پايدالانا الادى. مىسالى، قاڭتار ايىندا الماتىلىق پاسيەنتتەرگە ماڭعىستاۋ، اقتوبە، جامبىل، الماتى وبلىستارىنىڭ، نۇر-سۇلتان جانە شىمكەنت قالالارىنىڭ ەمدەۋ مەكەمەلەرىندە ستوماتولوگيالىق قىزمەتتەر كورسەتىلگەن. ياعني، پاسيەنت ءتىسىن قاي جەردە ەمدەتسە، اقشا سول كلينيكاعا تۇسەدى، – دەدى نۇرلىبەك قابدىقاپاروۆ.

مسق قالالىق فيليالى مالىمەتىنە سۇيەنسەك، بيىلدان باستاپ ازاماتتاردىڭ جەكەلەگەن ساناتتارى، دالىرەك ايتقاندا، 18 جاسقا دەيىنگى بالالار مەن جۇكتى ايەلدەر امبۋلاتوريا دەڭگەيىندەگى ستوماتولوگيالىق كومەكتى ساقتاندىرۋ پاكەتى ارقىلى الا الادى. ولار: ءتىستى جانسىزداندىرۋ، پلومبا سالۋ، تەراپيەۆتىڭ قابىلداۋى، پۋلپيت پەن پەريودونتيتتى ەمدەۋ، گيپوپلازيا مەن فليۋوروز سالدارىنان اناتوميالىق ءپىشىنى بۇزىلعان ءتىستى تولىق قالپىنا كەلتىرۋ سىندى تاعى دا باسقا قىزمەتتەردى پايدالانا الادى. سونىمەن قاتار، ءتىستى جۇلدىرۋ، ءتىل مەن ەرىن جۇگەنشىگىندەگى اقاۋدى جويۋ، جاقتى رەنتگەنگە ءتۇسىرۋ، انەستەزيا سىندى قىزمەتتەر دە وسى پاكەت شەڭبەرىندە كورسەتىلەدى.

ال، شۇعىل ستوماتولوگيالىق كومەك بۇرىنعىشا مەملەكەت تاراپىنان كەپىلدەندىرىلگەن تەگىن مەديسينالىق كومەك پاكەتىندە قالدىرىلدى. شۇعىل كومەككە: 18 جاسقا دەيىنگى بالالار، جۇكتى ايەلدەر، ۇلى وتان سوعىسىنىڭ قاتىسۋشىلارى، 1،2،3 توپتاعى مۇگەدەكتەر، «التىن القا»، «كۇمىس القا» يەلەنگەن كوپبالالى انالار، اتاۋلى الەۋمەتتىك كومەك الۋشىلار، جاسىنا قاراي زەينەتكە شىققان زەينەتكەرلەر، جۇقپالى، الەۋمەتتىك ماڭىزى بار اۋرۋلار مەن قورشاعان ورتاعا ءقاۋىپ توندىرەتىن سىرقاتتارعا شالدىققان پاسيەنتتەر جۇگىنە الادى. مىسالى، حيرۋرگتىڭ قابىلداۋى، ءتىستى جۇلۋ، ابسەستى اشىپ تازارتۋ، ودونتەگەندى ىسىكتى كەسىپ الىپ تاستاۋ، الۆەوليتتى ەمدەۋ، ءتىس تامىرى نيەۆريتىن ەمدەۋ، اۋىز قۋىسىنداعى جۇمساق تىندەردى كەسىپ الىپ تاستاۋ، جاق-بەت سۇيەگىندەگى جارالاردى ەمدەۋ ت.ب. قىزمەتتەر تەگىن كورسەتىلەدى. سونداي-اق، جاق-بەت سۇيەگى اقاۋىمەن تۋعان نارەستەلەرگە ارنالعان ورتودونتيالىق كومەك تۇرلەرى دە مەملەكەتتىك تاپسىرىس شەڭبەرىندە كورسەتىلەدى.

جالپى، ءقازىر الماتى قالاسىندا 75 باستاپقى مەديسينالىق-سانيتارلىق كومەك كورسەتەتىن 75 كلينيكا (ەمحانا) تىركەلگەن. ونىڭ 23ء-ى ستوماتولوگيالىق كومەك كورسەتەدى. قوسىمشا كەلىسىمشارت نەگىزىندە ستوماتولوگيالىق قىزمەت كورسەتەتىن كلينيكالار سانى – 9.

– جاڭا جۇيە پاسيەنتتىڭ ستوماتولوگيالىق كلينيكانى تاڭداۋىنا مۇمكىندىك بەرىپ وتىر. ءبىراق ازاماتتاردىڭ كوپ جاعدايدا ءوز قۇقىقتارىن بىلمەي جاتاتىنى دا جاسىرىن ەمەس. وكىنىشكە وراي، پاسيەنتتەردىڭ ستوماتولوگيالىق كلينيكانى تاڭداۋ قۇقىعىن بارلىق ەمحانالار بىردەي ساقتاي بەرمەيدى. سەبەبى، پاسيەنت تاڭداۋدى تىركەلگەن ەمحاناسى ارقىلى جاسايدى، قىزمەت اقىسى دا سول ەمحانا ارقىلى تولەنەدى. سوندىقتان ءبىز پاسيەنت قۇقىعىن قورعاۋ ماقساتىندا بارلىق كلينيكالارمەن جان-جاقتى جۇمىس ىستەپ جاتىرمىز، – دەپ قورىتتى فيليال باسشىسى.

مەديسينالىق كومەك كورسەتۋ بارىسىندا قۇقىعى بۇزىلعان تۇرعىندار مەديسينالىق ساقتاندىرۋ قورىنىڭ 1406 بايلانىس نومىرىنە شاعىمدانا الادى.

«الەۋمەتتىك مەديسينالىق ساقتاندىرۋ قورى»

كەاق الماتى قالالىق فيليالىنىڭ

باسپا ءسوز قىزمەتى