پارلامەنت ءماجىلىسىنىڭ دەپۋتاتى گەنناديي شيپوۆسكيح قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ Egemen Qazaqstan گازەتىنە جاريالاعان ماقالاسىن وقىپ، ودان نە تۇيگەنىن ايتىپ بەردى، دەپ حابارلايدى قازاقپارات.

– تۇڭعىش پرەزيدەنت – ەلباسىنىڭ شىققان بۇگىنگى ماقالاسىمەن وقىپ، تانىستىق. ماقالادا تەرەڭ وي جاتىر. بىرىنشىدەن ەلباسى وسىناۋ كۇردەلى كەزەڭدە حالىقپەن اقىلداسىپ وتىر. ىندەت ءقازىر قازاقستاندى عانا ەمەس، كۇللى الەمگە ءقاۋپىن تۋعىزۋدا. تۇڭعىش پرەزيدەنتتىڭ ماقالاسىندا ەكى اسپەكتكە ەرەكشە نازار اۋداردىم: بىرىنشىدەن ەلباسى ۇلتتىق قورعا بايلانىستى حالىققا ناقتى اقپارات بەردى. پاندەمياعا بايلانىستى حالىقتى قولداۋ ءۇشىن ۇلتتىق قوردان ءتيىستى قاراجات بولىنەتىنىن ايتتى. جالپى كىمگە قانداي جەڭىلدىكتىڭ بەرىلەتىنى دە اتالدى، – دەيدى گەنناديي شيپوۆسكيح قازاقپارات تىلشىسىنە تەلەفون ارقىلى ايتقان پىكىرىندە.

دەپۋتاتتىڭ ايتۋىنشا، بۇرىن ەلباسىنا ۇلتتىق قورداعى اقشانى بۇعان دەيىنگى قاجەتتىلىكتەرگە جۇمساۋ تۋرالى سان ءتۇرلى ۇسىنىس بولعان.

– ايتسە دە، نۇرسۇلتان نازاربايەۆتىڭ سول تۇستا مىزعىماعان قاعيداتىنىڭ بۇگىنگى كۇنى پايداسىن كورىپ وتىرمىز. سونىمەن بىرگە ەكىنشى اسپەكت: ەلدى تىڭداتا بىلەتىن زيالى قاۋىمعا ايتىلعان وي. سەبەبى ەلباسى ايتىپ وتىرعانداي حالىقتى سابىرعا شاقىرىپ، وسكەلەڭ ۇرپاققا دۇرىس وي-اقىل ايتۋ كەرەك. قازاقستان تاۋەلسىزدىگىن جاريالاعالى بەرى 30 جىل ۋاقىت ءوتتى. ياعني سول كەزدە تۋعان بالا ءقازىر وردا بۇزار وتىز جاسقا جەتتى. ءبىر قاراساڭ، كوپ تە، از دا ەمەس. مەملەكەت وسىعان دەيىن دە، كەيىن دە جاستارىمىزدى قولداپ، ءبىلىمىن شىڭداي بەرمەك. ءقازىر سول جاستارىمىز ىندەتتىڭ بەتىن قايتارۋ ءۇشىن ءبىرى دارىگەر، ءبىرى پوليسيا قىزمەتكەرى بولىپ، كۇن-تۇن دەمەي ەڭبەكتەنىپ ءجۇر. ەلباسى ولاردىڭ ەڭبەگىنە دە ەرەكشە العىسىن ايتتى. اباي دا «ءبىرىڭدى قازاق، ءبىرىڭ دوس، كورمەسەڭ ءىستىڭ ءبارى بوس» دەيدى. وسىناۋ قىسىلتاياڭ شاقتا ەلدەگى ءار ازامات «ەلىم ءۇشىن نە ىستەي الامىن؟» دەپ وزىنە ءوزى سۇراق قويۋى ءتيىس. بۇگىنگى ەلباسى ماقالاسىندا يدەولوگيالىق تۇرعىدا ۇلكەن قۇندىلىقتار جاتىر. وسى قۇندىلىقتاردى قولداپ، ءوزىمىز ءارقاشان كۇش بىرلىكتە ەكەنىن ءتۇسىنۋىمىز كەرەك، – دەيدى دەپۋتات.

ەسكە سالا كەتسەك، بۇگىن Egemen Qazaqstan گازەتىندە ق ر تۇڭعىش پرەزيدەنتى – ەلباسى نۇرسۇلتان نازاربايەۆتىڭ ماقالاسى جاريالانعان ەدى.

ايان بەكەن ۇلى