الماتى قالاسى بويىنشا كوروناۆيرۋستىق ينفەكسيانىڭ تارالۋىن بولدىرماۋ جونىندەگى قالالىق شتابتىڭ وتىرىسىندا 19 ناۋرىزدا COVID-2019 وشاعى ايماعىندا ىشكى كارانتين ەنگىزۋ تۋرالى شەشىم قابىلداندى، دەپ حابارلايدى اكىمدىكتىڭ باسپا ءسوز قىزمەتى.
20 ناۋرىزداعى جاعداي بويىنشا الماتىدا كوروناۆيرۋستىق ينفەكسيانى جۇقتىرعان 22 جاعداي تىركەلدى. بارلىعى زەرتحانالىق تۇردە راستالدى. الماتى قالاسى اۋماعىنداعى ەپيدەميولوگيالىق تەكسەرۋ ناتيجەلەرى بويىنشا COVID-2019-دىڭ 10 وشاعى انىقتالدى:
- المالى اۋدانى – 3؛
- مەدەۋ – 3؛
- تۇركسىب – 2؛
- جەتىسۋ – 1؛
- الاتاۋ – 1.
بارلىق وشاقتا ىندەتتىڭ ودان ءارى تارالۋىنىڭ الدىن الۋ ماقساتىندا ەپيدەمياعا قارسى جانە پروفيلاكتيكالىق ءىس-شارالار كۇشەيتىلدى. مەديسينا قىزمەتكەرلەرى وشاق ايماعىندا ورنالاسقان بارلىق تۇلعالاردىڭ جاعدايىنا مونيتورينگ جۇرگىزۋدە.
COVID-19 ىندەتىنىڭ تىركەلگەن وقيعالارىنا جانە ينفەكسيانىڭ تارالۋ سيپاتىنا قوسىمشا تالداۋ جۇرگىزگەننەن كەيىن جانە ەپيدەميولوگتاردىڭ قورىتىندىسىن نەگىزگە الا وتىرىپ، وشاق ايماعىنىڭ شەكاراسى كوپپاتەرلى ءۇيدىڭ كىرە بەرىسىنە دەيىن جانە تۇرعىن ءۇي اۋماعىنداعى جەكەمەنشىكتەگى ۇيگە دەيىن قىسقارتىلدى. وسىعان وراي ۇيلەر مەن پاتەرلەردى كۆارتال بويىنشا كارانتيندەۋ بويىنشا بۇعان دەيىن قابىلدانعان شەشىم كۇشىن جويادى.
جالپى ينفەكسيا 1-1،5 مەتر قاشىقتا تۇرعان ناۋقاس ادامنىڭ سويلەۋى، تۇشكىرۋى مەن جوتەلى ارقىلى بەرىلەدى. سوVID-2019 ىندەتىن جۇقتىرعان ادام وتباسىنداعى، جۇمىستاعى، قوعامدىق كولىكتە، قوناقتا جانە باسقا دا قوعامدىق ورىنداردا اينالاسىنداعىلاردى تەك تىعىز بايلانىستا بولۋ ارقىلى جۇقتىرۋى مۇمكىن. COVID-2019 ۆيرۋسىنىڭ قورشاعان ورتادا توزىمدىلىگى تومەن بولعاندىقتان 1 ساعاتتان ارتىق ءومىر سۇرە المايدى. سول سەبەپتى COVID-2019 جۇقتىرعان ناۋقاسپەن تىعىز بايلانىس ورناتپاعان ۇيلەر مەن پاتەرلەردى كارانتينگە جابۋدىڭ قاجەتى جوق. ينفەكسيانىڭ تارالۋىن توقتاتۋ بويىنشا ەپيدەمياعا قارسى شارالار تومەندەگىدەي:
- ىندەتتى جۇقتىرۋشىنى ستاسيونارعا وقشاۋلاۋ؛
- ناۋقاسپەن بايلانىستا بولعاندى ءۇي كارانتينىنە جابۋ؛
- ينفەكسيانىڭ بەرىلۋ جولى بويىنشا اركىم جەكە گيگيەنانى ساقتاپ، بەتپەردە كيۋى قاجەت.
وشاق ايماعىندا ورنالاسقان ۇيلەردىڭ تۇرعىندارى سىرتقا تەك قاجەتتىلىگى بويىنشا جانە مەديسينا مەن پوليسيا قىزمەتكەرىنىڭ بىرگە جىبەرىلەدى. بارلىق ازىق-تۇلىك دۇكەندەرى مەن ءدارىحانالار كۇشەيتىلگەن سانيتارلىق-ەپيدەميولوگيالىق جاعدايدا جۇمىسىن جالعاستىرۋدا. سونىمەن قاتار، اۋدان اكىمدىكتەرى حالىقتىڭ الەۋمەتتىك وسال توپتارىنا كومەك كورسەتۋدە. وشاق ايماعىندا ورنالاسقان تۇرعىندار اراسىندا ءتۇسىندىرۋ جۇمىستارى جۇرگىزىلۋدە.
پىكىر قالدىرۋ