بۇگىن سەنات ءتوراعاسى داريعا نازاربايەۆانىڭ توراعالىعىمەن ق ر پارلامەنتى سەناتىنىڭ بيۋرو وتىرىسى بولدى. بۇل تۋرالى پارلامەنت سەناتىنىڭ باسپا ءسوز قىزمەتى حابارلادى.

قازاقستان رەسپۋبليكاسى پرەزيدەنتىنىڭ «قازاقستان رەسپۋبليكاسى جوعارعى سوتىنىڭ سۋديالارىن سايلاۋ تۋرالى» ۇسىنىسى كۇن تارتىبىندەگى العاشقى ماسەلە بولدى. پرەزيدەنت ۇسىنعان كانديداتۋرالار بويىنشا قورىتىندىلار دايىنداۋ كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنە تاپسىرىلدى.

سەنات تاعايىنداعان ق ر كونستيتۋسيالىق كەڭەسى مۇشەسىنىڭ وكىلەتتىگىن توقتاتۋ جانە قىزمەتىنەن بوساتۋ، سونداي-اق كونستيتۋسيالىق كەڭەس مۇشەسىن قىزمەتىنە تاعايىنداۋ كۇن تارتىبىندەگى كەلەسى ماسەلە بولدى.

وتىرىس بارىسىندا سەنات تاعايىنداعان ق ر ورتالىق سايلاۋ كوميسسياسى مۇشەسىنىڭ وكىلەتتىگىن توقتاتۋ جانە قىزمەتىنەن بوساتۋ ماسەلەسى ودان كەيىن قارالدى. كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنە وسى كانديداتۋرا بويىنشا ءتيىستى قورىتىندى دايىنداۋ تاپسىرىلدى. بيۋرو مۇشەلەرى ودان باسقا ق ر پارلامەنتى سەناتى ءتوراعاسىنىڭ «ق ر ورتالىق سايلاۋ كوميسسياسىنىڭ مۇشەسى قىزمەتىنە تاعايىنداۋ تۋرالى» ۇسىنۋىن دا قارادى.

بيۋرو وتىرىسىندا ماجىلىستە ماقۇلدانعان زاڭ جوبالارى كوميتەتتەرگە ءبولىنىپ بەرىلدى. الەۋمەتتىك-مادەني دامۋ جانە عىلىم كوميتەتى ەلىمىزدىڭ كەيبىر زاڭنامالىق اكتىلەرىنە ەڭبەك جانە انا مەن بالانى قورعاۋ ماسەلەلەرى بويىنشا تۇزەتۋلەر ەنگىزۋ جوبالارى بويىنشا باس كوميتەت بولىپ بەلگىلەندى.

بيۋرو وتىرىسى بارىسىندا 12 جانە 19 ناۋرىزدا وتەتىن سەناتتىڭ كەزەكتى وتىرىستارىنا دايىندىق تالقىلاندى. سالالىق كوميتەتتەردىڭ ءتوراعالارى وتىرىستاردا قاراۋعا ۇسىنىلعان ماسەلەلەردىڭ دايىندىعى تۋرالى حاباردار ەتتى.

سونداي-اق بيۋرو مۇشەلەرى سەناتتا شىعىس قازاقستان وبلىسىنىڭ كۇنىن وتكىزۋدى دە تالقىلادى. داريعا نازاربايەۆا ايماقتار كۇندەرىن وتكىزۋدىڭ باستى مىندەتى – مەملەكەتتىك باعدارلامالاردىڭ وڭىرلەردەگى ورىندالۋ دەڭگەيىن ايقىنداۋ، حالىقتى تولعاندىراتىن ماسەلەلەردى جەرگىلىكتى بيلىكپەن بىرلەسە وتىرىپ شەشۋ جولدارىن قاراستىرۋ ەكەنىن اتاپ ءوتتى.

سەنات جوسپارىنا سايكەس بيىلعى 22 مامىردا «قازاقستان رەسپۋبليكاسىندا گەندەرلىك تەڭدىك پەن وتباسىلىق قۇندىلىقتاردى دامىتۋ» تاقىرىبى بويىنشا پارلامەنتتىك تىڭداۋلار وتكىزۋ جوسپارلانعان بولاتىن. ونى ۇيىمداستىرىپ وتكىزۋ الەۋمەتتىك-مادەني دامۋ جانە عىلىم كوميتەتىنە جۇكتەلدى.