كوروناۆيرۋستى الەم بويىنشا 169 مىڭنان استام ادام جۇقتىرىپ، ونىڭ 6500-دەن استامى كوز جۇمدى، دەپ حابارلادى سnn. 

جەكسەنبىدە قىتايدا ۆيرۋستىڭ 16 جاڭا جاعدايى راستالعان جانە 14 ادامنىڭ قايتىس بولعانى انىقتالدى. ەلدە تىركەلگەن ينفەكسياعا شالدىعۋشىلاردىڭ جالپى سانى 80 860-قا جەتتى. 

فرانسيا ۇلتتىق دەنساۋلىق ساقتاۋ اگەنتتىگى باسشىسىنىڭ مالىمەتىنشە، ەلدە كوروناۆيرۋستان 300-گە جۋىق پاسيەنت زارداپ شەككەن، ولاردىڭ ورتاشا جاسى – 60. قازىرگى تاڭدا ەلدەگى مەيرامحانالار، كافەلەر، كينوتەاترلار مەن كلۋبتاردى جاۋىپ تاستادى، سونداي-اق كەڭ كولەمدەگى جينالىستاردى وتكىزۋگە تىيىم سالىنعان.

15 ناۋرىزداعى دەرەك بويىنشا يتاليادا 24 ساعات ىشىندە 368 ادامنىڭ قايتىس بولعانى حابارلاندى. جالپى مۇندا كوز جۇمعاندار سانى 1809-عا جەتكەن. ازاماتتىق قورعانىس دەپارتامەنتىنىڭ مالىمەتىنشە، ۆيرۋستان اۋىرعانداردىڭ جالپى سانى 24 747 بولعان، 24 ساعات ىشىندە 3590 جاڭا جاعداي تىركەلگەن. 

اقش-تا سوڭعى تاۋلىكتە كەم دەگەندە 3485 وقيعا تىركەلىپ، ولاردىڭ 65ء-ى ولىممەن اياقتالدى. اقش-تىڭ ۆيسە-پرەزيدەنتى مايك پەنس "جاڭا نۇسقاۋلار دۇيسەنبىدە شىعادى، ماسەلەن  مەيرامحانالار سياقتى ورىندار جابىلاتىن بولادى" دەپ ايتتى. ۆيرۋس تارالماۋى ءۇشىن اقش-تا بىرنەشە شتات پەن قالا جابىلدى.