قازاقستاندا تاعى ءبىر ادامدان كوروناۆيرۋس تابىلدى. بۇل تۋرالى 13 ناۋرىز كەشكىسىن دەنساۋلىق ساقتاۋ مينيسترلىگىنىڭ باسپا ءسوز حاتشىسى دياس احمەتشارىپ حابارلادى.
"ءتورتىنشى ادامنان كوروناۆيرۋس تابىلدى. ول – 1976 جىلى تۋعان الماتى تۇرعىنى. قازاقستانعا ناۋرىزدىڭ 13ء-ى كۇنى گەرمانيادان جولاۋشىلار ۇشاعىمەن كەلگەن" دەدى احمەتشارىپ.
ونىڭ سوزىنشە، ءقازىر ۆيرۋس جۇقتىرعان قازاقستاندىق الماتىدا ارنايى اۋرۋحانادا جاتىر.
بۇعان دەيىن دەنساۋلىق ساقتاۋ ءمينيسترى ەلجان ءبىرتانوۆ گەرمانيادان كەلگەن ەكى ادامنان، يتاليادان كەلگەن ءبىر ادامنان كوروناۆيرۋس تابىلعانىن مالىمدەگەن ەدى. بۇعان قوسا، گەرمانيادا جۇرگەن قازاقستاننىڭ ءبىر ازاماتىنان دا ۆيرۋس تابىلعانى حابارلانعان..
پىكىر قالدىرۋ