قازاقستان ىشكى ىستەر مينيسترلىگىنىڭ ءبىر قىزمەتكەرىنەن كوروناۆيرۋس تابىلدى. بۇل تۋرالى بۇگىن، 9 ساۋىردە ىشكى ىستەر ءمينيسترىنىڭ ورىنباسارى يۋريي يلين ايتتى. 

ونىڭ ايتۋىنشا، ۆيرۋس جۇقتىرعان پوليسەي ءقازىر ەمدەلىپ جاتىر، جاعدايى تۇراقتى. ءبىراق ىندەت تابىلعان ىشكى ىستەر مينيسترلىگىنىڭ قىزمەتكەرى قاي وڭىردەن ەكەنى ايتىلمادى. 

ءيليننىڭ سوزىنشە، ىندەت تابىلعان قىزمەتكەرمەن قارىم-قاتىنىستا بولعان 530 ادام انىقتالعان. ولاردىڭ 30-عا جۋىعى ستاسيونارلىق كارانتيندە ەمدەلىپ جاتىر.

"80-گە تارتا ادام ءۇي جاعدايىنداعى كارانتيندە. بۇگىندە كوبىسى جۇمىسقا شىعىپ، قىزمەتىن جالعاستىرۋدا. ىشكى ىستەر مينيسترلىگى قىزمەتكەرلەرىنىڭ ومىرىنە ىندەت سالدارىنان ءقاۋىپ ءتونىپ تۇرعان جوق" دەدى يلين.

بۇعان دەيىن دەنساۋلىق ساقتاۋ مينيسترلىگى ەلدە 120 مەديسينا قىزمەتكەرىنەن ۆيرۋس تابىلعانىن حابارلاعان. ولاردىڭ 67ء-ى ىندەت جۇقتىرعان ادامدارمەن جۇمىس ىستەۋ بارىسىندا وزدەرىنە جۇقتىرعان. 

قازاقستانعا كوروناۆيرۋس جەتىپ، ەلدە توتەنشە جاعداي جاريالانعان سوڭ پرەزيدەنت قاسىم-جومارت توقايەۆ كوروناۆيرۋسپەن كۇرەسىپ جاتقان قىزمەتكەرلەرگە ۇستەمە اقى بەرىلەتىن ايتقان. ولاردىڭ اراسىندا مەديسينا قىزمەتكەرلەرى مەن پوليسەيلەر دە بار. 

سوڭعى دەرەك بويىنشا، ەلدە 759 ادامنان ۆيرۋس تابىلدى. ولاردىڭ جەتەۋى كوز جۇمىپ، 55ء-ى جازىلىپ شىقتى.