نۇر-سۇلتاندا ۆيرۋس تابىلعان 28 ادامنىڭ ىشىندە كاملەت جاسىنا تولماعان ەكى ادام بار. ونىڭ ءبىرى – ءتورت ايلىق ءسابي، ەكىنشىسى – 14 جاسار ءجاسوسپىرىم. بۇل تۋرالى قالالىق دەنساۋلىق باسقارماسى حابارلادى.

ولاردىڭ دەرەگىنشە، ۆيرۋس جۇقتىرعان 28 ادامنىڭ 18ء-ى 30 بەن 49 جاستاعىلار. ءتورت ادام 50-59 جاس ارالىعىنداعىلار بولسا، ءۇش ادامنىڭ جاسى 18-29 ارالىعىندا. 60 جاستان اسقان ءبىر ادام عانا ۆيرۋس جۇقتىرعان. 

باسقارمانىڭ مالىمەتىنشە، ۆيرۋس جۇقتىرعانداردان بولەك،  ءقازىر قالادا 645 ادام اۋرۋحانادا كارانتيندە جاتىر. 

رەسمي اقپارات بويىنشا، قازاقستاندا ۆيرۋس جۇقتىرعان 53 ادام انىقتالدى. نۇر-سۇلتاندا – 28 ادام، الماتىدا – 22 ادام، قاراعاندىدا – 2 ادام، الماتى وبلىسىندا 1 ادام ەمدەلىپ جاتىر.

قازاقستاندا Covid-19 كوروناۆيرۋسىن جۇقتىرعاندار العاش رەت 13 ناۋرىزدا انىقتالعان. كەيىن، 15 ناۋرىزدا – ۆيرۋس جۇقتىرعاندار سانى سەگىز ادامعا جەتكەندە پرەزيدەنت قاسىم-جومارت توقايەۆتىڭ جارلىعىمەن ەلدە 16 ناۋرىز تاڭعى سەگىزدەن 15 ءساۋىر تاڭعى جەتىگە دەيىن توتەنشە جاعداي جاريالانعان بولاتىن. ال 19 ناۋرىزدان باستاپ ەلدىڭ ەكى ءىرى قالاسى – نۇر-سۇلتان مەن الماتى كارانتينگە جابىلدى. 

سوڭعى اقپارات بويىنشا، دۇنيەجۇزىندە  275 مىڭنان استام ادام كوروناۆيرۋس جۇقتىرىپ،11 مىڭنان استام ادام ۆيرۋستان قايتىس بولعان. ۆيرۋس تارالعان ەلدەر سانى 180-نەن استى.