قازاقستاندا جۇمىسىنان ايرىلىپ، تابىسسىز قالعان ازاماتتار ۇكىمەت بەرەتىن 42500 تەڭگە جاردەماقىنى الۋ ءۇشىن جاڭادان اشىلاتىن ارنايى سايتتا ءوتىنىش قالدىرا الادى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى. 

ءمينيستردىڭ ايتۋىنشا، ارنايى سايت ەرتەڭ ىسكە قوسىلادى، ول سايتتا الەۋمەتتىك تولەم الۋ جولى وڭاي بولادى.

"ەلەكتروندى ۇكىمەت پورتالىنا (رەد. Egov.kz)  ءقازىر كوپ ادام كىرە الماي جاتىر. سوندىقتان ەڭبەك جانە حالىقتى الەۋمەتتىك قورعاۋ مينيسترلىگى بتس كومپانياسىمەن بىرلەسە وتىرىپ، 42500 تەڭگەنى الۋ ءۇشىن ارنايى سايت اشامىز. ول سايتتا ازاماتتار ءوز ءوتىشىنىن قالدىرا الادى. سايت ەرتەڭ تاڭەرتەڭ ىسكە قوسىلادى. ول جەردە ەسق جوق بولسا، سمس ارقىلى تىركەلۋگە بولادى. ال كومپيۋتەرلەرى جوق ادامدار telegram-بوت ارقىلى ءوتىنىش بەرۋگە بولادى" دەدى نۇرىمبەتوۆ.

قازاقستاندا كوروناۆيرۋسقا بايلانىستى توتەنشە جاعداي جاريالانىپ، كەي قالالار مەن ايماقتار كارانتينگە جابىلعان سوڭ پرەزيدەنت قاسىم-جومارت توقايەۆ ۇكىمەتكە توتەنشە جاعداي كەزىندە تابىسىنان ايىرىلعاندارعا ەڭ تومەنگى جالاقى مولشەرىندە، 42500 تەڭگە (شامامەن 100 دوللار) جاردەماقى تولەۋدى تاپسىرعان بولاتىن. 

سوڭعى دەرەك بويىنشا، قازاقستاندا 375 ادامنان كوروناۆيرۋس تابىلدى. ءۇش ادام ىندەتتەن كوز جۇمىپ، 26 ادام جازىلىپ شىقتى.