بۇل تۋرالى ق ر قورعانىس مينيسترلىگى بەرگەن تۇسىنىكتەمەدە ايتىلدى، دەپ حابارلايدى Qamshy.kz اقپارات اگەنتتىگى.
وسىعان دەيىن جازعانىمىزداي قايعىلى وقيعا قاپشاعاي قالاسىندا ورنالاسقان مەتالل قابىلداۋ ورىندارىنىڭ بىرىندە 14 ناۋرىز كۇنى بولعان.
الەۋمەتتىك جەلى ارقىلى تەز تاراعان ۆيدەوعا بايلانىستى جەلى قولدانۋشىلار ءتۇرلى پىكىر قالدىرعان. سونىڭ بىرىندە قازا تاپقان ادامنىڭ قولىندا جارىلعان زاتتىڭ اسكەري سنارياد بولۋ مۇمكىندىگى جوعارى ەكەنى ايتىلعان.
وسى وقيعاعا بايلانىستى مينيسترلىك رەسمي سايتىندا تۇسىنىكتەمە بەردى.
«قابىلداۋ پۋنكتى يەسىنىڭ سوزىنە قاراعاندا، 13 ناۋرىز كۇنى كەشكە بەلگىسىز ءۇش ادام مەتالل سىنىقتارىن الىپ كەلگەن، ونىڭ ىشىندە باسقارىلمايتىن اۆياسيالىق سنارياد بولعان. وقيعا بويىنشا تەكسەرۋ جۇرگىزىلىپ جاتىر، بارلىق جاعدايلار ناقتىلانۋدا»، - دەلىنگەن قورعانىس مينيسترلىگى تاراتقان حابارلامادا.
سونداي-اق، ۆەدومستۆو كۇدىكتىلەردىڭ سناريادتى «قازاقستان» پوليگونىنان الىپ كەلۋى مۇمكىن ەكەنىن دە بولجاعان.
«ەسكەرتۋلەر مەن قابىلدانعان قاۋىپسىزدىك شارالارىنا قاراماستان مەتالل جيناۋشىلار پوليگونعا زاڭسىز ەنىپ، سنارياد بولشەكتەرىن، ءوق-دارى فراگمەنتتەرىن جينايدى. اسكەري پوليسيا ورگاندارى جۇرگىزگەن ءتۇسىندىرۋ جۇمىستارىنا قاراماستان ولاردى جيناۋ پۋنكتتەرى زاڭسىز قابىلدايدى»، - دەلىنگەن مينيسترلىك حابارلاماسىندا.
پىكىر قالدىرۋ