قازاقستان پرەزيدەنتى قاسىم-جومارت توقايەۆ ەل حالقىن ناۋرىز مەيرامىمەن قۇتتىقتادى، دەپ حابارلايدى Qamshy.kz اقپارات اگەنتتىگى
"بارشاڭىزدى ۇلىستىڭ ۇلى كۇنى – ناۋرىز مەرەكەسىمەن شىن جۇرەكتەن قۇتتىقتايمىن! ءاز-ناۋرىز – جاڭاشىلدىق پەن جاسامپاز رۋحتىڭ جارشىسى. وسى كۇندەرى جەر-انا قايتا تۇلەپ، تىرشىلىك اتاۋلى تۇگەل جاندانادى. تاعىلىمى مول بۇل مەرەكە – جاڭارۋ مەن جاڭعىرۋدىڭ، ادام مەن تابيعات اراسىنداعى ۇندەستىكتىڭ، كەلىسىم مەن تاتۋلىقتىڭ التىن ارقاۋى"، - دەلىنگەن اقوردانىڭ باسپا ءسوز قىزمەتى جاريالاعان توقايەۆتىڭ قۇتتىقتاۋ سوزىندە.
سونىمەن بىرگە، ونىڭ جالپى ۇلتتىق مەيرام ەكەنىن ايتا وتىرىپ، بۇل مەرەكەنىڭ ققازاقستان حالقىن بەرەكە-بىرلىك پەن ورتاق مۇددەگە جۇمىلدىراتىنىن جەتكىزگەن.
ول وسى رەتتە قازاقستاندىقتاردى ۇلىستىڭ ۇلى كۇنىمەن قۇتتىقتاي وتىرىپ، مەيرامنىڭ كوروناۆيرۋس ىندەتىمەن تۇسپا-تۇس كەلگەنىنە وكىنىشىن دە بىلدىرگەن.
"پاندەمياعا اينالعان كوروناۆيرۋستىڭ كەڭىنەن تارالۋى جاھاندىق ەكونوميكامەن قاتار ءبىزدىڭ ەلىمىزگە دە ايتارلىقتاي زاردابىن تيگىزۋدە. بۇكىل الەم كۇردەلى سىناقتى باستان وتكەرۋدە. وسىعان وراي، مەنىڭ جارلىعىممەن 2020 جىلعى 16 ناۋرىزدان باستاپ قازاقستان اۋماعىندا توتەنشە جاعداي ەنگىزىلدى. مەملەكەتتىك كوميسسيا قۇرىلىپ، ازاماتتارىمىزدىڭ دەنساۋلىعىن قورعاۋ جانە ەلىمىزدەگى ەكونوميكالىق احۋالدى تۇراقتاندىرۋ ءۇشىن ناقتى شارالار قولعا الىندى. ءبىز ىرىس-ىنتىماعىمىزدىڭ ارقاسىندا بۇل قيىن-قىستاۋ كەزەڭنەن دە سۇرىنبەي وتەمىز دەپ سەنەمىن"، - دەپ سەندىردى قاسىم-جومارت توقايەۆ.
ءسوز سوڭىندا ول قازاقستاندىقتارعا ءوز تىلەگىن جەتكىزدى.
"سىزدەرگە زور دەنساۋلىق، باق-بەرەكە جانە تولايىم تابىس تىلەيمىن! ءاز-ناۋرىز ءار شاڭىراققا شاتتىق پەن قۋانىش اكەلسىن! ۇلىس وڭ، اق مول بولسىن!"، - دەدى مەملەكەت باسشىسى.
پىكىر قالدىرۋ