مەملەكەت باسشىسىنىڭ قازاقستان حالقىنا ارناعان ۇندەۋىندەگى وسى سوزدەردى تىڭداپ نەمەسە وقىپ قويا سالۋ ازدىق ەتەدى. ونىڭ كەلەلى ويىنا، پايىم-تۇجىرىمىنىڭ ءمانى مەن ماعىناسىنا زەر سالعان ءجون. ەل-جۇرتتىڭ اماندىعى بولماسا جەكە باستىڭ ساۋلىعىنان، مىڭ سان جيعان دۇنيە-مۇلكىڭنەن نە قايىر؟ جاسى بار، جاسامىسى بار - بۇكىل حالىق بولىپ زامانا، ۋاقىت جاۋاپكەرشىلىگىن مويىنعا الىپ، بيلىك پەن قوعامدى جۇمىلدىرىپ، “ءبىر قولدىڭ سالاسىنداي” ۇجىمداسىپ، الەمدىك دەرتكە قارسى تۇرۋ – ءارى ادامزاتتىق، ءارى ادامشىلىق ءىس.

جاسىرعان اۋرۋ ءقاۋىپتى. بۇكىل جاھاندى دۇربەلەڭگە سالىپ، اينالاسى بىرەر ايدا اۋىر سارساڭعا سالعان ىندەتكە بايلانىستى پرەزيدەنتىمىز وتانداستاردى سابىرعا شاقىرىپ قانا قويماي، ساقتانۋ شارالارىن جۇيەلەپ كورسەتىپ بەردى. قوعام بولىپ قولعا العاندا عانا جەدەل ەڭسەرىلەتىن ءجون-جوبانى اتادى. توتەنشە جاعدايدا كوپشىلىك اداسپاس امالدى ايقىنداپ، سەنىمدى كۇشەيتىپ، ءۇمىتتى ارتتىردى. ءسوز جوق، بۇل جولدا حالىققا ەرىك-جىگەر، قاجىر-قايرات كەرەك. سەنىم – تاۋەكەلدىڭ نەگىزى، يلانۋ – يمان مەن پاراساتقا سەرىك! ەڭ باستىسى، بۇدان دا قيىن كەزەڭدەردەن ابىرويمەن وتۋگە مۇمكىندىك بەرگەن ايرىقشا قازاقستاندىق جولىمىز، سونىڭ ىشىندە جالپىۇلتتىق تاتۋلىق پەن بىرلىگىمىزدىڭ بارى جادىمىزدا جاڭعىردى.

مەملەكەت – قاشاندا حالىق ارقا سۇيەيتىن تەگەۋرىندى كۇش. سوندىقتان قيىندىقتىڭ الدىن الاتىن ءتيىستى قارجى، الەۋەت قاراستىرىلىپ وتىر. وسى رەتتە ەكونوميكا تۇراقتىلىعى مەن بارلىق الەۋمەتتىك مىندەتتەمەلەردىڭ ورىندالۋى ساقتالاتىنىنا، وتاندىق كاسىپكەرلەردى قولداۋعا، جۇمىس ورىندارىن اشۋعا 300 ميلليارد تەڭگە بولىنەتىنىنە كەپىلدىك بەرىلدى. وزگە دە قاجەتتى قاراكەتتەر انىقتالىپ، كوزدەلگەن جوسپاردى ايقىنداپ-باقىلايتىن، ماڭىزدى جۇمىستاردى ۇيلەستىرەتىن كوميسسيا جاساقتالدى.

ارينە، مۇنداي كەزدە اۋرۋدى جۇقتىرعانىن جاسىرعاندار، ءزارۋ مەديسينالىق بۇيىمداردى قىمباتقا ساتۋدى كوزدەيتىن الاياقتار، ۇرەي شاقىرىپ، ارانداتۋعا باعىتتالعان قاۋەسەت، الىپ-قاشپا اقپارات تاراتاتىندار ۇشىراسۋى ابدەن مۇمكىن. ونداي زالال، ءقاۋىپ تۋدىراتىندار توتەنشە جاعدايعا لايىق قاتاڭ جازاعا تارتىلادى. بۇل – وركەنيەتتى ەلىمىزدىڭ ابىرويىن، ازاماتتاردىڭ قۇقىعىن قورعاۋعا باعىتتالعان زاڭدىق شارا. قاي زاماندا دا سىن ساعاتتاردا كوپشىلىكتىڭ جاي-كۇيىنە شىن الاڭدايتىن، رەتىنە قاراي قايىرمالدىق جاساۋعا تىرىساتىن ەلدىڭ ەستى ازاماتتارى مەن دارا تۇلعالارى بولادى. وسى جومارت تا باياندى ءداستۇرىمىزدىڭ بۇل جولى دا ەلدىك ىستەردى قولداپ-سۇيەمەلدەيدى دەپ سەنەمىز. ماسەلەن، ءقازىر استانادان اۋىلعا دەيىن اسا ءزارۋ تۇمشامەن (ماسكا) قامتاماسىز ەتۋگە قارجىلاي ۇلەس قوسسا نەمەسە ۆولونتەرلەر جالعىزىلىكتى قاريا كىسىلەرگە، وزگە دە مۇقتاج جاندارعا جان قالاۋىمەن قول ۇشىن بەرسە، قانداي لايىقتى قارەكەت بولار ەدى. مۇنى جارناماسىز جۇزەگە اسىرىپ جاتسا، جاقسىلىعى جەردە قالماس دەگەن پىكىردەمىز.

جالپى، ىندەتپەن كۇرەسكە بايلانىستى بارلىق ءىس-شارا بورىش پەن ادامگەرشىلىكتى، تياناقتىلىق پەن ءتارتىپتى تالاپ ەتەدى. پرەزيدەنت مەملەكەتتىك قولداۋدىڭ ءبارى قولدانىستاعى زاڭدارىمىزدىڭ شەگىندە جۇزەگە اسىرىلاتىن ءمالىم ەتتى.

دەنساۋلىققا قاتىستى جاۋاپتى كەزەڭدە حالىقتىڭ ءۇمىتى – مەديسينا قىزمەتكەرلەرىندە. ولاردىڭ كاسىبي ەڭبەگى مەن العاۋسىز كومەگىن ءاربىر ازامات سەزىنۋى قاجەت. ال، اق حالاتتى ابزال جاندار دا وسى جولى وزدەرىنىڭ ازاماتتىق پوزيسياسىن، قۇقىقتىق مادەنيەتىن تانىتادى دەپ سەنەمىز.

دەگەنمەن دە بارىنشا ساقتىق پەن ساقتانۋ وزىمىزگە بايلانىستى. حالىقتىڭ اماندىعىن ويلاساق، ءوزىمىزدىڭ، جاقىندارىمىزدىڭ دەنساۋلىعىنا قام جەسەك، جەكە تازالىق پەن ءتارتىپتى – ەلدىڭ تازالىعى مەن ءتارتىبى دەڭگەيىندە قابىلداي بىلۋگە ءتيىستىمىز. ءبىزدىڭ ياكي وتانىمىزدىڭ سالاماتتىلىعى – ءاربىرىمىزدىڭ قولىمىزدا. نيەت تە، جۇرەك تە، قول دا، قوعام دا تازا جانە سالاماتتى بولعاي!

دارحان مىڭباي
ءماجىلىس دەپۋتاتى