ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءبىرىڭعاي جيىنتىق تولەمگە اۋدارىم جاساماعان ازاماتتار 42 500 تەڭگەنى قالاي الاتىنىن ايتتى.

– 42 500 تەڭگەلىك الەۋمەتتىك تولەمدى الۋدا كوپشىلىككە مىناداي ءوتىنىشىمىز بار: بىرىنشىدەن، مالىمەتىڭىزدى دۇرىس تولتىرۋ كەرەك. ءوزىڭىزدىڭ ەسەپشوتىڭىزدى دۇرىس كورسەتىپ، جسن ءنومىرىن دۇرىس بەلگىلەۋ كەرەك. ەكىنشىدەن، سوڭعى ەكى ايدا بولسىن ساقتاندىرۋ قورىنا اۋدارىلعان الەۋمەتتىك تولەم بولۋعا ءتيىس. سەبەبى بۇل تولەم ءبىر كاسسادان تولەنىپ جاتقان جوق. مەملەكەتتىك ساقتاندىرۋ قورىنان اۋدارىلىپ جاتىر. ءبىراق وسىنداي الەۋمەتتىك تولەمدەرى مۇلدە جوق ازاماتتار دا بار. ياعني بەيرەسمي جۇمىس ىستەپ جۇرگەندەردىڭ ەڭبەك شارتتارى جوق، ولار سالىق تولەمەگەن. سوندىقتان بەيرەسمي جۇمىس ىستەپ جۇرگەن ازاماتتارعا پرەزيدەنت راسىمدەلۋ عانا جەتكىلىكتى ەكەنىن ايتتى. راسىمدەلۋ دەگەن نە؟ ول ءۇشىن ءبىرىڭعاي جيىنتىق تولەمدى ءبىر مەزگىل تولەسەڭىز جەتكىلىكتى. ول سوما قالا تۇرعىندارى ءۇشىن 2651 تەڭگە، اۋىل تۇرعىندارى ءۇشىن 1325 تەڭگە. وسىنى ءبىر تولەسەڭىزدەر 42500 تەڭگەنى اي سايىن الاتىن بولاسىزدار، – دەدى ءبىرجان نۇرىمبەتوۆ.

سونىمەن قاتار مينيستر ءبىرىڭعاي جيىنتىق تولەمدى قالاي جاساۋعا بولاتىنىن دا اتاپ ءوتتى.

– حالىق بانك، فورتە بانك، جۋسان بانك، سبەربانك، بسك، كاسپي بانكتەردە ءموبيلدى قوسىمشالار بار. سول ارقىلى ءبىرىڭعاي جيىنتىق تولەمدى اۋدارۋعا بولادى. بولماسا سمس ارقىلى: تەلەفوننان 5505 نومىرىنە حابارلاما جازىپ، قالا تۇرعىنى بولساڭىز لاتىن ارىپتەرىمەن «gorod ESP» دەپ جسن بەلگىلەيسىز، اۋىل تۇرعىنى بولساڭىز «selo ESP» دەپ جسن بەلگىلەيسىز. وسىنى جىبەرگەننەن كەيىن تولەمدەرىڭىز ەسەپكە تۇسەدى. وسىدان كەيىن 42 500 تەڭگەنى الۋعا مۇمكىندىگىڭىز بار، – دەدى مينيستر.

قازاقستاندا كوروناۆيرۋسقا بايلانىستى توتەنشە جاعداي جاريالانىپ، كەي قالالار مەن ايماقتار كارانتينگە جابىلعان سوڭ پرەزيدەنت قاسىم-جومارت توقايەۆ ۇكىمەتكە توتەنشە جاعداي كەزىندە تابىسىنان ايىرىلعاندارعا ەڭ تومەنگى جالاقى مولشەرىندە، 42500 تەڭگە (شامامەن 100 دوللار) جاردەماقى تولەۋدى تاپسىرعان بولاتىن.

سوڭعى دەرەك بويىنشا، قازاقستاندا 375 ادامنان كوروناۆيرۋس تابىلدى. ءۇش ادام ىندەتتەن كوز جۇمىپ، 26 ادام جازىلىپ شىقتى. 

♦وقي وتىرىڭىز: قازاقستاندا 42500 تەڭگەگە بايلانىستى جاڭا سايت ىسكە قوسىلادى