قىتايدىڭ قازاقستانداعى ەلشىسى چجان سياو ەتنيكالىق قازاق سايراگۇل ساۋىتبايدىڭ "باتىر ايەل" حالىقارالىق سىيلىعىن الۋىنا قاتىستى پىكىر ءبىلدىردى. ول اقش ەلىنىڭ سايراگۇل ساۋىتبايدى ماراپاتتاۋىن ارانداتۋشىلىق دەپ ايىپتادى. 

"بۇل - جۇڭگو ەلىنىڭ ىشكى ىسىنە ارالاسۋعا باعىتتالعان پروۆوكاسيا. ال ءىس-شارانىڭ ءوزى ۆاشينگتوننىڭ قارا نيەتى مەن ماقساتىن اشىق كورسەتكەن سيرككە ۇقسايدى. سوڭعى جىلدارى ۆاشينگتون شىڭجاڭ-ۇيعىر اۆتونومدى اۋدانىنداعى تەرروريزم جانە ەكسترەميزمگە قارسى كۇرەستە قول جەتكىزگەن زور جەتىستىكتەرىمىزدى ەلەمەي، قىتايعا جالا جاۋىپ، ءتۇرلى قاۋەسەت تاراتىپ، شۇاا ماسەلەسىن كوتەرىپ كەلەدى. ونىڭ ماقساتى – ءوڭىردى، سونىڭ ىشىندە شۇاا-نى ەتنيكارالىق، ۇلتارالىق قانتوگىس ايماعىنا اينالدىرىپ، بىر-بىرىمەن ارازداستىرۋ، اقىرىندا قىتايدىڭ تۇبىنە جەتۋ. ءبىراق ونىڭ بۇل ارەكەتىنەن ەشتەڭە شىقپاي كەلەدى. 

شۇاا ءقاۋىپسىز، تۇراقتى، كوركەيگەن ايماققا اينالعان. بارلىق ۇلت وكىلدەرى بەيبىت عۇمىر كەشىپ كەلەدى. كاسىبي وقۋ ورتالىقتارىن بىتىرگەندەر جۇمىسقا ورنالاسىپ، اقشا تاۋىپ ءجۇر. ورتالىقتار قىتايدىڭ ەكسترەميزممەن كۇرەسۋ ءۇشىن ويلاپ تاپقان ءساتتى جوباسى ەكەنىن تاجىريبە كورسەتتى. ۆاشينگتوننىڭ ءبىر وتىرىكتى قايتالاي بەرسەڭ شىندىققا اينالادى دەگەن ءبىرتۇرلى ستەرەوتيپى بار. بۇل ولاردىڭ بىلىمسىزدىگىنىڭ كورىنىسى. وتىرىك ايتۋدى توقتاتىڭدار. وتىرىكتى مىڭ مارتە قايتالاساڭدار دا ەشقاشان شىندىققا اينالمايدى. ال اقش وسى ماراپات ارقىلى ءوزىنىڭ يدەولوگيالىق ۆيرۋستىڭ ەڭ ۇلكەن كوزى ەكەنىن تاعى ءبىر رەت كورسەتتى. 

ەندى قىتايدا دا، قازاقستاندا دا "قىلمىسكەر" اتانعان ايەلدى قالايشا باتىر ايەل دەۋگە بولادى؟! ونىڭ باتىلدىعى – ءوز وتانىن ساتۋ، ءوزى مەن وتباسىن اسىراپ باققان ەلدى قارالاۋ. ەگەر ول باتىر ايەل بولسا، نەلىكتەن شۇاا-داعى نەسيەلەرىن تولەمەگەن؟ ول ءوزىنىڭ گەوساياسي سيركتەگى ءرولىن لايىقتى باعالاي المايتىنى وكىنىشتى"، - دەپ جازدى جۇڭگو ەلشىسى ءوزىنىڭ facebook پاراقشاسىنا. 

ەسكە سالا كەتسەك، 4 ناۋرىزدا سايراگۇل ساۋىتباي اقش-تا "باتىر ايەل" حالىقارالىق سىيلىعىنىڭ يەگەرى اتاندى. ماراپاتتاۋ كەزىندە سايراگۇل ساۋىتبايعا اقش-تىڭ مەملەكەتتىك حاتشىسى العىس ايتقان بولاتىن.