سوڭعى دەرەككە ساي، ەلدە كوروناۆيرۋس ىندەتىن جۇقتىرعان تاعى 7 جاعداي تىركەلدى. ونىڭ 4-ەۋى اتىراۋ وبلىسىندا، 3-ەۋى قىزىلوردا وبلىسىندا انىقتالعان. قازاقستان بويىنشا كوروناۆيرۋس انىقتالعان ناۋقاستار سانى 704-كە جەتتى. 51 ادام سىرقاتتان جازىلىپ شىقسا، 6 ادام اجال قۇشقان.

جاڭا تىركەلگەن جاعدايلار تۋرالى دەنساۋلىق ساقتاۋ مينيسترلىگى تاراتقان اقپاراتقا سايكەس، قىزىلوردا وبلىسىندا اۋرۋ جۇقتىرعانداردىڭ ۇشەۋى دە سىرداريا اۋدانىندا تىركەلگەن. 

بارلىعى دا كوروناۆيرۋستىق ينفەكسيا جۇقتىرعان اداممەن قارىم-قاتىناستا بولۋىنا بايلانىستى كارانتيندىك ستاسيونارعا جاتقىزىلىپ، زەرتحانالىق سىنامالار الىنعان.

پتر دياگنوستيكالىق زەرتتەۋ قورىتىندىسى بويىنشا COVID-19 دياگنوزى ناقتىلاندى.

اتىراۋ وبلىسىنداعى 4 جاعدايدىڭ 3-ەۋى اتىراۋ قالاسىندا، 1-ەۋى جىلىوي اۋدانىندا انىقتالىپ وتىر. ولاردىڭ بارلىعى ۆيرۋس جۇقتىرعاندارمەن تىعىز قارىم-قاتىناستا بولعان.

قازىرگى تاڭدا ناۋقاستاردىڭ جاعدايلارى قاناعاتتانارلىق. بەكىتىلگەن حاتتاماعا سايكەس ءتيىستى ەم جۇرگىزىلۋدە.

الەم بويىنشا كوروناۆيرۋس ىندەتى 1 ملن 426 مىڭ 609 ادامدى شارپىدى. سوڭعى تاۋلىكتە 78 مىڭ 933 جاڭا جاعداي تىركەلگەن. ونىڭ ىشىندە 301 مىڭ 828 ادام اۋرۋدان ايىعىپ شىقسا، 81 مىڭ 995 ادام كوز جۇمعان.

ۆيرۋستىڭ تارالۋى ءورشىپ تۇرعان ءۇش ەلدەگى جاعداي تومەندەگىدەي:

اقش

شالدىققاندار – 396 224 (+28 144)
جازىلىپ شىققاندار – 21 763 (+1 935)
قايتىس بولعاندار – 12 844 (+1 921)

يسپانيا

شالدىققاندار – 141 942 (+5 267)
جازىلىپ شىققاندار – 43 208 (+2 771)
قايتىس بولعاندار – 14 045 (+704)

يتاليا
شالدىققاندار – 135 586 (+3 039)
جازىلىپ شىققاندار – 24 392 (+2 555)
قايتىس بولعاندار – 17 127 (+604)