تۇركىستان وبلىسىنىڭ قوعامدىق دەنساۋلىق باسقارماسى ايماقتاعى كوروناۆيرۋس جۇقتىرعان ناۋقاستار مەن قايتىس بولعان ادام تۋرالى ايتتى. 

"وكىنىشكە قاراي، بۇگىن تاڭەرتەڭ تۇركىستان وبلىسىندا كوروناۆيرۋس ىندەتىنەن جەتىساي اۋدانىنىڭ 1956 جىلعى تۇرعىنى قايتىس بولدى. ناۋقاس 29 ناۋرىزدا اۋرۋحاناعا جاتقىزىلعان. پنيەۆمونيا انىقتالىپ، تىنىس الۋى قيىنداعان. ناۋقاس قانت ديابەتىمەن، گيپەرتونيامەن اۋىرعان. بارلىق سىناما الىنىپ، ەمدىك شارالار جۇرگىزىلدى. ناۋقاستىڭ جاعدايى ناشارلاپ، بۇگىن تاڭەرتەڭ كوز جۇمدى"، - دەدى باسقارما ماماندارى.

ناۋقاس ءبىر اي بويى الماتى وبلىسىنىڭ قاراساي اۋدانىندا قوناقتا بولعان.

"15 ناۋرىزدا الماتىدان اۆتوبۋسپەن ۇيىنە كەلگەن. الماتى قالاسىنان كەلگەنىن جاسىرعان. جاقىن قارىم-قاتىناستا بولعان 25 ادام، ىقتيمالدى بايلانىستا بولعان 40 ادامدار تەكسىرىلدى. جاعداي باقىلاۋدا"، - دەدى تۇركىستان وبلىسىنىڭ قوعامدىق دەنساۋلىق باسقارماسى وكىلى.