«ءسىزدىڭ ەسەبىڭىزگە 50 000 تەڭگە ءتۇستى. #BizBirgemiz #مىۆمەستە #ەلباسى #Nur Otan». وسىنداي حابارلامالاردى تۇرعىنداردىڭ الەۋمەتتىك جاعىنان ءالسىز توپتارىنا جاتاتىن قازاقستاندىق وتباسىلار الىپ جاتىر.
نۇرسۇلتان نازاربايەۆتىڭ باستاماسىمەن قۇرىلعان «Birgemiz» قوعامدىق قورى قامقورشىلىق كەڭەسىنىڭ وتكەن اپتاداعى وتىرىسىندا كوروناۆيرۋسپەن كۇرەس جاعدايىندا حالىقتىڭ الەۋمەتتىك ءالسىز ساناتىنا كىرەتىن مۇقتاج جاندارعا 50 مىڭ تەڭگەدەن ءبولۋ تۋرالى شەشىم قابىلدانعان ەدى.
باستاپقىدا قور قاراجاتىن 100 مىڭ مۇقتاج ازاماتقا تاراتۋ جوسپارلانعان. ايتسە دە، وڭىرلەردەن تۇسكەن وتىنىشتەر سانى ايتارلىقتاي ءوسىپ، ال پارتيانىڭ ونلاين رەسۋرستارىنا كومەك سۇراپ حابارلاسۋشىلار سانى ەكى ەسەگە ارتتى. سوندىقتان، ەلباسىنىڭ تاپسىرماسى بويىنشا مەملەكەت باسشىسىنىڭ باستاماسىمەن قولعا الىنعان «Biz Birgemiz» اكسياسىنىڭ اياسىندا، ءبىرىنشى كەزەڭدە قارجىلىق قولداۋدى 150 مىڭنان اسا مۇقتاج ازاماتقا كورسەتۋ تۋرالى شەشىم قابىلداندى.
«Birgemiz» قوعامدىق قورىنىڭ ءتوراعاسى رۋسلان ساكەيەۆتىڭ مالىمەتىنشە، قازىرگى تاڭدا 50 مىڭ تەڭگە ماتەريالدىق كومەكتى 50 مىڭنان اسا ادام الىپ ۇلگەردى.
– 7،6 ميلليارد تەڭگە قاراجات ايماقتىق قورلاردىڭ ەسەبىنە ءتۇستى. اقشا سول جاقتان كومەك الۋشىلاردىڭ بانكتىك ەسەپ-شوتتارىنا اۋدارىلادى. بۇلار نەگىزىنەن كارانتين قيىندىقتارىن كوبىرەك شەگىپ جاتقان 23 ءىرى قالانىڭ تۇرعىندارى. اكىمدەر مەن الەۋمەتتىك قورعاۋ ورگاندارى ۇسىنعان كومەك الۋشىلار تىزىمدەرىندە تابىس دەڭگەيى ەڭ تومەن الەۋمەتتىك ءالسىز توپتاردان قۇرالعان ازاماتتار قامتىلعان. ونىڭ ىشىندە از قامتىلعان جانە كوپبالالى وتباسىلار، مۇقتاج مۇگەدەك جاندار، مۇمكىندىگى شەكتەۋلى بالا تاربيەلەپ وتىرعان وتباسىلار، ەڭ تومەنگى زەينەتاقى الاتىن جانە الەۋمەتتىك جاعىنان ءالسىز توپقا كىرەتىن زەينەتكەرلەر، جەتىم بالالار، ۇوس-نىڭ ارداگەرلەرى مەن ولارعا تەڭەستىرىلگەن تىل ەڭبەككەرلەرى بار، – دەدى رۋسلان ساكەيەۆ.
سونىمەن قاتار، ول ماتەريالدىق كومەكتى ەكىنشى دەڭگەيدەگى بانكتەر ارقىلى جەكە تۇلعالاردىڭ كارتوچكالارىنا نەمەسە اعىمداعى ەسەپشوتتارىنا اۋدارۋ كەزىندە ودان كوميسسيا الىنبايتىنىن ايتتى. سونداي-اق، بۇل قاراجاتتىڭ كرەديتتەرى بويىنشا قارىزى بار ازاماتتاردىڭ بەرەشەگىن وتەۋ ءۇشىن ۇستالىپ قالماۋى دا پىسىقتالعان.
– بۇگىن ەرەكشە قاجەتتىلىگى بار بالالاردى تاربيەلەپ وتىرعان وتباسىلار "BIZBIRGEMIZ" قق-نان 50 000 تەڭگە كومەك الا باستادى. بۇل ەلباسى مەن نۇر وتان پارتياسىنىڭ ارقاسىندا جۇزەگە اسىپ وتىر. الەۋمەتتىك ساياساتتى دۇرىس باعىتتا جۇرگىزىپ، ارداگەرلەردى، ەرەكشە قاجەتتىلىگى بار بالالاردى جانە تۇرعىنداردىڭ الەۋمەتتىك ءالسىز توپتارىن ەشقاشان قامقورلىقسىز قالدىرمايتىندارىڭىز ءۇشىن العىسىمىزدى بىلدىرەمىز. وسىنداي قيىن ۋاقىتتا ءاربىرىنىڭ ەسەبىنە 50.000 تەڭگەدەن اۋدارىپ، مۇگەدەك بالالاردى دا نازاردان تىس قالدارمادىڭىزدار، – دەپ جازدى ءوزىنىڭ Facebook-تەگى پاراقشاسىندا «وردا» ەلوردالىق ءاۋتيزىمى بار بالالاردىڭ اتا-انالار بىرلەستىگىنىڭ جەتەكشىسى سالتانات ەسماگامبەتوۆا.
– بۇگىن مەنىڭ كارتوچكاما #Birgemiz قورىنان 50 مىڭ تەڭگە تۇسكەنى تۋرالى حابارلامانى الىپ قۋانىپ قالدىم. ەلباسىعا جانە Nur Otan پارتياسىنا قازىرگىدەي قيىن كەزەڭدە ءبىزدى ەلەپ-ەسكەرگەنى ءۇشىن راقمەت ايتامىن. ەستۋىم بويىنشا، مۇنداي كومەكتى از قامتىلعان كوپبالالى وتباسىلار، 1 توپ مۇگەدەكتەرى، جەتىم بالالار الادى. قالا تۇرعىندارىنان كارانتين ۋاقىتىندا بارلىق قاۋىپسىزدىك شارالارىن قاتاڭ ساقتاپ، اسا قاجەت بولماعان جاعدايدا ۇيدەن شىقپاۋلارىن وتىنەمىن. ءبىز بىرگە بارلىق سىناققا توتەپ بەرە الامىز. #BizBirgemiz!، – دەپ جازدى ءوزىنىڭ Instagram پاراقشاسىندا الماتى قالاسىنىڭ تۇرعىنى، ءۇش بالانىڭ اناسى اسەل وماروۆا.
جالپى «Birgemiz» قوعامدىق قورىنىڭ ەسەپشوتىنا 14 ملرد. تەڭگەگە جۋىق قارجى ءتۇستى. جۋىق ارادا 50 مىڭ تەڭگە كولەمىندەگى ءبىرجولعى تولەمدى ىندەت جۇقتىرعانداردىڭ 70%-كە جۋىعى شوعىرلانعان نۇر-سۇلتان جانە الماتى قالالارىنىڭ 2 مىڭنان استام دارىگەرلەرى دە الادى. «سق-فارماسيا» ۇكىمەتتىك وپەراتورىمەن نۇر-سۇلتان، الماتى جانە شىمكەنت قالالارى تۇرعىندارىنىڭ ءالسىز توپتارىنا تەگىن تاراتۋ ءۇشىن 5 ميلليون ماسكا ساتىپ الۋ تۋرالى شارتقا قول قويىلدى. جينالعان قاراجات جانە وڭىرلەر بويىنشا بولىنگەن كومەك تۋرالى اقپاراتتى باقىلاپ وتىرۋ ءۇشىن قور birgemiz2020.kz رەسمي سايتىن اشتى.
پىكىر قالدىرۋ