ەۋرووداق باسشىلارىنىڭ ايتۋىنشا، كوروناۆيرۋسپەن كۇرەسۋدىڭ "ەكىنشى كەزەڭى" بولادى، وندا قوعام ماسكا تاعىپ "ۆيرۋسپەن بىرگە ءومىر ءسۇرۋدى" ۇيرەنەدى، دەپ جازادى thesun.co.uk.

اۆستريانىڭ كانسلەرى سەباستيان كۋرس كوروناۆيرۋستىق شەكتەۋ شارالارىن اياقتاۋ كۇندەرىنە بايلانىستى جوسپارىن ايتقان ەۋروپانىڭ العاشقى باسشىسى بولدى. 

ونىڭ ايتۋىنشا، شاعىن دۇكەندەر 14 ساۋىردەن باستاپ قايتا اشىلادى، ەگەر ءبارى جاقسى بولسا، ۇلكەن دۇكەندەر مەن ساۋدا ورتالىقتارىن 1 مامىردا اشۋعا بولادى.

اۆستريادان كەيىن كوپ ۇزاماي دانيا 15 ساۋىردەن باستاپ بىرتىندەپ شەكتەۋلەردى الا باستايتىنىن مالىمدەدى. ەلدەگى Covid-19 سانى تۇراقتى بولعان جاعدايدا بالاباقشالار مەن باستاۋىش مەكتەپتەر قايتادان اشىلۋى مۇمكىن .

رەيتەر اگەنتتىگى حابارلاعان ۇكىمەتتىك قۇجاتقا سايكەس، گەرمانيا شەكتەۋدى الۋدى كەزەڭ-كەزەڭمەن ىسكە اسىرۋدى جوسپارلاپ وتىر.

جوسپارعا مىندەتتى تۇردە ماسكا تاعۋ، ينفەكسيا جۇقتىرعان ادامداردى جانە ولارمەن بايلانىستا بولعان ادامداردى كارانتينگە الۋ كىرەدى.

بۇل جوسپار دۇكەندەر مەن كەيبىر مەكتەپتەردىڭ اشىلۋىنا مۇمكىندىك بەرۋى ىقتيمال، ءبىراق الەۋمەتتىك وقشاۋلانۋ جالعاسادى جانە ءىرى شارالار مەن جەكە جينالىستارعا تىيىم سالىنادى.

ينفەكسيا دەڭگەيى 17 ناۋرىزدان باستاپ تومەندەۋىنە بايلانىستى يتاليا دا كوروناۆيرۋس شەكتەۋىن ازايتا باستادى. يتاليادا شەكتەۋ شارالارى 13 ساۋىردە اياقتالادى، ءبىراق يتاليانىڭ كوروناۆيرۋسپەن "بىرگە ءومىر ءسۇرۋدىڭ" كەلەسى كەزەڭىنە قاشان جانە قالاي كىرەتىنى ساراپشىلاردىڭ تەحنيكالىق توبى شەشەدى.

بۇعان دەيىن مۇلدە توقتاعان بيزنەستەر قايتا جۇمىس باستاۋى مۇمكىن.

ال، يسپانيا پاسحا مەرەكەسىنەن كەيىن كەيبىر ەكونوميكالىق شەكتەۋلەردى الىپ تاستاۋعا بولاتىنىن ايتقان.

ءبىراق دۇكەندەر، بارلار مەن مەيرامحانالار جابىق كۇيدە قالادى، سوندىقتان شەكتەۋ شارالارى 26 ساۋىردەگى بەلگىلەنگەن مەرزىمنەن كەيىن دە جالعاسۋى مۇمكىن.

دانيا 11 ناۋرىزدان باستاپ كارانتيندە، ءبىراق پاسحا مەرەكەسىنەن كەيىن جاڭا جاعدايلاردىڭ تۋىنداۋى بولماسا، شارالاردى الىپ تاستاۋدى جوسپارلاپ وتىر.