بۇل تۋرالى پارتيا ءتوراعاسىنىڭ ءبىرىنشى ورىنباسارى باۋىرجان بايبەك فەيسبۋك پاراقشاسىندا حابارلادى.

"ەلباسىنىڭ تاپسىرماسى بويىنشا، مەملەكەت باسشىسىنىڭ باستاماسىمەن قولعا الىنعان «ءبىز بىرگەمىز!» اكسياسى اياسىندا «Nur Otan» پارتياسى مەن تۇڭعىش پرەزيدەنت قورى كوروناۆيرۋسپەن كۇرەس جاعدايىندا تۇرعىنداردىڭ الەۋمەتتىك ءالسىز توپتارىن قولداۋعا قارجى بولگەن ەدى. مەسەناتتار، كاسىپكەرلەر مەن بەلسەندى ازاماتتاردىڭ قولداۋىنىڭ ارقاسىندا ەلىمىزدىڭ بارلىق ايماقتارىندا بۇگىنگە دەيىن 30 مىڭ وتباسىعا، ونىڭ ىشىندە جالعىزباستى قارتتارعا، ەرەكشە قاجەتتىلىگى بار جانە ت.ب. ازاماتتارعا كومەك كورسەتىلدى.

سونىمەن قاتار، نۇرسۇلتان نازاربايەۆتىڭ باستاماسىمەن قۇرىلعان «Birgemiz» قورى وتكەن اپتادا 150 مىڭنان استام مۇقتاج ازاماتقا 50 مىڭ تەڭگە مولشەرىندە تىكەلەي اقشالاي كومەك كورسەتۋ تۋرالى شەشىم قابىلدادى. بۇلار نەگىزىنەن كارانتين قيىندىقتارىن كوبىرەك شەگىپ جاتقان 23 ءىرى قالانىڭ تۇرعىندارى. اكىمدەر مەن الەۋمەتتىك قورعاۋ ورگاندارى ۇسىنعان كومەك الۋشىلار تىزىمدەرىندە تابىس دەڭگەيى ەڭ تومەن الەۋمەتتىك ءالسىز توپتاردان قۇرالعان ازاماتتار قامتىلعان" دەدى پارتيا ءتوراعاسىنىڭ ءبىرىنشى ورىنباسارى.

باۋىرجان بايبەكتىڭ سوزىنشە، ماتەريالدىق كومەك اقشانى ەكىنشى دەڭگەيدەگى بانكتەر ارقىلى جەكە تۇلعانىڭ كارتا نەمەسە اعىمداعى شوتىنا قولما-قول اقشاسىز اۋدارۋ ارقىلى كورسەتىلەدى.

"سونىمەن بىرگە، ماتەريالدىق كومەك كورسەتكەن كەزدە بانكتىك كوميسسياسىز جانە ەگەر ازاماتتاردىڭ نەسيەلىك قارازدارى بولعان جاعدايدا، بۇل قاراجاتتى سول قارىزدى تولەۋ ءۇشىن ۇستاپ قالماۋ ماسەلەلەرى قاراستىرىلدى.

سونداي-اق، بۇگىن-ەرتەڭ 50 مىڭ تەڭگە كولەمىندەگى ءبىرجولعى تولەمدى ىندەت جۇقتىرعانداردىڭ 70%-كە جۋىعى شوعىرلانعان نۇر-سۇلتان جانە الماتى قالالارىنىڭ 2 مىڭنان استام دارىگەرلەرى دە الادى. بۇعان دەيىن، «سق-فارماسيا» ۇكىمەتتىك وپەراتورىمەن نۇر-سۇلتان، الماتى جانە شىمكەنت قالالارى تۇرعىندارىنىڭ ءالسىز توپتارىنا تەگىن تاراتۋ ءۇشىن 5 ميلليون ماسكا ساتىپ الۋ تۋرالى شارتقا قول قويىلدى.

جالپى بۇگىنگە دەيىن «Birgemiz» قوعامدىق قورىنىڭ ەسەپشوتىنا 14 ملرد. تەڭگەگە جۋىق قارجى ءتۇستى. وسىنداي كۇردەلى كەزەڭدە ەلباسى باستاماسىنا قولداۋ بىلدىرگەن بارلىق مەسەناتتارعا تاعى دا العىسىمدى بىلدىرەمىن. جينالعان قاراجات جانە وڭىرلەر بويىنشا بولىنگەن كومەك تۋرالى اقپاراتتى باقىلاپ وتىرۋ ءۇشىن birgemiz2020.kz رەسمي سايتى اشىلدى" دەپ اتتاپ ءوتتى باۋىرجان بايبەك.