قازاقستان رەسپۋبليكاسى پرەزيدەنتى جانىنداعى توتەنشە جاعدايدى قامتاماسىز ەتۋ جونىندەگى مەملەكەتتىك كوميسسيانىڭ ۇسىنىسى نەگىزىندە، نۇرسۇلتان نازاربايەۆتىڭ باستاماسىمەن قۇرىلعان «Birgemiz» قوعامدىق قورى، قازاقستاندىق «سق-فارماسيا» ۇكىمەتتىك  وپەراتورىمەن 5 ميلليون ماسكا الۋعا كەلىسىم جاسادى.

بۇعان دەيىن ەلىمىزدىڭ تۇڭعىش پرەزيدەنتى قاۋىپسىزدىك كەڭەسىنىڭ وتىرىسىندا كوروناۆيرۋستىڭ تارالۋىنا قارسى كۇرەس شارالارى اياسىندا، مۇقتاج جانداردى قاجەتتى قورعانىس قۇرالدارىمەن، ونىڭ ىشىندە مەديسينالىق ماسكالارمەن قامتاماسىز ەتۋ قاجەت ەكەنىن ايتقان بولاتىن. 

قور ءتوراعاسى رۋسلان ساكەيەۆتىڭ ايتۋىنشا، ساتىپ الىنعان ماسكالار كوروناۆيرۋستان ەڭ كوپ زارداپ شەككەن قالالار – نۇر-سۇلتانعا (2 ملن. دانا)، الماتىعا (2 ملن. دانا) جانە شىمكەنتكە (1 ملن. دانا) جەتكىزىلەدى.

«سق-فارماسيا» كەلىسىم بويىنشا اتالعان قالالارعا ماسكانى 10 كۇن ىشىندە جەتكىزۋگە مىندەتتى. ءبىر ماسكا باعاسى ونىڭ قالالارعا جەتكىزىلۋ قۇنىن قوسا ەسەپتەگەندە 118 تەڭگەنى قۇرايدى. سونداي-اق، ساتىپ الىنعان ماسكالاردىڭ ساپاسىنا دا «سق-فارماسيا» جاۋاپتى. ءوز كەزەگىندە، اكىمدىكتەر بۇعان دەيىن قورمەن جاساسقان مەموراندۋمعا سايكەس، ماسكالاردىڭ تاراتىلعانى تۋرالى ەسەپ بەرە وتىرىپ، ولاردىڭ ءتيىستى مەكەن-جايلارعا ۋاقىتىلى جەتكىزىلۋىن قامتاماسىز ەتۋى كەرەك.

«ماسكالار ەڭ الدىمەن، تۇرعىنداردىڭ ۆيرۋس جۇقتىرۋ ءقاۋىپى جوعارى ءالسىز توپتارىنا، ونىڭ ىشىندە جالعىز باستى قارتتارعا، كوپبالالى جانە از قامتىلعان وتباسىلارعا، جەتىم بالالارعا، ۇوس-نىڭ ارداگەرلەرىنە جانە ولارعا تەڭەستىرىلگەندەرگە، تىل ەڭبەككەرلەرىنە، ەرەكشە قاجەتتىلىكتەرى بار ازاماتتار مەن مۇمكىندىگى شەكتەۋلى بالالاردى كۇتۋشى ادامدارعا ارنالعان»، – دەدى رۋسلان ساكەيەۆ.

ەسكە سالا كەتەيىك، «Birgemiz» قوعامدىق قورى ەلباسىنىڭ باستاماسىمەن كوروناۆيرۋسقا قارسى كۇرەس جاعدايىندا حالىقتىڭ مۇقتاج توپتارىن قولداۋ ماقساتىندا قۇرىلدى. بۇگىندە قورعا 13 ميللياردتان استام تەڭگە ءتۇستى. كومەك الۋشالاردىڭ تىزىمدەرىن ناقتىلاۋ ءۇشىن اكىمدىكتەر جانە الەۋمەتتىك قامسىزداندىرۋ مەكمەلەرىمەن بەلسەندى جۇمىس جۇرگىزىلۋدە. كورسەتىلگەن كومەكتىڭ بارلىق تۇرلەرى مەن تۇسكەن قاراجات بويىنشا ۇيىمنىڭ سايتىندا جانە الەۋمەتتىك جەلىلەردە ۇدايى اقپاراتتار جاريالانىپ، جۇرتشىلىققا تۇراقتى تۇردە ەسەپ بەرىلەدى.

 انىقتاما ءۇشىن:

«سق-فارماسيا» كومپانياسى 2009 جىلدىڭ اقپان ايىندا قازاقستان رەسپۋبليكاسىنىڭ ۇكىمەتىمەن حالىقتى تەگىن مەديسينالىق كومەكتىڭ كەپىلدەندىرىلگەن كولەمى شەڭبەرىندە دارى-دارمەكپەن قامتاماسىز ەتۋ، فارماسيەۆتيكا سالاسىنىڭ تۇراقتىلىعى مەن باسەكەگە قابىلەتتىلىگىن ارتتىرۋ ماقساتىندا قۇرىلدى.