بۇگىن قازاقستان پرەزيدەنتى قاسىم-جومارت توقايەۆ ەلدەگى جاريالانعان توتەنشە جاعدايعا بايلانىستى حالىققا ۇندەۋ جولداپ، كۇنى كەشەگى ءوزى جاريالاعان جارلىقتاعى شەكتەۋلەر ءمانىن تولىق ءتۇسىندىرىپ وتكەن بولاتىن. وندا حالىقتى الاڭداتقان ەڭ باستى ساۋال ازىق-تۇلىك دۇكەندەرى مەن بازارلار جۇمىسى تۋرالى دا ايتىلعان.

وسى رەتتە، Qamshy.kz اقپارات اگەنتتىگى ەلدەگى توتەنشە جاعدايعا بايلانىستى پرەزيدەنت جاريالاعان  ۇندەۋدىڭ تولىق نۇسقاسىن نازارلارىڭىزعا ۇسىنادى.

قۇرمەتتى وتانداستار!

بارشاڭىزعا ءمالىم، ءقازىر بۇكىل الەم وتە كۇردەلى احۋالدى باستان وتكەرۋدە. دۇنيە ءجۇزىن كوروناۆيرۋستىڭ تارالۋى الاڭداتىپ وتىر.

بۇل ىندەت كۇننەن-كۇنگە ۋشىعىپ بارادى. وكىنىشكە قاراي، وسى دەرت ءبىزدىڭ ەلىمىزدە دە تىركەلدى.

مەنىڭ كەشەگى جارلىعىممەن بۇگىن تاڭعى ساعات 08.00-دەن باستاپ قازاقستاننىڭ اۋماعىندا توتەنشە جاعداي ەنگىزىلدى. توتەنشە جاعداي رەجيمى 30 تاۋلىككە سوزىلادى.

پرەزيدەنت جانىنان مەملەكەتتىك كوميسسيا قۇرىلدى. ونى پرەمەر-مينيستر باسقارادى. بارلىق قاجەتتى الدىن الۋ شارالارى جۇزەگە اسىرىلادى. قوعامدىق ءتارتىپ قاتاڭ باقىلاۋعا الىنادى. كوپشىلىك قاتىساتىن ءىس-شارالار توقتاتىلدى.

كوپتەگەن ازاماتتارىمىزدىڭ الداعى مەرەكە كۇندەرىنە وراي جوسپار قۇراتىنىن تۇسىنەمىن. دەگەنمەن، بۇكىل حالىقتىڭ دەنساۋلىعى ءۇشىن وسىنداي شەشىم قابىلداپ وتىرمىز.

ءىرى ساۋدا نىساندارىنىڭ جۇمىسىن شەكتەۋگە ءماجبۇرمىز، ءبىراق ازىق-تۇلىك دۇكەندەرى جانە بازارلار ءوز جۇمىسىن جالعاستىرا بەرەدى.

ويىن-ساۋىق ورتالىقتارى، كينوتەاترلار، تەاترلار، كورمەلەر جانە جۇرتشىلىق كوپ باراتىن باسقا دا ورىندار ۋاقىتشا جابىلادى.

وقۋشىلار دەمالىسقا جىبەرىلدى. ستۋدەنتتەر قاشىقتان وقىتۋ جۇيەسىنە كوشتى.

سونداي-اق، ازاماتتارىمىز وتباسىلىق ءىس-شارالاردى وتكىزبەگەن ءجون دەپ سانايمىن.

قازاقستان رەسپۋبليكاسىنىڭ اۋماعىنا كىرۋگە جانە شىعۋعا شەكتەۋ قويىلادى. مەملەكەتتىك شەكارا بويىنداعى وتكىزۋ بەكەتتەرىندە، ۆوكزالدار مەن اۋەجايلاردا سانيتارلىق رەجيم كۇشەيتىلدى.

مەنىڭ تاپسىرمام بويىنشا ۇكىمەت قورىنان دارى-دارمەك، تەست-جۇيەلەرىن جانە زەرتحاناعا ارنالعان جابدىقتاردى الۋ ءۇشىن قاراجات ءبولىندى. اۋرۋحانالاردا ورىن جەتكىلىكتى.

وسى شارالاردىڭ بارلىعى – ازاماتتاردىڭ دەنساۋلىعى ءۇشىن جاسالىپ وتىرعان وتە ماڭىزدى قادامدار. مۇنى دۇرىس تۇسىنەسىزدەر دەپ ويلايمىن. ساقتانعاندى قۇداي ساقتايدى. بۇل ىندەتپەن كۇرەسۋگە تولىق مۇمكىندىگىمىز بار ەكەنىن باسا ايتقىم كەلەدى.

بۇل قيىندىقتى ءبارىمىز ءبىر حالىق، ءبىر قوعام بولىپ مىندەتتى تۇردە ەڭسەرىپ شىعامىز. بۇل – ۋاقىتشا دۇربەلەڭ. وسى داعدارىستان ابىرويمەن ءوتۋىمىز كەرەك! ەنگىزىلگەن شەكتەۋلەرگە ءار ازامات جاۋاپكەرشىلىكپەن قاراۋى ءتيىس.

ءار ادام بارىنشا ساقتانىپ، ۆيرۋستىڭ تارالماۋىنا اتسالىسۋى قاجەت. ەلىمىزدىڭ بارلىق ازاماتتارى وكىلەتتى ورگانداردىڭ قىزمەتىنە قولعابىس كورسەتەدى دەپ سەنەمىن. وسىنداي كەزدە ءبارىمىز سابىر ساقتاپ، تارتىپكە باعىنۋىمىز كەرەك.

دەرتتىڭ العاشقى بەلگىلەرى پايدا بولعان جاعدايدا بىردەن تۇرعىلىقتى جەردەگى دارىگەرگە قارالۋ قاجەت. ءبارىمىزدىڭ ازاماتتىق جاۋاپكەرشىلىگىمىز وسىنداي ساتتە سىنالادى. ءبىز ەكونوميكالىق جاعدايدى باستى نازاردا ۇستايمىز. مەملەكەت بارلىق الەۋمەتتىك مىندەتتەمەلەرىن ورىندايدى.

ەلباسىمىزدىڭ سارابدال ساياساتىنىڭ ارقاسىندا بۇعان قاجەتتى قورىمىز قالىپتاستى. قاراجات بار. وسى ورايدا، ازىق-تۇلىك قورى جەتكىلىكتى ەكەنىنە نازار اۋدارعىم كەلەدى. كۇندەلىكتى تۇتىناتىن تاۋار باعاسىن نەگىزسىز قىمباتتاتۋعا جول بەرىلمەيدى.

ءبىز ەل-جۇرتتى دۇرلىكتىرەتىن، ارانداتاتىن ارەكەتتەرگە تىيىم سالامىز. جالعان اقپارات تاراتىپ، دۇربەلەڭ تۋعىزاتىندار زاڭعا سايكەس جاۋاپقا تارتىلادى.

بۇقارالىق اقپارات قۇرالدارى، ينتەرنەت-رەسۋرستار تەك رەسمي مالىمەتتەرگە سۇيەنىپ، جۇمىس ىستەۋى كەرەك.

ءبىز وسى جاھاندىق كەسەلگە قارسى تۇرۋ ءۇشىن كۇش-جىگەرىمىزدىڭ مىقتى ەكەنىن كورسەتۋىمىز قاجەت. تاتۋلىق پەن تۇتاستىقتىڭ ارقاسىندا كەز-كەلگەن قيىندىقتان شىعۋعا بولادى. سوندىقتان، ءبارىمىز ءبىر ادامداي جۇمىلىپ، ءقاۋىپتى ىندەتپەن كۇرەسۋىمىز قاجەت. بەرەكە مەن بىرلىك ءبارىن دە جەڭەدى!