قازاقستان ءقاۋىپتى دەرتتىڭ الدىن الۋعا الەم ەلدەرىنىڭ ەڭ العاشقىلارىنىڭ ءبىرى بولىپ كىرىستى. ءتيىستى ساقتاندىرۋ شارالارى جاسالدى. مەملەكەتتىك ورگاندار ارناۋلى دايىندىقتان وتكىزىلدى. وزگە ەلدەردە ۆيرۋس قالاي پايدا بولىپ، پاندەميا قالاي ءوربىپ، ورشىگەنى باقى­لاندى. سونىڭ ناتيجەسىندە ىندەتتىڭ ەتەك الىپ كەتۋىنە مۇمكىندىگىنشە جول بە­ءرىل­مەي، احۋال كۇن سايىن تۇراقتى نازاردا ۇستالىپ وتىر. جاعدايدى وڭالتۋ ءۇشىن كوپ جۇمىس ىستەلدى، ءالى دە تالاي شارۋا اتقارىلاتىن بولادى.  يگى ماقساتتاعى ءىس-شارالاردىڭ بارىنە جەر-جەرلەردە بۇكىل حالىق بولىپ قولداۋ كورسەتكەنىمىز ءجون.

تاۋەلسىزدىكتىڭ ەڭ العاشقى كۇندەرى­نەن باستاپ مەن ۇلى اباي اتامىز­دىڭ «كىمگە دوستىعىڭ بولسا، دوس­تىق دوس­تىق شاقىرادى» دەگەن دانا قاعي­­دا­سىن باسشىلىققا الىپ، الەمنىڭ بار­لىق مەم­­لەكەتىمەن اراداعى كەلىسىم مەن دوس­تىق­قا، ءوزارا سەنىم مەن ىقپال­داستىققا نە­گىزدەلگەن ساياسات ۇستاندىم. ەگە­مەن­دىك­­ءتىڭ باستاپقى جىلدارىندا ىرگەلەس ەل­­دەر­­ءدىڭ بارىمەن تاتۋ قارىم-قاتى­ناس ور­نا­­تىپ، شەكارا ماسەلەسىن تۇبە­گەيلى شەش­­كەن­نەن كەيىن ءتۇرلى دەڭگەي­دەگى ىنتى­­­ماق­تاستىق ۇيىمدارىن قۇرۋعا باس­تاماشى بولعانىمنىڭ باستى سەبەبى دە سول ەدى.

ەۋرازيا ەكونوميكالىق وداعىن، شان­حاي ىنتىماقتاستىق ۇيىمىن، ازيا­داعى ءوزارا ىقپالداستىق جانە سەنىم شا­را­لارى جونىندەگى كەڭەستى قۇرىپ، ەۋ­رو­پا­داعى قاۋىپسىزدىك جانە ىنتىماقتاستىق ۇيىمىنىڭ تاريحي ءسامميتىن، استانا ەكونوميكالىق فورۋمى مەن بۇكىلالەمدىك ەكسپو كورمەسىن وتكىزۋ شارالارىنىڭ ءبارى – قازاقستان مەن دۇنيە ءجۇزى مەملەكەتتەرى اراسىنداعى ءوزارا دوستىق پەن سەنىمگە نەگىزدەلگەن بايلانىستى، ەكونوميكالىق ىنتىماقتاستىقتى نىعايتۋ ءۇشىن جاسالدى. ءومىردىڭ ءوزى، ءدال بۇگىنگى قا­لىپ­تاسقان جاعداي ءبىز ۇستانعان ءبىرى­گۋ مەن بىرلەسۋگە نەگىزدەلگەن ساياساتتىڭ ءبىر­دەن-بىر دۇرىس جول ەكەندىگىنە كوزى­ءمىزدى جەتكىزىپ وتىر.

جاھان جۇرتشىلىعىن ابىگەرگە سالعان پاندەميا بۇكىل الەمدە جاڭا ەكو­نو­ميكالىق داعدارىس تۋعىزدى. الىپ كاسىپ­ورىنداردىڭ جۇمىسى توقتادى، كولىك اتاۋلىنىڭ قوزعالىسى شەكتەلدى. مۇ­نايدىڭ باعاسى قۇلدىرادى. ەل مەن ەل اراسىنداعى شەكارالار جابىلىپ، الىس-بەرىس تىيىلدى. مۇنىڭ ءبارى بۇرىن-سوڭدى بولماعان اسا اۋقىمدى رەسەسسياعا اكەلىپ سوقتىرىپ، جۇمىسسىزدىقتى كوبەيتىپ وتىر.

ءبىزدىڭ وتانىمىز قازاقستان – قازبا بايلىقتارعا، ونىڭ ىشىندە مۇنايعا باي ەل. مەن «بىزدە مۇناي مەن گاز بار ەكەن دەپ ۇنەمى سوعان تاۋەلدى بولعان دۇرىس ەمەس» دەپ تالاي مارتە ايتقانمىن. سوندىقتان ەگەمەندىك جىلدارى ءبىز ەل ەكونوميكاسىن ارتاراپتاندىرۋمەن بولدىق. وسى ماقساتتى جۇزەگە اسىرۋ ءۇشىن «قازاقستان-2050» ستراتەگياسىن جاساپ، «ۇدەمەلى يندۋستريالىق-يننوۆاسيالىق دامۋ» باعدارلاماسى اياسىندا 1000-نان استام جاڭا كاسىپورىن اشتىق. سونىڭ ارقاسىندا الەمدىك باسەكەگە قابىلەتتى ونىمدەر شىعارىلىپ، ەلىمىزگە جاڭا تەحنولوگيالار كەلدى. بۇل ەلىمىزدىڭ ءۇشىنشى تەحنولوگيالىق جاڭعىرۋىنا جول اشتى.

ەل اۋماعىندا بۇرىن-سوڭدى بول­ما­عان تەمىرجول، اۆتوكولىك جولدارى سا­لىندى.

جۇيەلى جۇرگىزىلگەن رەفورمالار ناتيجەسىندە اۋىل شارۋاشىلىعى دا ايتارلىقتاي دامىپ، قازاقستان ءوزىن ەت، ءسۇت جانە تاعى باسقا دا ازىق-تۇلىك ونىمدەرىمەن ەمىن-ەركىن قامتاماسىز ەتىپ قانا قويماي، الەمدەگى استىق ەكسپورتتاۋشى العاشقى التى مەملەكەتتىڭ قاتارىنا قوسىلدى.

بولاشاق ءۇشىن، الدا كۇتىپ تۇرعان وسىنداي الماعايىپ زاماندار سىناعىن ەركىن ەڭسەرۋ ءۇشىن كوپ قارجى-قاراجات سالىپ، زور جاۋاپكەرشىلىكپەن اتقارىلعان بۇل رەفورمالاردىڭ دۇرىس بولعانىن ءومىردىڭ ءوزى دالەلدەدى.

ءبىزدىڭ اتا زاڭىمىزدىڭ ءبىرىنشى بابىندا «قازاقستان رەسپۋبليكاسىنىڭ ەڭ قىمبات قازىناسى – ادام جانە ونىڭ ءومىرى» دەپ ناقتى جازىلعان. سوندىقتان ەلىمىزدە دەنساۋلىق ساقتاۋ سالاسىن دامىتۋعا ايرىقشا كوڭىل ءبولىندى. «سالاماتتى قازاقستان» باعدارلاماسىن قابىلداپ، بارلىق وڭىردە بۇرىن بولماعان جۇزدەگەن زاماناۋي اۋرۋحانا مەن ەمحانا سالدىق. ەلوردادا الەمدىك دەڭگەيدەگى ەڭ وزىق تەحنيكالارمەن جاراقتالعان اسا ءىرى عىلىمي-مەديسينالىق ورتالىقتار اشىپ، ونىڭ ماماندارىن الەمنىڭ ەڭ دامىعان ەلدەرىندە تاجىريبەدەن وتكىزدىك جانە «بولاشاق» باعدارلاماسى اياسىندا وقىتتىق. وسىلاي الدىن الا قامدانۋدىڭ ناتيجەسىندە ۇلت دەنساۋلىعىنا قاتەر توندىرگەن بۇگىنگىدەي قيىنشىلىق زاماندا جۇقپالى دەرتتىڭ ءدال دياگنوستيكاسىن جاساۋ، ونىڭ الدىن الۋ، ناۋقاستى ەمدەۋ سياقتى ءتيىستى شارالاردى ءبىزدىڭ دارىگەرلەرىمىز جوعارى كاسىبي دەڭگەيدە اتقارۋدا.

ارينە قالىپتاسىپ وتىرعان جاعداي وڭاي ەمەس. بۇل – بۇكىل الەم مەملەكەتتەرىنە تۇسكەن زور اۋىرتپاشىلىق. ءبىز ونى وسىنداي سىن ساعاتتا سەپتىگىن تيگىزەتىن حالقىمىزدىڭ توزىمدىلىگى، ەرىك-جىگەرى جانە وزىنە دەگەن زور سەنىمى ارقاسىندا مىندەتتى تۇردە جەڭىپ شىعامىز. ول ءۇشىن بىزگە قاجەتتى نارسە – قارجى-قاراجات، ماتەريالدىق رەسۋرس، تەحنيكا، ازىق-تۇلىك – ءبارى بار. الاڭدايتىن، ابىرجيتىن ەش نەگىز جوق.

ادەتتە جۇرت كوڭىلى الاڭ وسىنداي كەزدە ەل ىشىنە ۇرەي تاراتىپ، بايبالام سالۋشىلار ءوز مۇددەسىنە پايدالانۋعا تىرىسادى. مەن حالىقتى ءارتۇرلى سونداي ازعىرىندى، ارزان اڭگىمەلەرگە ەرۋدەن ساق بولۋعا شاقىرامىن. شىنىمەن كوپتىڭ قامىن كوزدەيتىن ادام ايعايشىل كۇشىمەن ەمەس، يگىلىكتى ىسىمەن قىزمەت ەتكەنى دۇرىس. عايبات پەن بايبالام ورنىنا عىلىم-بىلىممەن شۇعىلدانعان ابزال.

بۇگىنگى كۇرەس داڭقتى قولباسشى باۋىرجان مومىش ۇلىنىڭ: «ءتار­ءتىپسىز – ەل بولمايدى، تارتىپكە باس يگەن ەل قۇل بولمايدى» دەگەن قاناتتى ءسوزىن ەسكە سالادى جانە سونى بەكەم ۇستانۋدى تالاپ ەتەدى. وزدەرىڭىز بىلەسىزدەر، بۇل پاندەميانى كورشىمىز جۇڭگو ەلى ۇيىمشىلدىعى مەن تەمىردەي بەرىك ءتارتىبىنىڭ ارقاسىندا اۋىزدىقتاي الدى.

قازىرگى قازاقستاندى كەڭەس وداعى ىدىراعان وتكەن عاسىردىڭ 90-جىل­دارىنداعى قازاقستانمەن سالىستىرۋعا بولمايدى. بىزدە وسىنداي قيىندىق تۋعاندا ەشكىمگە الاقان جايماۋ ءۇشىن، ۇرپاق قامى، ەل بولاشاعى ءۇشىن جيناق­تالعان ۇلتتىق قور مەن التىن-ۆاليۋتا قورىندا 90 ميلليارد اقش دوللارى بار. رەتىمەن، ۇنەمدى پايدالانار بولساق، ول بۇگىن باسىمىزعا تۇسكەن تاعدىر مەن تاريح سىنىنان ەڭسەمىزدى تىك ۇستاپ وتۋىمىزگە مول مۇمكىندىك بەرەدى.

ەل پرەزيدەنتى قاسىم-جومارت كەمەل ۇلى توقايەۆ حالىققا ارناعان تاياۋداعى ۇندەۋىندە بارلىق الەۋمەتتىك توپتارعا، كاسىپكەرلەرگە، اۋىل شارۋاشىلىعى سالاسىنا كورسەتىلەتىن الۋان ءتۇرلى كومەك تۋرالى جان-جاقتى ماعلۇمات بەردى. ەگەر قازاقستاننىڭ ۇلتتىق ەكونوميكاداعى قول جەتكىزگەن تابىستارى مەن جوعارىدا اتالعان قور قۇرىلماسا، مۇنىڭ ءبىرى دە بولماس ەدى. كەزىندە سونىڭ ءبارىن تاراتىپ بەرەيىك دەگەندەر دە بولعان، ءبىراق ءومىر ءبىز قابىلداعان شەشىمنىڭ دۇرىس بولعانىن كورسەتتى.

ەندى ۇكىمەت پەن جەرگىلىكتى اتقا­رۋ­شى ورگاندارى سونى ۇنەمدى تۇردە، رەت-رەتىمەن ورىنداۋعا كىرىسۋى كەرەك. ءار مينيستر، ءاربىر وبلىس، قالا جانە اۋدان باسشىلارى جۇيەمەن، تارتىپپەن، ۇيلەسىممەن، ناقتى جوسپارمەن، نىق سەنىممەن ارەكەت ەتىپ، ۋاقىتشا قيىن­دىقتان شىعۋعا بارلىق كۇش-قۋاتتى جۇمىلدىرۋى قاجەت. Nur Otan پار­تياسىنىڭ مۇشەلەرى دە وسى ءبىر ساۋاپتى ءىستىڭ الدىڭعى قاتارىنان تابىلۋى ءتيىس.

ەلىمىزدىڭ ەڭ ۇلكەن بايلىعى – ادام مەن ونىڭ ءومىرى بولعاندىقتان، ءاربىر ادام ءوزىنىڭ، وتباسىنىڭ، اتا-اناسى مەن بالا-شاعاسىنىڭ ومىرىنە، دەنساۋلىعىنا زور جاناشىرلىقپەن، ەرەكشە جاۋاپكەرشىلىكپەن قاراۋى كەرەك. ويتكەنى ۇلت دەنساۋلىعى – مەملەكەت قاۋىپسىزدىگىنىڭ قۇرامداس بولىگى.

ءدال وسى تۇستا بارىمىزگە حالقى­مىز­دىڭ ءاردايىم ۇلكەنگە قۇرمەت كورسە­ءتىپ، كىشىگە قامقور بولاتىن ابزال قا­سيەت­تەرى سەپتىگىن تيگىزەدى دەپ سەنەمىن.

ادامنىڭ وزىنە دەگەن سەنىمى – ۇلكەن كۇش. بۇل بويىمىزعا – قاجىر، دەنەمىزگە – قۋات، جۇرەگىمىزگە سەنىم ۇيالاتادى. ءبىز ءقازىر كومەككە اسا مۇقتاج قاريالاردى، ارداگەرلەرىمىزدى، كوپبالالى انالاردى، ءال-اۋقاتى تومەندەردى، جۇمىسقا جارامسىز جانداردى ەرەكشە قامقورلىققا الۋى­مىز كەرەك. حالقىمىزدىڭ بويىن­داعى ۇرپاقتان ۇرپاققا ۇزىلمەي جەتكەن ەڭ ىزگى قاسيەتتەر ءبىزدى وسىعان ۇندەيدى.

ءدال ءقازىر بۇكىل ادامزات جولايرىقتا تۇر. الەمدىك گەوساياساتتى، ەكونوميكانى، ەكولوگيانى، قوعام ءومىرىنىڭ سان الۋان سالاسىن قامتىپ، تىزبەكتەلە كەلگەن، بۇرىن-سوڭدى بولماعان پروبلەمالار الەم مەملەكەتتەرىنىڭ قارىم-قاتىناسىن دا وزگەرتە باستادى. ءۇندى حالقىنىڭ ۇلى گۋمانيست قايراتكەرى ماحاتما گاندي: «الەمدى وزگەرتۋ ءۇشىن اۋەلى ءوزىمىز وزگەرۋىمىز كەرەك»، دەگەن ەكەن. كەشە عانا ءبىر-بىرىن اياقتان شالىپ، جاعادان الىپ، «سانكسيالىق سوعىستارعا» جول اشقان مەملەكەتتەر ەندى ءوزارا كومەك قولىن سوزىسۋدا. بۇل – جاھاندىق دەڭگەيدەگى ۇلكەن وزگەرىستەردىڭ باستاۋى.

الەم تاريحىندا ونداعان جىلعا، ءتىپتى ءجۇز جىلدان دا استام ۋاقىتقا سوزىلعان تالاي سوعىستار، شيەلەنىستى جاعدايلار مەن كيكىلجىڭدەر ورىن العان. ميلليونداعان ادامدى باۋداي تۇسىرگەن ىندەتتەر دە از بولماعان. ادامزات سونىڭ ءبارىن جەڭگەن. جان القىمنان الىپ تۇرعان بۇل شىرعالاڭنان دا شىعامىز. الەمنىڭ ەڭ الپاۋىت مەملەكەتتەرى وسى قيىندىقتان ساباق الۋى كەرەك.

كەزىندە ايتەكە بي بابامىز: «ەل مۇراتى – كورەشەك، ەر مۇراتى – كەلەشەك. وسىلاردى ويلاعان – قويماس ءتۇبى سۇيىنبەي»، دەگەن ەكەن. قانداي كەرەمەت ايتىلعان ءسوز! ءدال ءقازىر بىزگە بۇكىل ادامزات وركەنيەتىن سۇرىندىرەتىن ەمەس، بارشا الەم حالقىن سۇيىندىرەتىن جاڭاشىل ساياسات كەرەك.

كەز كەلگەن قيىندىق ادامدى تىعى­رىقتان شىعۋعا، وزگەشە ويلاۋعا، قالىپ­تاسقان جۇمىس تاسىلدەرىن جەتىلدىرۋگە باستايدى. ال بۇل عىلىم مەن تەحنولوگيانى دامىتۋعا، سەرگەك ءومىر سالتىن قالىپتاستىرۋعا الىپ كەلەدى. بۇگىندە ەڭبەكتى ۇيىمداستىرۋدىڭ كرەاتيۆتى ادىستەرى، ءتىپتى جاڭا كاسىپ تۇرلەرى شىعا باستادى. ءقازىر ادامدار بىرتىندەپ قاعازباستىلىقتان ارىلىپ، قاشىقتان جۇمىس ىستەۋ رەجىمىنە كوشتى. وسىنىڭ ءبارى ءبىر كەزدە الدىن الا جوسپارلانىپ، كەڭىنەن ويلاستىرىلعان شارالاردىڭ ارقاسىندا عانا مۇمكىن بولىپ وتىر.

رۋحى مىقتى، وزىنە سەنىمدى ادامدى قيىندىقتار شىنىقتىرادى. سوندىقتان ءبىز بويكۇيەزدىكتەن، سارىۋايىمنان، ەنجارلىقتان ارىلىپ، تىعىرىقتان شىعۋدىڭ جولىن ىزدەگەن بۇكىل الەم حالقىمەن بىرگە شيرىعا، شىڭدالا ءتۇسۋىمىز كەرەك.

«بىرلىك جوق جەردە تىرلىك جوق»، دەگەن ەكەن ايگىلى دانىشپان تولە بي. بەرەكە-بىرلىكتىڭ المايتىن قامالى، باعىندىرمايتىن بيىگى بولمايدى. ءبىز ءۇشىن اتا-بابالارىمىز عاسىرلار بويى اڭساپ كۇتكەن، 30 جىلعا جۋىق ۋاقىت بۇرىن قولىمىز جەتكەن ازاتتىقتى ماڭگى باياندى ەتۋدەن اسقان مۇرات جوق. قازاقستان – حالقىمىز ءتاتۋ-تاتتى جانە كە­ءلى­سىمدە ءومىر ءسۇرىپ جاتقان ورتاق شاڭى­راعىمىز. الۋاندىعىمىز – باسەكەلى جانە جاھاندىق الەمدەگى ءبىزدىڭ باعا جەتپەس بايلىعىمىز بەن ارتىقشىلىعىمىز. تاۋەلسىزدىك جىلدارى قول جەتكىزگەن بارلىق تابىسىمىزدىڭ قاينارى – ەڭ الدىمەن حالقىمىزدىڭ بەرەكە-بىرلىگى. اللا تاعالا ءبىزدى وسى بىرلىگىمىزدەن دە، تىرلىگىمىزدەن دە ايىرماسىن.

مەن ءسوزىمدى الدىمەن اعا ۇرپاق پەن زيالى قاۋىم وكىلدەرىنە ارنايمىن: حالىقتى ىنتىماققا شاقىرىپ، جاقسىلىققا، ىزگى امالدار جاساۋعا، سالاماتتى ءومىر سالتىن ۇستانۋعا ۇندەڭىزدەر. «ىرىس الدى – ىنتىماق» ەكەنىن ۇمىتپاڭىزدار. جاستاردى ەڭبەككە، ءبىلىم الۋعا، قاتارىنىڭ الدى بولۋعا تاربيەلەڭىزدەر. ۇرپاق الدىنداعى جاۋاپكەرشىلىك ءبىزدى وسىعان مىندەتتەيدى.

جاڭا وسكىن – جاس ۇرپاققا ايتارىم: تاۋەلسىزدىك جىلدارى دۇنيەگە كەلگەن سەندەر كەلەر جىلى وردا بۇزار وتىزعا تولاسىڭدار. ەلىمىزدەگى ەڭ قۋاتتى كۇش – وزدەرىڭسىڭدەر. اعا ۇرپاق سەندەر ءۇشىن قولدان كەلگەننىڭ ءبارىن جاسادى، ەندى سەندەردىڭ دە كۇش-قايرات جۇمسايتىن كەزدەرىڭ كەلدى. جاماندىقتان، جات ادەتتەن ساقتانىپ، يگى ىستەر جاساۋعا ۇمتىلىڭدار. ۇلكەنگە – ىزەتتى،  كىشىگە  – قامقور، بىر-بىرىڭە دوس بولىڭدار. «ءبىرىڭدى، قازاق، ءبىرىڭ دوس، كورمەسەڭ – ءىستىڭ ءبارى بوس» دەگەن اباي اتالارىڭنىڭ وسيەتىن ەشقاشان ەستەن شىعارماڭدار.

كاسىپكەرلەرگە دە ارنايى ايتارىم بار: سىزدەر تاۋەلسىزدىكتىڭ ارقاسىندا ءوز ىستەرىڭىزدى قالىپتاستىرىپ، اياقتارىڭىزعا نىق تۇردىڭىزدار، مول داۋلەتكە كەنەلدىڭىزدەر. ەندى «مەن ەلىمە نە بەرەمىن؟» دەيتىن كەزدەرىڭىز دە كەلدى.

وسى ورايدا، مەنىڭ ءوتىنىشىم بويىنشا ءوز وتانداستارىنا قول ۇشىن بەرىپ، قارجىلاي، زاتتاي كومەكتەسىپ جاتقان كاسىپكەر ازاماتتار بارشىلىق. وسى ءبىر جاراسىمدى ءۇردىس، يگى ءىس ودان ءارى جالعاسىن تابادى دەپ سەنەمىن.

ۇرپاق پەن ءداستۇر ساباقتاستىعى بولعان جەردە عانا يگىلىك پەن ىزگىلىك قاتار وركەن جايادى. وسى قاسيەتتى قاعيدا ءاربىر قازاقستاندىقتىڭ جادىنان، جۇرەگىنەن ورىن الۋى كەرەك.

ماعان نەبىر قيىن-قىستاۋ كۇندەردە ەشقاشان نامىسىن بەرمەگەن، قاشاندا بىرلىگى بەكەم، پەيىلى كەڭ، قۇشاعى اشىق، باۋىرمال حالىققا باسشىلىق ەتۋ باقىتى بۇيىردى. سوندىقتان قازىرگىدەي الابۇرتپا كوڭىل جاعدايىندا دانا دا دارقان حالقىما – بارشاڭىزعا زور ريزاشىلىققا تولى وسى سوزدەرىمدى جولدادىم.

ءبىز تاۋەلسىزدىك جىلدارى سان الۋان قيىندىق پەن داعدارىستى باستان ءوت­كەر­دىك. سونىڭ بارىندە مەن انىق جاعدايدى، تۇيتكىلدى پروبلەمالاردى اشىق تۇردە الدارىڭىزعا جايىپ سالىپ وتىردىم. ءسىز­دەر ماعان ۇنەمى سەنىم ارتتىڭىزدار، مەن تۋعان حالقىمنىڭ سول سەنىمىنەن ۇدايى كۇش-قۋات الدىم. سول ءۇشىن ءسىز­دەر­­گە تاعى مىڭ دا ءبىر العىسىمدى ءبىلدى­رە­ءمىن.

ۇلت دەنساۋلىعى مەن مەملەكەت ءقاۋىپ­سىزدىگى – بىر-بىرىمەن ەتەنە، ەگىز ۇعىمدار. مەم­لەكەت بۇل قيىندىقتان شىعۋ ءۇشىن قولدان كەلگەننىڭ ءبارىن جاسايدى جانە ءتيىستى شارانىڭ بارلىعىن اتقارادى. بىردە-بىر ادام، ەلىمىزدىڭ ەشبىر ازاماتى قامقورلىقسىز قال­مايدى.

ءبىز – ءبىرتۇتاس ەل، بىرلىگى بەرىك جۇرتپىز. مەن ءارقاشان حالقىممەن بىرگە بولعانمىن، بۇل جولى دا سىزدەرمەن بىرگەمىن.

ءبىز بىرگەمىز. قيىندىققا قايىسپاي، بەلىمىزدى بەكەم بۋىپ، بەرەكە-بىرلى­گىمىزدەن ايرىلمايىق. سوندا عانا ­ءبىز قاس­تەر­ءلى تاۋەلسىزدىگىمىزدى ساقتاپ، قازاق­ستان­دى ماڭگىلىك ەل بولۋعا لايىقتى ەتە الامىز.

نۇرسۇلتان نازاربايەۆ،

قازاقستان رەسپۋبليكاسىنىڭ تۇڭعىش پرەزيدەنتى – ەلباسى

ەگەمەن قازاقستان