گەرمانيادا قازاقستان ازاماتى كوروناۆيرۋس جۇقتىردى، ونىڭ وتباسى كارانتينگە جاتقىزىلدى، دەپ حابارلادى قازاقستان سىرتقى ىستەر مينيسترلىگى.

ۆەدومستۆو تاراتقان حابارلاماعا قاراعاندا، كوروناۆيرۋس جۇقتىرعان ازامات –گەرمانياداعى قازاقستان ەلشىلىگىندە جۇمىس ىستەيتىن ديپلوماتتىڭ اكەسى.

"گەرمانياداعى قازاقستان ەلشىلىگىندەگى ديپلوماتتارىمىزدىڭ بىرىنە اتا-اناسىنىڭ قوناققا بارعانىن راستايمىز. ولار ەۋروپادا جەكە ساپارمەن جۇرگەن. بىرنەشە كۇننەن كەيىن ديپلوماتتىڭ اكەسىنەن كوروناۆيرۋس جۇقتىرۋ بەلگىلەرى بايقالىپ، اۋرۋحاناعا جاتقىزىلدى. قازىرگى ۋاقىتتا ناۋقاستىڭ جاعدايى جاقسارىپ، جەكە پالاتادان جالپى پالاتاعا اۋىستىرىلدى. ونىڭ ايەلى مەن ۇلى نەمىس دارىگەرلەرىنىڭ باقىلاۋىندا كارانتينگە الىندى" دەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

ال دەنساۋلىق ساقتاۋ ءمينيسترى ەلجان ءبىرتانوۆ نۇر-سۇلتانداعى بريفينگتە "گەرمانيانىڭ بەرلين قالاسىندا قازاقستاننىڭ ءبىر ازاماتىنا كوروناۆيرۋس جۇقتىرعان دەگەن الدىن الا دياگنوز قويىلعان. قازىرگە دەيىن بىزدە بار اقپارات وسى عانا. قازاقستانعا كەلگەن 12 ادام سول كىسىنىڭ جانىندا بولعان. ءقازىر ولار اۋرۋحانادا كارانتيندە جاتىر. ال الگى ازامات ءقازىر گەرمانيادا. ءبىز بۇل اقپاراتتى تولىق راستاي المايمىز. ءبىراق ءقازىر بىزدە گەرمانيادا ءبىر ازاماتىمىزعا ۆيرۋس جۇققانى جايلى اقپارات بار" دەدى.

گەرمانياداعا قازاقستاندىقتى قوسقاندا ەلدىڭ ءتورت ازاماتىنان كوروناۆيرۋس تابىلىپ وتىر. بۇگىن، 13 ناۋرىزدا تۇستەن كەيىن الماتىعا گەرمانيادان ۇشىپ كەلگەن ەلدىڭ ەكى ازاماتىنىڭ كوروناۆيرۋس جۇقتىرعانى انىقتىلعان بولاتىن. ارتىنشا ميلاننان (يتاليا) نۇر-سۇلتانعا ۇشىپ كەلگەن ايەل ادامنىڭ دا ۆيرۋس جۇقتىرعانى حابارلاندى. 

دەنساۋلىق ساقتاۋ ءمينيسترى ەلجان ءبىرتانوۆتىڭ سوزىنشە، ۆيرۋس جۇقتىرعان ازاماتتار كارانتينگە جاتقىزىلىپ، ولارمەن بايلانىستا بولعان ادامداردى ارنايى ماماندار تەكسەرىپ جاتىر.

تاعى وقىڭىز!

♦ ۆيرۋسولوگ: قازاقستاندا كوروناۆيرۋسقا قارسى پرەپاراتتار جاساۋعا مۇمكىنشىلىك بار