الماتىدا «جاڭا الاتاۋ قورى» ەسەبىنەن 12 000 ادام ازىق-تۇلىك قورجىنىن الدى. بۇل تۋرالى قالا اكىمدىگىنىڭ باسپا ءسوز ورتالىعىندا وتكەن ونلاين-بريفينگتە قامقورشىلار كەڭەسىنىڭ ءتوراعاسى راحمان الشانوۆ مالىمدەدى.

– بۇگىنگى تاڭدا الماتى قالاسى اۋماعىندا توتەنشە جاعدايدىڭ ەنگىزىلۋىنە بايلانىستى قالا حالقىنىڭ وسال توپتارىنا جان-جاقتى الەۋمەتتىك كومەك كورسەتۋ جۇمىستارى جالعاسۋدا. وزدەرىڭىز بىلەسىزدەر، "جاڭا الاتاۋ" قوعامدىق قورىنا العاشقىلاردىڭ ءبىرى بولىپ ق ر تۇڭعىش پرەزيدەنتى – ەلباسى نۇرسۇلتان نازاربايەۆتىڭ قورىنان 100 ملن تگ قاراجات كەلىپ تۇسكەن بولاتىن. وعان قوسىمشا اتالمىش قورعا دەپۋتاتتار مەن كاسىپورىنداردان، دەپۋتاتتار مەن كاسىپكەرلەردەن 256 ملن قاراجات ءتۇستى. بۇگىنگى تاڭدا بۇل قارجىنىڭ 136 ملن تگ جۇمسالدى. مۇقتاج جاندارعا 17 000 ازىق-تۇلىك قورجىندارى تاراتىلدى. 8 الەۋمەتتىك ۇيىمدارعا، سونىڭ ىشىندە، 6 ينتەرناتقا، جاستار قوعامدىق ۇيلەرىنە، مۇگەدەكتەرگە، زەينەتكەرلەرگە، كوپبالالى انالارعا، ارداگەرلەر مەن الەۋمەتتىك ۇيلەرگە كومەك كورسەتىلىپ جاتىر. ءتۇسىپ جاتقان قاراجاتتار الەۋمەتتىك ماڭىزى بار شارالارعا جۇمسالۋدا، – دەدى ر. الشانوۆ.

سپيكەر الەۋمەتتىك كومەك الىپ جاتقان جاندار قاتارىنان ەشقانداي شاعىم ءتۇسىپ جاتپاعانىن ايتا كەلىپ، كەرىسىنشە، ريزاشىلىقتارىن ءبىلدىرىپ جاتقان وقىرمانداردىڭ كوپ ەكەنىن جەتكىزدى. ماسەلەن، 291 ەستۋ قابىلەتى ناشار جاندار اتىنان العىس حات جولداعان امانبەك ەرعالييەۆتىڭ حاتىندا مۇقتاج جاندارعا قاجەت كەزىندە كومەك قولدارىن سوزىپ، ازىق-تۇلىك قورجىنىن جەتكىزىپ بەرگەندەرى ءۇشىن العىس ايتىلعان.

– وسىنداي مازمۇنداعى حاتتار بىزگە كوپتەپ كەلىپ جاتىر. كومەك كورسەتىلەتىن ادامداردىڭ ءتىزىمى شەكتەلمەيدى، ءبىز ولاردىڭ سۇرانىستارىن ەسكەرىپ، جۇمىس اتقارىپ جاتىرمىز. "جاڭا الاتاۋ" قورى بۇدان بىلاي مۇقتاج جاندارعا الەۋمەتتىك كومەكتى، اسىرەسە ازىق-تۇلىك جيىنتىعىن ۆولوەنتەرلەر ەمەس، «قازپوشتا» اق ارقىلى جونەلتەدى. سەبەبى، قوردا جۇمىس كوپ، ونداعى مۇقتاج جاندارعا بەرىلەتىن قورجىنداردى ولشەپ-وراۋ جۇمىستارىن وسى ۆولونتەرلەر اتقاراتىن بولادى. كومەك كورسەتۋگە بولىنەتىن قاراجات ارداگەرلەردى، مۇگەدەكتەردى، ينتەرناسيوناليست-جاۋىنگەرلەردى بىرىكتىرەتىن ءار ءتۇرلى ۇيىمدار ارقىلى جۇرگىزىلەدى، – دەدى سپيكەر.

ر. الشانوۆ بولىنگەن قارجىلار مەن ولاردىڭ جۇمسالۋى مىندەتتى تۇردە اشىق بولاتىنىن ايتا كەلىپ، قازىرگى ۋاقىتتا الەۋمەتتىك قامسىزداندىرۋ ورگاندارى كومەككە وتە مۇقتاج ادامداردىڭ تىزىمدەرىن جاسالىپ جاتقانىن جەتكىزدى. ول ءۇشىن اتالمىش قوردىڭ كومەگىنە مۇقتاج جاندار ءوزى تۇراتىن اۋداننىڭ اكىمدىگىنە، ارداگەرلەر كەڭەسىنە، مۇگەدەكتەر قوعامىنا بارىپ، قولداۋدى قاجەت ەتەتىن قالا تۇرعىنى رەتىندە تىركەلۋ قاجەتتىگىن ايتتى.

– وسىناۋ يگىلىكتى ىسكە نيەت بىلدىرگەن جانداردان قايىرىمدىلىقتى قابىلدايمىز. ول ءۇشىن ينتەرنەت ارقىلى بىزبەن حابارلاسىڭىز. ءبىز سىن ساعاتتا كومەك قولىن سوزعان جانداردىڭ بارلىعىنا العىس ايتامىز، – دەدى الشانوۆ.