الماتى قالاسى اكىمى باقىتجان ساعىنتايەۆ توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ شەشىمدەرىن ىسكە اسىرۋ ماقساتىندا ەنگىزىلەتىن قوسىمشا شەكتەۋ شارالارى تۋرالى ايتتى.

 

قوسىمشا شارالارعا سايكەس 28 ناۋرىز ساعات 00.00-دەن باستاپ، 5 ءساۋىرى ساعات 23.59-عا دەيىن قالانىڭ تىنىس-تىرشىلىگىن قامتاماسىز ەتەتىن ۇيىمداردان بولەك، بارلىق ۇيىمدار مەن كاسىپورىنداردىڭ جۇمىسى ۋاقىتشا توقتاتىلادى. بۇل ساناتقا قالالىق باسقارۋ ورگاندارى، ازىق-تۇلىك، مەديسينالىق جانە ۆەتەرينارلىق نىساندار، قالانىڭ تىنىس-تىرشىلىگى مەن قاۋىپسىزدىگىن ۇزدىكسىز قامتاماسىز ەتەتىن قىزمەتتەر مەن ب ا ق كىرمەيدى.

 

قالادا ادامدار مەن جەكە كولىكتىڭ جۇرۋىنە تىيىم سالىنادى. تەك شۇعىل جاعدايدا عانا ءجۇرىپ-تۇرۋعا رۇحسات. ازىق-تۇلىك جانە دارى-دارمەكتەر الۋ ءۇشىن ءۇيدىڭ قاسىنداعى دۇكەن مەن ءدارىحاناعا بارعان ءجون. سونداي-اق ءۇي جانۋارلارىن سەرۋەندەتۋگە رۇقسات ەتىلگەن.

– 65 جاستان اسقان تۇرعىنداردىڭ كوشەگە شىقپاۋىن سۇرايمىن. بۇل رەتتە مۇقتاجدارعا الەۋمەتتىك قىزمەتكەرلەر مەن ەرىكتىلەر قاجەتتى كومەك كورسەتەدى. قالادا كامەلەتكە تولماعانداردىڭ ەرەسەكتەرسىز جۇرۋىنە بولمايدى، – دەدى الماتى قالاسىنىڭ اكىمى.

سونىمەن قاتار، قوعامدىق كولىكتىڭ جۇمىس كەستەسى ساعات 06.00-دەن كەشكى 19.00-گە دەيىن قىسقارتىلدى. ولاردا بارلىق سانيتارلىق-ەپيدەميولوگيالىق نورمالار ساقتالۋعا ءتيىس. قوعامدىق كولىكتەگى جولاۋشىلار 40%-دان اسپاۋى كەرەك. سونىمەن قاتار، قاۋىپسىزدىك جانە جۇرگىزۋشىلەردىڭ كوروناۆيرۋستى جۇقتىرۋ ءقاۋپىن ازايتۋ ماقساتىندا جۇرگىزۋشىلەرگە قوعامدىق كولىكتىڭ الدىڭعى ەسىكتەرىن اشۋعا تىيىم سالۋ تۋرالى شەشىم قابىلداندى.

سونداي-اق قالانى دەزينفەكسيالاۋ بويىنشا اۋقىمدى جۇمىستار جۇزەگە اسىرىلاتىن بولادى. ءاربىر اۋدان بويىنشا اۋماقتى وڭدەۋدىڭ جالپى كەستەسىن اۋدان اكىمدىكتەرىنىڭ اپپاراتتارى جانە دەزينفەكسيالىق وڭدەۋگە تارتىلعان باسقا دا ۇيىمدار جۇرگىزىپ، رەتتەيدى. دەزينفەكسيا جۇرگىزىلگەننەن دەنساۋلىققا زيان تيمەس ءۇشىن 5 ساعاتتاي دالاعا شىقپاۋ كەرەك.

ازىق-تۇلىك، دارى-دارمەك جانە ءبىرىنشى كەزەكتەگى قاجەتتى زاتتاردى جەتكىزۋ قىزمەتتەرى ساعات 9.00-دەن 22.00-گە دەيىن قولجەتىمدى بولادى. بارلىق ۇيىمدار، كاسىپورىندار مەن قالالىق قىزمەتتەردىڭ جۇمىسشىلارى سانيتارلىق قورعاۋ ءتارتىبىن كۇشەيتەدى.

توتەنشە جاعداي كەزىندە تۋىستارعا بارىپ، قوناق شاقىرۋعا تىيىم سالىنادى. جەرلەۋ راسىمىنە قاتىساتىندار 10 ادامنان اسپاۋ كەرەك. قالا كوشەلەرىندە قۇقىق قورعاۋ ورگاندارى مەن ق ر ۇلتتىق گۆاردياسىنىڭ وكىلدەرى تاۋلىك بويى باقىلايتىن بولادى. تارتىپكە باعىنباعاندار ءۇشىن اكىمشىلىك جانە قىلمىستىق جاۋاپكەرشىلىك كوزدەلگەن.