ق ر پرەزيدەنت اكىمشىلىگىنىڭ كەلىسىمىمەن اتىراۋ وبلىسى اكىمىنىڭ ورىنباسارى لاۋازىمىنا باقىتگۇل حامەنوۆا تاعايىندالدى، دەپ حابارلايدى atyrau.gov.kz.

– باقىتگۇل قايىرجان قىزى تاجىريبەلى مامان رەتىندە بۇل لاۋازىمعا لايىقتى دەپ ەسەپتەيمىن، – دەدى اتىراۋ وبلىسىنىڭ اكىمى ماحامبەت دوسمۇحامبەتوۆ.

باقىتگۇل حامەنوۆا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە قازاق ءتىلى جانە ادەبيەتى پاندەرىنىڭ ءمۇعالىمى ماماندىعى بويىنشا ءبىلىم العان. اتىراۋ مۇناي جانە گاز ينستيتۋتىندا مۇناي جانە گاز ينجەنەرى ماماندىعىن وقىعان. م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ەكونوميكا جانە بيزنەس باكالاۆرىن بىتىرگەن. فيلولوگيا عىلىمدارىنىڭ كانديداتى جانە ساياساتتانۋ بەيىنى بويىنشا دوكتور.

ەڭبەك جولىن 1999 جىلى اتىراۋ وبلىستىق تەلەراديوسىنىڭ رەداكتورى قىزمەتىنەن باستاعان.

2001-2003 جىلدارى ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى قازاق ءتىلى كافەدراسىنىڭ وقىتۋشىسى، 2002-2004 جىلدارى اتىراۋ مۇناي جانە گاز ينستيتۋتىنىڭ قازاق ءتىلى كافەدراسىنىڭ وقىتۋشىسى، 2004-2005 جىلدارى «راحات تۆ» اتىراۋ تەلەراديو حابارلارىن تاراتۋ فيليالى قازاق رەداكسياسىنىڭ كوررەسپوندەنتى، كەيىن ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى قازاق ادەبيەتى مەن جۋرناليستيكا كافەدراسىنىڭ وقىتۋشىسى، 2005-2016 جىلدارى اتىراۋ كاسپيي ءوڭىرىنىڭ قازىرگى زامانعى كوللەدجىنىڭ ديرەكتورى قىزمەتتەرىن اتقارعان.

2016 جىلعى 24 ناۋرىزدان بەرى التىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولدى.